საქართველოს 19-წლამდელთა ნაკრების წევრი მერაბ გიგაური ქუთაისის "ტორპედომ" ზაფხულში პოლონეთის ექსტრაკლასას "იაგელონიაში" ერთწლიანი იჯარით და ტრანსფერის გამოსყიდვის უფლებით გაუშვა. 18 წლის საყრდენი ნახევარმცველისთვის "იაგელონიაში" მოხვედრა მართლაც მშვენიერი შანსი იყო კარიერის ასაწყობად. დუბლებში მუდმივი სათამაშო პრაქტიკა ჰქონდა, 18-კაციან განაცხადშიც ხშირად იყო, მთავარმა მწვრთნელმა ჩესლავ მიხნევიჩმა კი რამდენჯერმე ძირითადშიც ათამაშა. ამასობაში პოლონურიც აითვისა და ენობრივი ბარიერის გადალახვის შემდეგ გუნდსაც შეეწყო.
პოლონეთის ჩემპიონატის საშემოდგომო ეტაპის დასრულების შემდეგ "იაგელონიას" გიგაურის კონტრაქტის გამოსყიდვა სურდა, მაგრამ დეკემბერში მოხსნეს მიხნევიჩი, რომლის იდეაც იყო გიგაურის "ტორპედოდან" მიწვევა. მანვე
ამ ცვლილების შემდეგ ისევ აპირებს კლუბი გიგაურის ტრანსფერის გამოსყიდვას?
"დიახ, მწვრთნელი შეიცვალა, მაგრამ ამით ჩემს მიმართ კლუბის დამოკიდებულება არ შეცვლილა. როგორც მითხრეს, ტრანსფერის გამოსყიდვა ძველებურად სურთ. იჯარას ვადა გასდის და გამოსყიდვაზე პოლონელები ქუთაისის "ტორპედოს" მეპატრონეებს ზაფხულში დაელაპარაკებიან. შეთანხმებაში წერია, რომ "იაგელონიას" საკუთრება იმ შემთხვევაში გავხდები, თუ "ტორპედოს" 200 ათას ევროს გადაუხდის.
ჩემი პოზიცია ასეთია: ყველაფერს გავაკეთებ, უფრო მეტად მოვინდომებ, რათა ახალ მწვრთნელს თავი მოვაწონო, კარიერის აწყობის ეს შანსი გამოვიყენო და პოლონეთში დავრჩე.
მართალია, "ტორპედოს" ჩემი დასაწუნი არაფერი სჭირს, ამბიციური კლუბია და ფეხბურთელებს მშვენიერ პირობებს უქმნიან, მაგრამ, ვინც ჩემს ასაკში პოლონეთში ითამაშებს და იქაურ პირობებსა და საფეხბურთო გარემოს ნახავს, მერწმუნეთ, საქართველოში დაბრუნება არ მოუნდება. ცხადია, გამონაკლისი არც მე ვარ. იქ, ევროპაში მეტია პერსპექტივა.
პოლონეთში ყველა შეხვედრას გერმანიის და სხვა დიდი საფეხბურთო ქვეყნების კლუბების სელექციონერები ესწრებიან და თავს თუ გამოიჩენ, მიგიწვევენ. მე კი პოლონურ ფეხბურთს შევეჩვიე და მინდა, კარიერა ამ ქვეყანაში ავიწყო", - ამბობს გიგაური.
ყოველდღიური სპორტული გაზეთი "ლელო"
