"გაგრა" მიხეილ კობერიძეს დაემშვიდობა - ნახევარმცველი უახლოეს 6 თვეს ფოთის "კოლხეთში" ითამაშებს. 25 წლის ფეხბურთელს "გაგრასთან" კონტრაქტი 31 დეკემბრამდე აკავშირებდა, მაგრამ კლუბის პრესატაშე მიხეილ აფხაზავას თქმით, კონტრაქტი ორმხრივი სურვილისა და შეთანხმების საფუძველზე შეწყდა.
"გუნდს უკვე დავემშვიდობე. ფოთიდან სპეციალურად ჩამოვედი, გუნდის ხელმძღვანელობას, მწვრთნელებსა და ფეხბურთელებს რომ დავმშვიდობებოდი.
დიდი მადლობა ყველა იმ ადამიანს, რომელიც ამ გუნდში მუშაობს. ბედნიერი ვარ, "გაგრაში" ორი წლის მანძილზე რომ ვთამაშობდი. ამ გუნდში გავხდი საქართველოს თასის მფლობელი და მისი წარმატება გამიხარდება და ყოველთვის "გაგრას" გულშემატკივარი ვიქნები", - ამბობს
ამასობაში საქართველოს 19-წლამდელთა ნაკრების მთავარმა მწვრთნელმა კახა კაჭარავამ ორი გაგრელი გამოიძახა - გიორგი გადრანი და ნიკა ნარმანია. ამ უკანასკნელმა რამდენიმე შეხვედრა ძირითადი გუნდის შემადგენლობაშიც ჩაატარა. გადრანი კი ახალი სახეა, "გაგრაში" იანვრიდან ირიცხება და მეორე გუნდის შემადგენლობაში თამაშობდა, მაგრამ მოსამზადებელ ეტაპზე მთავარი მწვრთნელის, ზვიად ჯელაძის
გადაწყვეტილებით, პირველ გუნდთან ერთად ემზადება და მწვრთნელი მისით კმაყოფილია.
ორივე 19-წლამდელთა ნაკრებში ვარჯიშობდა, გუნდს კი 10 ივლისს შეუერთდა.
"გაგრამ" მორიგი საკონტროლო შეხვედრა თბილისში, "მერანის" სტადიონზე პირველლიგელ "აეტთან" ჩაატარა და დიდი ანგარიშით გაიმარჯვა - 4:0. გაგრელთაგან თავი გამოიჩინეს ივანიშვილმა, ხუციძემ, ტყეშელაშვილმა და ჯერემიამ.
შეხვედრა საკმაოდ უხეშად მიმდინარეობდა, რის გამოც მცირე ტრავმები მიიღეს გაგრელთა მოთამაშეებმა, როსტიაშვილმა და ხოჯაშვილმა.
"გაგრამ" ბოლო საკონტროლო შეხვედრა ბოლნისის "სიონთან" ჩაატარა და 3:1 გაიმარჯვა. გოლები ჯერემიამ (2) და ბენჯამინ ტეიდმა გაიტანეს, ბოლნისელთაგან თავი კი გიორგი ჭანკოტაძემ გამოიჩინა.
ყოველდღიური სპორტული გაზეთი "ლელო"
