ფეხბურთის ფედერაციამ ახალი ჟურნალი, Number One გამოსცა

საქართველოს ფეხბურთის ფედერაციისთვის საგამომცემლო საქმიანობა უცხო არ არის, თუმცა კარგა ხანს ამ მიმართულებით მუშაობა გაჩერებული იყო. ფედერაციის პირველი გამოცემა - გაზეთი "ქართული ფეხბურთი" - გეხსომებათ, რომელიც ქომაგთა შორის პოპულარობით სარგებლობდა და თითქმის 8 წლის განმავლობაში გამოიცემოდა.

"ქართული ფეხბურთის" გამოცემა რომ შეწყდა, ფედერაციაში მერაბ ჟორდანიას მმართველობის პერიოდში, იმავე სახელწოდებით, ბიულეტენი იბეჭდებოდა, რომელიც თვეში ერთხელ გამოდიოდა და მკითხველს ბევრ საინტერესო ინფორმაციას სთავაზობდა.

ჟორდანიას პრეზიდენტობას ფედერაციის საგამომცემლო საქმიანობაც გაჰყვა, თუმცა... აგერ, ახლა ფედერაციაში ეს ხელობა გაიხსენეს და ქართულ საფეხბურთო სამყაროს ახალი ჟურნალი, Number One შესთავაზეს.

პრეზენტაცია, რომელსაც "ქასიმფაშას" მწვრთნელი შოთა არველაძეც ესწრებოდა, მიხეილ მესხის სახელობის სტადიონის მედიაცენტრში შედგა.

"ფეხბურთის ფედერაციის ახალი გამოცემა ერთგვარი სოციალური პროექტია. ის არ გაიყიდება და საფეხბურთო სამყაროში უფასოდ გავრცელდება", - თქვა Number One-ის რედაქტორმა, ჩვენმა კოლეგა დავით თავართქილაძემ.

ჟურნალის სახელწოდება, ცხადია, ჰაერიდან მოტანილი არ არის, ფეხბურთი ხომ სპორტის ნომერ პირველ სახეობადაა აღიარებული. წარმატებები კოლეგებს!..

ყოველდღიური სპორტული გაზეთი "ლელო"