პლეი ოფისა და პლეი აუტის მატჩები 12 მარტს დაიწყება. ფლეი აუტის პირველ ტურში ოზურგეთის "მერცხალი" მცხეთაში "ვიტ ჯორჯიას" უმასპინძლებს."მერცხალის" გენერალური დირექტორი და მთავარი მწვრთნელი ხარიტონ ჩხატარაშვილი გუნდის სამზადისზე მოგვითხრობს.
"ჭიათურის გუნდის სახით სერიოზული კონკურენტი გვყავდა, მაგრამ უმაღლეს ლიგაში გადასასვლელ ტურნირში მონაწილეობის უფლება დაძაბულ ბრძოლაში მოვიპოვეთ.
თუმცა პრობლემა შეგვექმნა - 18 იანვრის შემდეგ მოედანზე არ გვივარჯიშია. ოზურგეთში ისეთი თოვლი იდო, რომ სტადიონი დღემდე ვერ გაიწმინდა. ფაქტობრივად, მოსამზადეებელი ეტაპი ჩაგვივარდა და შეკრებაზეც ვერ წავედით, რადგან საამისოდ ფინანსები არ გვქონდა.
ამის გამო,
ფინანსურად და კადრებით "მერცხალი" ფლეი აუტის 8 მონაწილეს შორის ყველაზე რთულ მდგომარეობაშია. სამწუხაროდ, კერძო ინვესტიციებით არ გვანებივრებენ და მთლიანად ადგილობრივ ბიუჯეტზე ვართ დამოკიდებული. თუმცა რაიონისა და რეგიონის ხელმძღვანელობა დიდ ყურადღებას გვაქცევს.
გურიის გუბერნატორი ვალერი ჩიტაიშვილი ფეხბურთით დაინტერესებულია და შესაძლებლობის მაქსიმუმს აკეთებს, გუნდმა რომ იარსებოს და წარმატებას მიაღწიოს", - ამბობს ჩხატარაშვილი
"მერცხალის" მთავარი მწვრთნელი პლეი აუტის კალენდარმა დააფიქრა:
"თამაშები ისეთი შემჭიდროებული გრაფიკით ჩაატარდება, რომ ჩვენნაირ გუნდებს პრობლემები შეექმნებათ. რა პრობლემებს ვგულისხმობ? არ გვაქვს აღდგენისა და რეაბილიტაციის საშუალებები, რაც მოთამაშეთა გადაღლის საფრთხეს შეგვიქმნის".
თუმცა, ამ ყველაფრის მიუხედავად, ოზურგეთელთა დამრიგებელი იმედოვნებს, რომ "მერცხალი" უმაღლესი ლიგის საგზურისთვის იბრძოლებს:
"ჩვენ ყველა შეხვედრაში ვიბრძოლებთ და შევეცდებით, უმაღლეს ლიგაში წლების წინათ დაკარგული ადგილი დავიბრუნოთ. საკმაოდ ბრძოლისუნარიანი გუნდი გვყავს და ბიჭების მჯერა".
დაბოლოს, ერთი საინტერესო სიახლე - გუნდში ცნობილი ვეტერანი მოთამაშე ჩაირიცხა:
"ვაპირებთ წარმოშობით ოზურგეთელი გია მეგრელაძის დამატებას. მამამისი, მერაბ მეგრელაძე ოზურგეთში დაიბადა და გაიზარდა, ჩვენი მეგობარი იყო. თავად გიამაც დიდ ფეხბურთში პირველი ნაბიჯები "მერცხალში" ჩემი ხელმძღვანელობით გადადგა, ახლა კი ჩვენთან დაიწყო ვარჯიში და მისი დიდი იმედი მაქვს. ასეთი გამოცდილი თავდამსხმელი აუცილებლად გამოგვადგება".
ყოველდღიური სპორტული გაზეთი "ლელო"
