"კრასნოდარის" კაპიტანმა ალექსანდრე ამისულაშვილმა "როსტოვთან" (0:0) რუსეთის ჩემპიონატის მეხუთე ტურის მატჩის შემდეგ შეფასება გააკეთა."სამწუხაროდ, მოედანზე აქტიურად არ ვმოქმედებდით, გუნდი გადაღლილი იყო. ეს კი იმის ბრალია, რომ დაახლოებით 8 ფეხბურთელი ნაკრებში იყო გამოძახებული.
პირველ ტაიმში თავს კარგად ვგრძნობდით, ხოლო მეორეში ცოტა გაგვიჭირდა. ამ სეზონში უკვე არაერთხელ დაგვემართა ასე - მეორე ტაიმში ვიღლებით.
რაც შეეხება ანგარიშს, ვფიქრობ, 0:0 სამართლიანია. "კრასნოდარმა" განსაკუთრებული ვერაფერი შექმნა, პრინციპში ისევე, როგორც "როსტოვმა", - თქვა ამისულაშვილმა.
შეგახსენებთ, რომ ამისულაშვილის გარდა "კრასნოდარში" საქართველოს ნაკრების მეკარე ნუკრი რევიშვილი ირიცხება,
გარდა ამისა, "როსტოვთან" შეხვედრის დაწყებამდე "კრასნოდარმა" რუსული პრემიერლიგის ხელმძღვანელობისგან 2011/12 წლების სეზონის ჩემპიონატის სპეციალური პრიზი "Fair Play" მიიღო.
საპატიო ჯილდო გუნდის კაპიტანს ალექსანდრე ამისულაშვილს გადაეცა. აღნიშნულ პრიზს რუსეთში ის გუნდი იღებს, რომელიც მოედანზე და მის გარეთ წესებს ყველაზე ნაკლებად არღვევს.
