ზამთარს ვინ ჩივის, მარტიც ცივი გამოდგა. ხეხილის ყვავილობამაც დააგვიანა. ჩემს ბაღში ჯერჯერობით მხოლოდ შინდი გაყვავდა. რომ არ ვიცოდე, სად რა ხე დგას, გამოგიტყდებით, გამიჭირდებოდა ყვავილის მიხედვით ხეხილის ცნობა. შემოდგომაზე კი გამოცნობა იოლია: ყველა მცენარე განსხვავებულ (ზომის, ფორმის თუ ფერის მიხედვით) ნაყოფს მოისხამს.
მაგალითად, შინდი ბევრით არ გაიზრდება; სამაგიეროდ, ასეთივე ფორმის მსხალი შინდზე ათჯერ მეტად გასუქდება...
* * *
რა შუაშია ხეხილი და სპორტული გაზეთის გვერდი? - იკითხავთ.
საქართველოში ნოყიერი ნიადაგია არა მხოლოდ ხილის მოსაყვანად, არამედ სპორტსმენში ნიჭის აღმოსაჩენად. ამაში არაერთხელ
შესაძლოა ვინმეს ეგონოს, რომ თითო მატჩში თითო გოლი "დარაჯის ტყვიასავით" გაგვივარდა, მაგრამ ძალიანაც შეცდება - ქართველმა ბიჭებმა დაგვანახეს, რომ არც ესპანელებს ჩამოუვარდებიან და არც ინგლისელებს. რაში? - თუნდაც ბურთის ფლობაში, სისწრაფეში, ტექნიკურობაში, აზროვნებაში, ღონეში.
სასიამოვნო სანახავია ქართველთა თამაში, რომლებსაც ერთი მეტოქის (ესპანელისა თუ ინგლისელისა) მოტყუება იოლად შეუძლიათ. ასეთ სანახაობას თითქოს გადავეჩვიეთ კიდეც...
ერთს უნდა გავუსვათ ხაზი - დღეს არც ესპანეთის 17-წლამდელთა ნაკრებია ჩვენზე უკეთესი და არც ინგლისის. ბრიტანელთა ძლევას სოციალურ ქსელ "ფეისბუქზე" დიდი გამოხმაურება მოჰყვა: მილოცვა, დალოცვა, ამაყი ფრაზები... ერთმა კი შენიშნა:
"საღოლ ბიჭებს, ნეტავ ეგრე განაგრძონ. გავა დრო და ესპანეთის 17-წლამდელთა ნაკრების წევრები "ბარსელონასა" და "რეალის" ფორმას ჩაიცვამენ, ინგლისელები - "მანჩესტერ იუნაიტედისას", ქართველები?.. "
* * *
ისევ ხეხილის თემას მივადექით. როგორც გაზაფხულზე გაყვავებული ხეების ერთმანეთისგან გარჩევაა რთული, ასევე დიდად არ განსხვავდებიან 17 წლის ფეხბურთელები.
მოვა შემოდგომა, 22-23 წლისანი გახდებიან (საქართველოს ნაკრებს ფორმის მორგების დრო დაუდგება). აღმოჩნდება, რომ, ვთქვათ, გერმანელ თანატოლებს კლასით ჩამორჩებიან. არადა, 17 წლისანი ალემანებსაც თანაბრად ეთამაშებოდნენ...
არც ამ ჩამორჩენის მიზეზია რთული საპოვნი. მოწესრიგებულ საფეხბურთო ქვეყნებში "ხეხილის მოვლა" კარგად იციან: აქვთ მაღალტექნოლოგიური დიაგნოსტიკური დანადგარები, რომლებითაც ყოველ ფეხის ნაბიჯზე ამოწმებენ, რამდენად მოსავლიანია მიწა, მოსალოდნელი ხომ არ არის გამოფიტვა; შეწამვლასაც დროულად ასწრებენ, ზედმეტი ჭიაღუის მოსაცილებლად; არც მორწყვას აკლებენ და არც - სასუქს. შემოდგომით კი უხვ მოსავალს იღებენ. მაგალითად, თითო თაობის ახალგაზრდული გუნდიდან ეროვნულ ნაკრებში 2-3 ფეხბურთელი ხვდება. ცხადია, არც დანარჩენები ჩამორჩებიან კლასით და უმაღლეს ლიგებში (ბუნდესლიგა იქნება თუ პრემიერლიგა) მყარად იკიდებენ ფეხს.
