არქივში ძველი "დინამოს" შესახებ ინფორმაციებს ვეძებდი. სხვადასხვა თარიღებით გაჯერებული დავთრის გადაფურცლისას აღმოვაჩინე, რომ 5 აგვისტოს ვეტერან კალათბურთელ თენგიზ მეძმარიაშვილს 80 წელი უსრულდება.გადავწყვიტე მასთან დამერეკა და იუბილე მიმელოცა. ბატონმა თენგიზმა მოკლედ გაიხსენა კარიერის მნიშვნელოვანი მომენტები:
- თავდაპირველად კრივით ვიყავი გატაცებული. წარმატებებიც მქონდა - 1946 წელს იუნიორთა საკავშირო ჩემპიონატი მოვიგე. კრივის ცნობილ სპეციალისტ გოლდშტეინთან არაერთი გამოჩენილი სპორტსმენის გვერდით ვვარჯიშობდი. თუმცა ლევან ინწკირველისა და კოტიკო პაიჭაძის რჩევით კალათბურთში გადავედი. მითხრეს - გუნდში მეხუთე კაცი გვაკლიაო და მეც სიამოვნებით ვითამაშე. საწყის ორ მატჩში
ჯერ "ტოდოში" ამიყვანეს და კარგად მახსოვს, გუნდთან ერთად პირველივე შეკრება ვილნიუსში გავიარე. შემდეგ თბილისის "დინამოში" გადავედი. საინტერესო იყო მატჩი სსრ კავშირის ნაკრების წინააღმდეგ, რომელშიც გუნდის ლიდერის ალექსეევის წინააღმდეგ მომიწია თამაში. ეს რთული მისია იყო, მაგრამ ურიგოდ არ გამოვსულვარ. სხვათა შორის, საბჭოთა ნაკრების წინააღმდეგ 32-გრადუსამდე გამთბარ დარბაზში გვათამაშეს, რადგან სსრკ-ს მთავარი გუნდი გვიპტეში გასამგზავრებლად ემზადებოდა. აფრიკაში კი, მოგეხსენებათ ძალიან ცხელა და ნაკრებს აკლიმატიზაციის გავლა თბილისში სურდა.
თენგიზ მეძმარიაშვილმა თბილისის "დინამოსთან" ერთად სსრკ-ს თასი 1949 და 1950 წლებში მოიგო. 1950 წელს საბჭოეთის ჩემპიონი გახდა, თუმცა მატჩების არასრული რაოდენობა ჰქონდა ჩატარებული და ზოგ წყაროში გამარჯვებულთა გუნდში არ წერია. იგი სპორტული კარიერის დასრულების შემდეგ კიდევ უფრო წარმატებულად სამედიცინო სფეროში მოღვაწეობდა.
ყოველდღიური სპორტული გაზეთი "ლელო"
