ვიტალი დარასელია, დავით ყიფიანი... ძლევამოსილი "დინამოს" შემადგენლობას რამაზ შენგელიაც გამოაკლდა. მე თუ მკითხავთ, ყველაზე ლამაზი, ვარსკვლავური მსოფლიოს ჩემპიონატი 1982 წელს იყო. შენგელია ალან რაფის წინააღმდეგ, გაბითურებული მეკარე და ბურთი ბადეში. შენგელიას ის გოლი გადამწყვეტი აღმოჩნდა, შოტლანიასთან ნათამაშევი 2:2-ით საბჭოთა კავშირის ნაკრები მომდევნო ეტაპზე გავიდა.
ასეთი მეგოლეები იშვიათად იბადებიან, ის, რაც შენგელიას ჰქონდა, ან გაქვს, ან არ გაქვს, ამის ვარჯიშით მიღწევა შეუძლებელია.
ყველაზე დიდი საბჭოთა ვარსკვლავი ალბათ ოლეგ ბლოხინი იყო, შენგელიასაც იმ პერიოდში მოუწია ფეხბურთელობა და იყო არაერთი სეზონი, ბლოხინზე მეტი
გოლის გატანა შენგელიას ხელობა იყო, ოღონდაც ამ საქმეში მაშინ ძალიან ცოტა ფულს უხდიდნენ საბჭოთა ფეხბურთელებს, უცხოურ კლუბებშიც არ უშვებდნენ.
1987 წელს შენგელიამ ოტო რეჰაგელის "ვერდერს" გოლი ბრემენში გაუტანა. ეს შენგელიას ბოლო მნიშვნელოვანი გოლი იყო, ოღონდაც არ ვიცი, სად შეიძლება ამ გოლის კიდევ ერთხელ ნახვა. არადა ასეთი გოლები ყველა თაობას უნდა ჰქონდეს ნანახი.
შენგელიას შეეძლო, წინა ძელთან გასულიყო და თავით ბურთი კარში უცნაურად ჩაეჭრა. ეს მისი ერთ-ერთი საფირმო ილეთი იყო. წლები გავიდა, მაგრამ იგივეს გამკეთებელი ქართველი თავდამსხმელი არ გამოჩნდა.
შენგელიამ კარგად იცოდა, როგორ გახსნილიყო და როგორ ექცია გოლად ყიფიანის ფილიგრანული პასი.
შენგელიამ დიუსელდორფში ვლადიმერ გუცაევს გაატანინა გამთანაბრებელი გოლი. 1982 წელს ბრაზილიასთან საჯარიმო მოედანში წააქციეს და პენალტი არ დანიშნეს...
ის არ იყო ახმახი და არც ძალიან სწრაფი, მაგრამ თავს არავის არ დააჩაგვრინებდა, საგოლე ალღოსა და გოლის გატანის ტექნიკაში ბადალი ძნელად მოეძებნებოდა.
ზოგი ტელეარხის საინფორმაციო გამოშვებისთვის შენგელიას გარდაცვალება არ ყოფილა მთავარი ამბავი, ალბათ იმიტომ, რომ დღეს სხვანაირ გმირებს ეძებენ...
შენგელია კი თხემით ტერფამდე ნამდვილი იყო.
ძალაუფლება საბჭოებს!
საქართველოს ჩემპიონატს პროფლიგა ჩაატარებსო, ასე გამოგვიცხადეს ქართული ფეხბურთის მესვეურებმა და ჩვენც დავუჯერეთ.
გულუბრყვილობა იმათაც გამოუვიდათ, პროფლიგის პრეზიდენტის არჩევნებისთვის რომ დაიწყეს მზადება. მერე კი გვითხრეს - არა, ჩემპიონატი ისევ ფედერაციამ უნდა ჩაატაროსო.
ქართულმა საფეხბურთო ელიტამ კიდევ ერთხელ ჩააყენა საკუთარი თავი სასაცილო მდგომარეობაში. კი ბატონო, ამ ყველაფერს უკვე შეჩვეულები ვართ, მაგრამ ამდენი სისულელე უკვალოდ რომ არ ჩაივლის, წყალი არ გაუვა.
პროფლიგის შექმნის იდეა ამჯერადაც არ მოდიოდა კლუბებიდან, წინა სეზონი სამარცხვინო რომ გამოდგა, პროფლიგის თემა თითქოს სიტუაციის დასაშოშმინებლად შემოაგდეს. უარყოფითი მუხტიც თითქოს განელდა და აჰა, ჩემპიონატი ისევ ფედერაციის იქნებაო.
კლუბებს საპრიზო ფონდს პირდებიან - ორი მილიონი ლარი ქუჩაში არ ყრია და ფედერაცია ამ თანხას სავარაუდოდ სახელმწიფოსგან მოინაგრებსო. ორი მილიონი თავისუფლების ნაცვლად, ორი მილიონი და მართვის ისევ მონოპოლიური სტილი.
ბიუჯეტი მსაჯებსაც გამოუყვეს - ერთი მილიონი ლარი, არც ესაა პატარა საქმე.
ასეა თუ ისე, ფული რომ მოდის, წარმატებაც თან უნდა მოჰყვეს. ამ სამი მილიონის შოვნა პროფლიგასაც შეეძლო თუ, რა თქმა უნდა, სახელმწიფო პროფლიგის მიმართაც იქნებოდა გულუხვი.
ეს მილიონები ტელეტრანსლაციებიდან და სპონსორული შემოსავლებიდან რომ მოდიოდეს, მყის გააპიარებდნენ. ეს რომ კერძო ინვესტიცია იყოს, კლუბებს ჯერ პროფლიგისკენ არ უბიძგებდნენ და მერე ისევ აქეთ არ წამოიყვანდნენ. კლუბებს აქეთ-იქეთ სულ სხვა ხელი ათამაშებს და ჩნდება კითხვა, სად გაქრა თავმოყვარეობა?
ჰო, მართლა - უმაღლესი ლიგის კლუბების საკონსულტაციო საბჭო შეიქმნება და კარგადაც მოუხდებოდა დროში გამობრძმედილი სლოგანი: ძალაუფლება საბჭოებს!
სხვა რა გითხრათ, რუსეთი ევროპის ჩემპიონატიდან კი გავარდა, მაგრამ იქაური მედია არ შერცხვა, "მოსკოვკი კომსომოლეცმა" პირველ გვერდზე ნაკრებელთა ფოტოს მყვირალა სათაურიც უთავაზა: Уроды!!!
და, საითკენ მივდივართ ჩვენ?
ყოველდღიური სპორტული გაზეთი "ლელო"
ასევე იხილეთ:
რამაზ შენგელიას გოლები
რამაზ შენგელიას გარდაცვალებას რუსული მედია ეხმაურება