რა ხდება საქართველოში? მოდით, ეს კითხვა წარსულ დროში დავსვათ, რადგან ძალიან მინდა, საქართველოს ამჟამინდელი 17-წლამდელთა ნაკრების ფეხბურთელებიც ისევე გაიზარდონ (პროფესიულად), როგორც მათი ესპანელი და ინგლისელი თანატოლები. ამისთვის თითოეულ მათგანს დიდი ყურადღება სჭირდება არა მხოლოდ მწვრთნელებისგან. მათი სათანადოდ აღზრდისთვის არაფერი უნდა დავიშუროთ. თავადაც თავდაუზოგავად უნდა იშრომონ.
მაშ ასე, კითხვა: რა ხდებოდა საქართველოში? სახარბიელო არაფერი - დიდი ხანია ველით ფეხბურთელს, რომელიც ევროპის უმაღლესი დონის ლიგაში გამოჩნდება, მაგრამ ასეთი მხოლოდ ორი გვყავს, ორივე 30 წელს გადაცილებული: კახა კალაძე და ლევან კობიაშვილი.
ბოლო წლებში გამოანათეს ჯანო ანანიძემ, ლევან ყენიამ, მაგრამ ლევანს ტრავმა ძალიან ცუდ დროს მოუვიდა - როცა "შალკეში" ფეხს იკიდებდა. პირველ რიგში, სწორედ მათგან ველით თუნდაც ბუნდესლიგაში თამაშს, სერია A შემდეგ იყოს.
* * *
ამ სტატიაზე მუშაობისას 2002 წლის ფოტოებს მივაგენი. სამწუხაროდ, ისინი ერთგვარად დაშიფრულია, მაგრამ იმდენად ღირებულია, რომ გადავწყვიტე უკლებლივ ყველა შემომეთავაზებინა.
2002-ში საქართველოს 17-წლამდელთა გუნდმა კობა ჟორჟიკაშვილის ხელმძღვანელობით ევროპის ჩემპიონატზე ითამაშა. ჯგუფში ქართველებმა გერმანელ თანატოლებთან 1:1 ითამაშეს და ალემანებთან ერთად მეოთხედფინალშიც გავიდნენ, თუმცა იქ შვეიცარიასთან 0:3 დათმეს.
დღეს სწორედ საქართველო-გერმანიის შეხვედრის ამსახველ ფოტოებს ვაქვეყნებთ. მეტოქის რიგებში თამაშობდნენ რენე ადლერი, მარიო გომესი და ლუკაშ პოდოლსკი. ეს დუეტი სულაც ბუნდესნაკრების მთავარ დამრტყმელ ძალად იქცა.
საქართველოს 2002 წლის 17-წლამდელთა ნაკრებიდან ეროვნულში ზაალ ელიავაც მოხვდა, ალექსანდრე გურულიც, აკაკი ხუბუტიაც, გოჩა ხოჯავაც, მაგრამ პირველ გუნდში ვერ დამკვიდრდნენ. რატომღაც მჯერა, რომ ისინი გერმანელ თანატოლებზე არანაკლებ ნიჭიერები იყვნენ, მაგრამ რაღაც დააკლდათ...
საქართველოს 17-წლამდელთა ნაკრები (2002 წელი)
გერმანიის 17-წლამდელთა ნაკრები
კაპიტნები: დანიელ ციმანი და გოჩა ხოჯავა
ბესო მიქიაშვილი და პოლ ტომიკი
ანზორ კალაძის მაკრატელა
გოლის ავტორი სანდრო იაშვილი
სებასტიან ვესტერჰოფი და მარიო გომესი (16)
ყოველდღიური სპორტული გაზეთი "ლელო"
შინდი გაყვავდა კი არა შინდი აყვავდა:)