ფეხბურთის ფედერაციის აღმასკომის სხდომის შემდეგ ზვიად სიჭინავას კომენტარი ისეთ საკითხებზე ვთხოვეთ, საზოგადოებაში კითხვებს რომ ბადებდა. უეფას მიერ გამოგზავნილ წერილში ლაპარაკი იყო სამ გარიგებულ მატჩზე. ფედერაციის პრეზიდენტს უპირველესად ამის თაობაზე ვკითხეთ.
- უეფადან წერილი 28 თებერვალს გამოაგზავნეს, თქვენ კი ის საზოგადოებას 4 მაისს აჩვენეთ. ამხელა შუალედი რამ გამოიწვია?
- წერილი უეფადან 28 თებერვალს კი გამოაგზავნეს, მაგრამ ჩვენ გაცილებით გვიან მივიღეთ და შემიძლია გაჩვენოთ შტამპი, რომლითაც ეს დასტურდება. უბრალოდ, მსგავსი გზავნილი არ არის პრეზიდენტისთვის განკუთვნილი წერილივით საჩქარო, რომელიც "დიეიჩელით" უნდა გააგზავნონ. საამისოდ
- ჯერ მხოლოდ ხუთი მოთამაშის ბრალეულობა დამტკიცდა. ნუთუ გარიგებები კლუბების მონაწილეობის გარეშე ხდებოდა?
- გარკვეული ეჭვები გვქონდა, მაგრამ მოქმედებაში პარალიზებული ვიყავით და ვერაფერს ვაკეთდებდით. სამართალდამცავებმა უდიდესი სამსახური გაგვიწიეს, რომ ხუთი მოთამაშე მაინც გამოავლინეს. ასე რომ, ჩვენ ახლა მხოლოდ მათი საკითხები განვიხილეთ, ვისზეც კონკრეტული მტკიცებულებანი გვქონდა. თუმცა გამოძიება ამით არ დასრულდება და თუ მომავალშიც ვიღაცას წაუცდება ხელი, მასაც მკაცრად დავსჯით. აღმასკომზე გადავწყვიტეთ, რომ ასეთ ფაქტებზე აღარ ვიმსჯელოთ და პირდაპირ სამუდამო დისკვალიფიკაცია მივუსაჯოთ.
- საფეხბურთო სამყარო საკუთარი ძალებით გარიგებულ მატჩებსა და კორუფციულ სქემებში გარეული გუნდებისა და ფეხბურთელების გამოვლენას ვერ ახერხებდა. სამართალდამცავებს დახმარებისთვის ამიტომ მიმართეთ?
- პასუხს სხვა კუთხით გაგცემთ: ნავთობი არის ბიზნესი, ჭადრაკი არის სპორტი, გაზი და ფეხბურთი კი - პოლიტიკა.
- ანუ, რისი თქმა გსურთ?
- ფეხბურთი არის ყველაზე დიდი პოლიტიკა. მასში ერთიანდება ქვეყნის კულტურა და ისტორია. ამიტომაც მიმაჩნია, რომ მის განვითარებასა და ყოველდღიურ პროცესში უნდა იყოს ჩართული ყველა ის ადამიანი თუ სტრუქტურა - დამლაგებლით დაწყებული, ქვეყნის პრეზიდენტით დამთავრებული - ვისთვისაც ეს ქვეყანა ძვირფასია. თუ ფეხბურთით ყველა ეს ადამიანი არ იქნება დაინტერესებული, წარმატებას ვერასოდეს მივაღწევთ.
ცხადია, სამართალდამცავებსაც ვგულისხმობ. გამოჩნდა კიდეც, რომ მათ ჩვენს სფეროში დიდი საქმის გაკეთება შეუძლიათ და კორუფციული გარიგებების გამოვლენით უდიდესი სამსახური გაგვიწიეს.
