სეზონი განახლდა თუ არა, ფოთის "კოლხეთმა" მიჯრით ორი შეხვედრა მოიგო - ჯერ "ვიტ ჯორჯია" დაამარცხა 2:0, მერე კი იგივე ანგარიშით მარტვილის "მერანს" სძლია.ამ ექვსი ქულით "კოლხეთმა" იმდენი შეძლო, რვა საუკეთესო გუნდში მოსახვედრად მებრძოლ კონკურენტებს გადაუსწრო და ამ დროისთვის მე-7 ადგილზეა.
... 22 წლის ილია პავლიაშვილი "კოლხეთში" მიმდინარე სეზონის პირველი ეტაპის დასრულების შემდეგ გადავიდა რუსთავის "მეტალურგიდან". პავლიაშვილი მოძრავი და ტექნიკური შემტევია, გოლის ალღოც არ დაეწუნება, მან გოლი "ვიტ ჯორჯიასაც" გაუტანა და "მერანსაც", ანუ "კოლხეთის" ბოლოდროინდელ წარმატებაში მნიშვნელოვანი წვლილი დაიდო.
-
- ვფიქრობ, ამაში მოულოდნელი არაფერია. მართალია, რომ გუნდი ახლადშექმნილია, მაგრამ ფეხბურთელების უმეტესობა მანამდეც კარგად ვიცნობდით ერთმანეთს და შეთამაშება არ გაგვჭირვებია. ამას ემატება კარგი შეკრება თურქეთში. ყველაფერს რომ თავი დავანებოთ, "კოლხეთი" კარგი ფეხბურთელებით გაძლიერდა და ეს ორი თამაში რომ მოვიგეთ, ლოგიკურია.
- "ვიტ ჯორჯიასთან" მატჩზე გკითხავ - ყველაზე უფრო რის ხარჯზე აჯობეთ მოწინააღმდეგეს?
- "ვიტ ჯორჯია" კარგი გუნდია, ნორმალურად ვითამაშეთ, ისიცაა, რომ იღბალი ჩვენს მხარეს აღმოჩნდა. "კოლხეთში" ახლა საოცარი ერთიანობაა, დაწყებული კლუბის პრეზიდენტიდან, იმ ფეხბურთელებით დამთავრებული, სამატჩო განაცხადში ჯერ რომ ვერ ხვდებიან, ყველანი ერთი სულისკვეთებით ვართ - რვა საუკეთესო გუნდში უნდა მოვხდეთ!
- ახალ გუნდში რა დავალება გაქვს მწვრთნელისგან, კონკრეტულად რას ითხოვენ შენგან?
- "კოლხეთშიც" შემტევი ვარ, ოღონდ უკანდახეული, ფლანგიდან მევალება თამაშის გამწვავება. თავდასხმის ცენტრში ბექა ტუღუში თამაშობს, ძალიან ჭკვიანი და ტექნიკური ფორვარდია, გუნდისთვის დიდი სარგებლობა მოაქვს.
- ორი ტურიც და გაირკვევა რვა საუკეთესო გუნდში მოხვედრილთა სია. "კოლხეთის" პერსპექტივაზე რას იტყოდი?
- ძალიან მნიშვნელოვანია, თუ როგორ ითამაშებენ ჩვენი კონკურენტები, თუმცა ყველაფერი უფრო "კოლხეთზეა" დამოკიდებული - "სიონთან" და "ტორპედოსთან" ოთხი ქულა თუ ავიღეთ, ზედა რვა გუნდში მოხვედრა სავსებით რეალურია.
- საკუთარი თამაშით ალბათ კმაყოფილი ხარ, მოედანს უგოლოდ არ ტოვებ...
- თამაში წამივიდა, "მეტალურგში" სათადარიგოთა სკამზე რომ მიწევდა ყოფნა, ეტყობა ამან ჩემზე კარგად იმოქმედა, მიმართლებს კიდევაც. საერთოდაც, "კოლხეთი" უპირატესობას შემტევ სტილს ანიჭებს და ეს სწორი გადაწყვეტილებაა, ასე უფრო გვიადვილდება თამაში.
- ფოთელი გულშემატკივარი თუ შემობრუნდა "კოლხეთისკენ" ამ ორი მოგების შემდეგ?
- მოგეხსენებათ, ფოთის სტადიონის რეკონსტრუქცია ჯერ არ დასრულებულა, ტრიბუნები ჯერ მზად არ არის და მიდაუხედავად ამისა, "ვიტ ჯორჯიასთან" მატჩზე ათასზე მეტი მაყურებელი მოვიდა. "მერანს" ზუგდიდში ვეთამაშეთ და ფოთიდან ჩვენ საქომაგოდ დაახლოებით ორმოცდაათი გულშემატკივარი წამოვიდა. ყოველივე ეს ცოტა ნამდვილად არ არის, გულშემატკივარი მართლაც გვერდში გვიდგას.
- მიუხედავად ახალგაზრდული ასაკისა, უმაღლესი ლიგის უკვე რამდენიმე გუნდში გაქვს ნათამაშევი. როგორ ფიქრობ, საუკეთესო პერიოდი რომელ გუნდში გქონდა?
- უმაღლეს ლიგაში პირველად "ბორჯომში" ვითამაშე, სეზონის აღმოჩენის ნომინაციაშიც კი მოვხდი, რომელშიც გამოკითხვის შედეგად ვაჟა ნემსაძემ გადამასწრო. "ბორჯომში" გატარებული სეზონი მართლაც დასამახსოვრებელი იყო...
ყოველდღიური სპორტული გაზეთი "ლელო"
