საქართველოს მოქალაქეობა - საკითხი იმდენად საჭირბოროტო გახდა, რომ ნიგერიელ აბაიმო ოვონიკო შეუნს საქართველოს მაქალაქეობა მიანიჭეს.ოვონიკოკომ ეს იოლად მოახერხა, მას არ დასჭირდა არც ხელმოწერების შეგროვება და არც ძვირიანი ადვოკატების დაქირავება, რადგან ამ ბიჭს საქართველოს მოქალაქეობა მხოლოდ იმიტომ სურს, რომ ევროპულ ფეხბურთში გაითქვიფოს.
ოვონიკოკოსთვის კი ფეხბურთი უწყინარი რამეა, მან ფეხბურთით უნდა იშოვოს ფული და ცხოვრება მოიწყოს. ოვონიკოკოს ხელი გაუმართეს, კეთილი საქმე კი კაცს ყოველთვის წინ დაუხვდება.
ქართველი ფეხბურთელისთვისაც მიუციათ უცხოური პასპორტი, მაგალითად, რუსებსა და ბრიტანელებს. ოვონიკოკოს მოქალექოება კი მგონი პირველი შემთხვევა
დეკლარირებულად, ჩვენ რასისტები არ ვართ და კაცმა რომ თქვას, უცხო თვისტომისადმი ბოღმა ქართულ მენტალიტეტს ნაკლებად ახასიათებს. ჩვენი ნაციონალიზმი სულ სხვანაირია.
ოვონიკოკოს ახლა იოლად შეეძლება ევროპაში წასვლა და იქაურ კლუბებში გადასვლის შანსიც უკეთესი ექნება. სხვა საქმეა მისი პერსპექტივა საქართველოს ამა თუ იმ ნაკრებში. მისი სახით ეთნიკურად ქართველ ფეხბხურთელებს საკმაოდ სერიოზული კონკურენტი გამოუჩნდა. ოვონიკოკოს მოედანზე ბევრი შეუძლია, სწრაფი, პლასტიური და მახვილგონიერია, დრიბლინგიც ჩინებული აქვს. მოკლედ, შეუნის გაქართველებამ მორიგი ინტრიგა შემოიტანა.
ოვონიკოკო საქართველოში "გაგრამ" ჩამოიყვანა და ახლახან გაასხვისა "ზესტაფონში". ფეხბურთელთა რეექსპორტი არ უნდა იყოს ცუდი საქმე, თავის დროზე "დინამო თბილისმა" გაბონელი დიდიე ოვონო აიყვანა და მერე წარმატებით გაასხვისა "ლემანში". ოვონო "დინამოს" შავი მარგალიტი იყო, დიდად სასარგებლო, ეფექტურად მოთამაშე მეკარე. კლუბმაც ფული ყველა დასაშვები საშუალებით უნდა იშოვოს და კარგია, თუ ამის რაც შეიძლება მეტი ვარიანტი გამოჩნდება.
საინტერესოა, რა მოჰყვება ოვონიკოკოს გაქართველებას. მე თუ მკითხვათ, "გაგრას" ცენტრფორვარდი ჯონ ჯერემია ოვონიკოკოზე ნაკლები ნამდვილად არ არის და თუ მასაც მოუნდება ქართველობა, უარი რატომ უნდა ეთქვას? მერე ჯერემიაზე არანაკლები აფრიკელიც გამოჩნდება და თუ ამან კონვეირის სახე მიიღო, აფრიკულ სატრანსფერო ბაზარს ვინძლო არაერთი ქართული კლუბი შეესიოს.
საქართველოს ნაკრებს ვერავინ და ვერაფერმა უშველა და იქნებ ნატურალიზებულთაგან გამოვრჩეთ რამეს. ერთი-ორი კარგი აფრიკელი ვის არ გამოსდგომია და ჩვენ რატომ ვერ უნდა ვნახოთ მათგან ხეირი? აგერ, "ნაციონალმანშაფტში" რამდენი არაეთნიკურად გერმანელია თავმოყრილი და ამის გამო ბუნდესნაკრები სამშობლოში ვგონებ, არ ძულთ.
მარჯვნივ ოვონიკო, შუაში ჯერემია, მარცხნივ...საქართველოს ნაკრებს კარგი ცვლა ელის.
* * *
6 თებერვალს რონალდ რეიგანი 101 წლისა მოიყრებოდა. ჩვენთვის ალბათ ეს ახოვანი კაცი იყო ამერიკის საუკეთესო პრეზიდენტი, მან ხომ ის ბოროტების იმპერია დაანგრია, სადაც ჩვენ ვცხოვრობდით. რეიგანის დაბადების დღე იმად გამახსენდა, რომ მან პირველი ხელფასი ამერიკული ფეხბურთიდან აიღო - თითო რადიორეპორტაჟში ათ დოლარს უხდიდნენ.
ქართული ფეხბურთიდან ახლა გაცილებით მეტს იღებენ, ოღონდაც დამანგრეველი ძალის ჯერ არაფერი ჩანს. იქნებ ნატურალიზებულებმა გაგვიმართონ? არ ვიცი, ჯერ მხოლოდ ის ვიცი, რომ ოვონიკოკო აფრიკული ჭირივით იქნება მეტოქე მცველებისთვის.
ეროვნული ჩემპიონატის განახლება კი დიდთოვლობის გამო გადაიდო. გადახალისებულ-გაძლიერებული გუნდები ძაან სანახავები უნდა იყვნენ. სულ სხვანაირი სულმოუთქმელობით ველით ჩემპიონატის დაქოქვას და ეს უკვე ცოტას არ ნიშნავს
ყოველდღიური სპორტული გაზეთი "ლელო"
