28 იანვარს სასტუმრო "თორის" საპრესკონფერენციო დარბაზში შედგა "დილას" ახალი მთავარი მწვრთნელის, ვალდას ივანაუსკასის ჟურნალისტებისთვის წარდგენა. შემოგთავაზებთ ლიტველი სპეციალისტის ინტერვიუს:ვალდას ივანაუსკასი: მოგესალმებით. სასიამოვნოა, რომ პირველ პრესკონფერენციას ვატარებ და მიხარია, რომ ამ ქვეყანაში ვარ და ძველი მეგობრების ნახვის საშუალება მეძლევა, რომლებიც სსრკ-ში გამოდიოდნენ.
სასიამოვნოა, რომ ასეთ გუნდში ვიმუშავებ, რომელიც ჩემპიონობისთვის ბრძოლაში ერთ-ერთია. მე საქართველოს ფეხბურთს, ავად თუ კარგად, უკვე ვიცნობ, მის შესახებ ინფორმაციას საზღვარგარეთ გავეცანი.
27 იანვარს ამხანაგური მატჩი ვითამაშეთ. გამოიკვეთა, რომ გუნდი საკმაოდ კარგად გამოიყურება, თუმცა სავარჯიშო გეგმას ცოტა ჩამოვრჩებით.
ყველაფერი ჩვენს ხელშია და ბევრი რამ ჩვენზეა დამოკიდებული, თუმცა მთავარი მაინც ფეხბურთელებია, რომლებმაც უნდა მიგვაღწევინონ დიდ წარმატებებს.
უნდა მოვემზადოთ 22 თებერვლის სუპერთასისთვის და წინ დიდი სამუშაო გველის. აქვე, მადლობა მინდა გადავუხადო კლუბის ყველა თანამშრომელს გაწეული სამუშაოსთვის, რომლებიც ყველაფერს აკეთებენ, რომ კლუბმა წარმატებას მიაღწიოს.
- რამდენხნიანი კონტრაქტი გააფორმეთ გუნდთან?
- გუნდთან ექვსთვიანი კონტრაქტი გავაფორმე გაგრძელების პერსპექტივით. იმედი მაქვს, რომ წარმატებას მივაღწევთ და ჩვენი თანამშრომლობაც გაგრძელდება.
- კლუბში ვინ დაგეხმარებათ?
- მე აქ დამხვდნენ მწვრთნელები, რომლებიც ჩემს ჩამოსვლამდე ხელმძღვანელობდნენ გუნდს. თურქეთში შეკრების დროს შემოგვიერთდება ფიზ-მომზადების გერმანელი სპეციალისტი.
* * *
მწვრთნელთან ერთად, რამოდენიმე შეკითხვას უპასუხა დავით კვირკველიამაც.
- დავით გოგუას შესახებ რას გვეტყვით?
- თუ გოგუა დაბრუნდება, ჩვენთვის ძალიან კარგი იქნება, თუმცა მას თავისი მიზნები აქვს და სხვა გუნდში გადასვლას აპირებს, თუმცა ვიმეორებ, რომ თუ დარჩება, ჩვენ მხოლოდ მოხარულები ვიქნებით ამით.
- ცვლილებების შესახებ რას გვეტყვით?
- რა თქმა უნდა, გამოცდილი ფეხბურთელების წასვლა გუნდიდან არ იყო კარგი, რადგან ისინი დიდ ძალას წარმოადგენდნენ ჩვენთვის, თუმცა გუნდი სხვა ფეხბურთელებით შეივსო და ამ მხრივ პრობლემები არ უნდა იყოს.
"დილა" 29 იანვარს, გამთენიისას, გეზს თურქეთისკენ აიღებს. გუნდი ბელეკში 29 იანვრიდან 12 თებერვლამდე დაჰყოფს, სადაც გამართავს რამდენიმე ამხანაგურ შეხვედრას. მეტოქეების შესახებ ზუსტი ინფორმაცია მოგვიანებით გახდება ცნობილი.
fcdila.ge
