ირაკლი მესხიაზე მცირე ხნის წინ ვწერდით: კიევის "ობოლონის" შემტევმა ნახევარმცველმა თანაქალაქელ "არსენალთან" შეხვედრაში პრემიერლიგაში პირველი გოლი გაიტანა და დამარცხებული "ობოლონიდან" (სანდრო კობახიძის გუნდთან 1:4 დამარცხდა) ყველაზე კარგი შეფასება დაიმსახურა (იხილეთ სტატია: უკრაინის მოქალაქე ირაკლი მესხიას საქართველოს ნაკრებში მოიწვევენ?).უკრაინული ინტერნეტ-გამოცემა "უა.ფუტბოლი" რუბრიკაში "ვინ ითამაშებს ევრო 2012"-ზე ჩემპიონატის სტატისტიკურ მონაცემებს და შეფასებებს აქვეყნებს და ცდილობს დაადგინოს მოთამაშეთა ის შემადგენლობა, რომელსაც ოლეგ ბლოხინი ევროპის 2012 წლის ჩემპიონატის განაცხადში შეიყვანს.
ირაკლიმ "ობოლონში" ჯერ მხოლოდ 3 შეხვედრა ჩაატარა, 1 გოლი გაიტანა და ამდენივე საგოლე
"დედაქალაქური კლუბის 19 წლის ნახევარმცველმა "ობოლონში" მხოლოდ სამი შეხვედრა ჩაატარა. ამის მიუხედავად, მესხიამ უკვე ყველა აალაპარაკა. თუ დონეცკის "მეტალურგთან" სადებიუტო შეხვედრაში არც ისე კარგად გამოიყურებოდა, შემდეგ შედეგიანი გადაცემითა და გოლით გამოიჩინა თავი", - წერს "უა.ფუტბოლი" ირაკლი მესხიასთან ინტერვიუს შესავალში.
"რა თქმა უნდა, გოლის გატანა და გუნდის დახმარება ყოველთვის სასიამოვნოა, მაგრამ როდესაც მეტოქე 3:0-ს იგებს, განსაკუთრებული ემოციები ვერ დაგეუფლება. თუმცა გოლი ჩემთვის მაინც დიდი სტიმული იყო.
სასიამოვნო და სასიხარულოა, რომ ერთადერთი შანსი გამოვიყენე და "ობოლონის" რიგებში პირველი გოლი გავიტანე.
მატჩის შემდეგ "ობოლონის" მთავარმა მწვრთნელმა სერგეი კონიუშენკომ მითხრა, რომ ჩემგან მეტს ელოდა. მაგრამ ახლა მე "ფიზიკა" არ მყოფნის... დუბლშემადგენლობიდან პირველ გუნდში გადასვლისას გამოჩნდა, რომ დონეებში განსხვავება დიდია, მაგრამ ყველა მეხმარება, მკარნახობს, არავინ მიყვირის და ამის გამო არანაირ დისკომფორტს არ ვგრძნობ", - თქვა მესხიამ.
საქართველოს ახალგაზრდული ნაკრების მთავარმა მწვრთნელმა ალექსანდრე ჩივაძემ "ობოლონის" ქართველი ფეხბურთელის მიმართ ინტერესი დაგვიდასტურა და გვითხრა, როგორც ნიჟნი ნოვგოროდის "ვოლგას" მცველი დავით კოხია ჩამოვიყვანეთ და გავსინჯეთ, ასევე გვსურს მესხიასთან დალაპარაკება და თანხმობის შემთხვევაში ნაკრებში თავის გამოჩენის შანსს აუცილებლად მივცემთო.
ყოველდღიური სპორტული გაზეთი "ლელო"
