თბილისში 12 ივნისს დაიწყო და 16 ივნისს დასრულდება საქართველოს ფეხბურთის ფედერაციისა და ფიფას მიერ ერთობლივად ორგანიზებული სამსაჯო კურსები, სადაც ცოდნას უმაღლეს ლიგაში მომუშავე 30 ქართველი მსაჯი იღრმავებს. მსმენელთა რანგში კი კურსებს ქვედა ლიგის 10 მსაჯი ესწრება. კურსები მოიცავს თეორიულ და პრაქტიკულ მეცადინეობებს, სათამაშო სიტუაციების სიმულირებას. სასწავლო პროცესს ფიფას სამსაჯო ინსტრუქტორი, ახლო წარსულში ცნობილი რუსი არბიტრი ვალენტინ ივანოვი და ფიფას ფიტნესინსტრუქტორი გჟეგოჟ კრზოსეკი უძღვებიან.
კურსები სასტუმრო "ბომონდ გარდენში" სფფ-ის გენერალურმა მდივანმა რევაზ არველაძემ და სამსაჯო განყოფილების ხელმძღვანელმა ლევან ფანიაშვილმა გახსნეს.
მსგავსი
16 ივნისს კურსების მონაწილე ყველა მსაჯს ფიფას სპეციალური სერტიფიკატი გადაეცემა.
