რატომ არ დათანხმდა შოთა არველაძე საქართველოს ნაკრების გაწვრთნას

მას შემდეგ, რაც შოთა არველაძემ "ქაისერისფორი" დატოვა და რამდენიმე დღეში ახალი გუნდი, სტამბულის "ქასიმფაშა" ჩაიბარა, მასთან ინტერვიუ არ გვქონია.

შოთას 16 ოქტომბერს დავუკავშირდით თურქეთში. გვინდოდა, რომ ტყუპისცალს საქართველოს ნაკრების ფინეთთან მატჩზეც ესაუბრა, თუმცა გვითხრა, ამ თამაშს ვერ ვუყურეო.

ერთი სიტყვით, არველაძეს ფინეთ-ბელორუსის მატჩების შეფასება ვერ ვთხოვეთ; სამაგიეროდ, თურქულ პერიპეტიებზე ველაპარაკეთ...

- როგორ აღმოჩნდი ასე უცბად ახალ გუნდში? სხვა შემოთავაზებები არ ყოფილა?
- როგორც კი წამოვედი "ქაისერისფორიდან", კლუბის პრეზიდენტს "ქასიმფაშას" პრეზიდენტმა დაურეკა და ჩემზე ელაპარაკა. აქედან ცოტა ხანში "ქასიმფაშა" უკვე მე დამიკავშირდა და გადაწყვეტილებაც მივიღე.

- მაინც რითი გამოდგა მიმზიდველი "ქასიმფაშას" წინადადება, თანხმობა მალევე რომ შეუთვალე?
- პირველ რიგში იმით, რომ კლუბი ძალიან ცნობილმა და ძლიერმა ბიზნესჯგუფმა შეიძინა. გარდა ამისა, ოჯახი სტამბულში ცხოვრობს და ჩემებთან უფრო მეტი დროის გატარება მომიწევს.

- ამ სეზონში რა მიზნებს ისახავ "ქასიმფაშა"?
- როგორ გითხრათ, კლუბს გრძელვადიანი გეგმები აქვს, მიზანი გამართული გუნდის შექმნაა, რომელიც ევროსარბიელზეც ღირსეულად ითამაშებს.

- მანდაურ ინფრასტრუქტურაზე რას გვეტყოდი?
- საკმაოდ ლამაზი სტადიონი აქვს "ქასიმფაშას", ბაზის მშენებლობაც სადაცაა, დასრულდება.

- როცა "ქაისერისფორიდან" წამოხვედი, გვითხარი, ჯერ ვერ ვხვდები იმის მიზეზს, რის გამოც გუნდს ბოლო პერიოდში ვერ აეწყო საქმე კარგადო. ახლა შეგიძლია ამის მიზეზი დაასახელო?
- დიდი დრო ჯერ არ გასულა, ამის შესახებ რაღაცის თქმა და დასკვნების გამოტანას, ალბათ, კიდევ დასჭირდება დრო.

- უკვე არცთუ ცოტა ვარჯიში ჩაატარე "ქასიმფაშაში" - რა შთაბეჭდილებები გაქვს?
- საკმაოდ ბრძოლისუნარიანი გუნდი ჩანს. დანარჩენს კი დრო გვიჩვენებს.

- ყველაზე უფრო რა პოზიციებზე საჭიროებს გუნდი გაძლიერებას?
- ამ ეტაპზე ყველაზე პრობლემატური დაცვის ხაზია, რადგან ბევრი ტრავმირებული მცველი დაგვიგროვდა.

- ანდრეას ისაკსონი, ფაბიან ერნსტი, კალუ უჩე... "ქასიმფაშაში" არაერთი ცნობილი ფეხბურთელი თამაშობს. როგორ ატყობ, მაინც ვინ არის გუნდის ლიდერი?
- ჩვენი ლიდერი გუნდური თამაშია.

- ისე, ცოტა უცნაურია - "ქასიმფაშა" ამ დროისთვის მეექვსე ადგილზეა, თურქეთის ჩემპიონატის ლიდერ "გალათასარაის" მხოლოდ ორი ქულით ჩამორჩება და გუნდიდან მთავარი მწვრთნელი გაუშვეს...
- არ ვიცი, რა მოხდა, ვერაფერს გეტყვით.

- საქართველოს ნაკრებზეც ვთქვათ. ფინეთთან მატჩი არ გინახავს, მაგრამ მაინც - როცა გუნდი 1:0-ზე რიცხობრივ უპირატესობაშია და მოედანზე არც ერთი ნომინალური თავდამსხმელი არ ჰყავს, ეს რას უნდა ნიშნავდეს?
- ეს იმას უნდა ნიშნავდეს, რომ მთავარი შედეგია.

- საქართველოს ნაკრების მწვრთნელობის ერთ-ერთი კანდიდატი შენც იყავი. ეს თანამდებობა რომ დაგეკავებინა, ნაჩქარევი გადაწყვეტილება იქნებოდა?
- ნაჩქარევი რომ იყო, მაგიტომაც არ დავთანხმდი.

(იბეჭდება მცირე ცვლილებით)
ყოველდღიური სპორტული გაზეთი "ლელო"

ასევე იხილეთ:
შოთა არველაძე: როგორც ვიცი, დემეტრაძეს რამდენიმე დღეში გაათავისუფლებენ
რას ურჩევს შოთა არველაძე საქართველოს ახალ ხელისუფლებას
შოთა არველაძე "კასიმფაშას" გაწვრთნის