- ზვიად სიჭინავას პრეზიდენტობის არასრული ვადა დასრულდა - მის საქმიანობას როგორ შეაფასებთ?
- სიჭინავას საქმის გასაკეთებლად ძალიან მცირე დრო ჰქონდა. მისი პრეზიდენტობის დროს ფედერაციის ნორმალურ მუშაობას ხელს ძველი ვალები უშლიდა. ვალები დაახლოებით 19 მილიონ ლარს შეადგენდა. სიჭინავამ ვალების გასტუმრება მოახერხა და ამით ფედერაციას ნორმალური მუშაობისკენ გაუხსნა გზა. ჩემი აზრით, ეს
ვფიქრობ, 2010 წელს ასაკობრივმა და ეროვნულმა ნაკრებებმაც რიგიანი შედეგი აჩვენეს. ყველაფრის გათვალისწინებით, სიჭნავას საქმიანობა დამაკმაყოფილებელად შეიძლება შეფასდეს.
- ბევრი დღემდე მიიჩნევს, რომ ფედერაციიდან სიჭინავაზე ნაწყენი წახვედით, ასე რომ, თქვენი შეფასება მოულოდნელია.
- მე ჩასაფრებული ადამიანი არ ვარ, სხვისი წარმატება არ მწყინს და წარუმატებლობა არ მახარებს. ახალკაცის პოლიტიკა ჩემთვის მიუღებელი იყო, მაგრამ ჯიბრში მასაც არ ჩავდგომივარ. პირიქით, თუ რაიმე კარგს აკეთებდა, მიხაროდა. ჯიბრში დგომა და წარუმატებლობის მოლოდინი ბოღმიანი ადამიანებისთვის გადამილოცია.
კაცი კარგს რომ გააკეთებს, უნდა დავინახოთ და ვაღიაროთ. ეს მისთვის დიდი სტიმული იქნება. რა თქმა უნდა, პრობლემები იყო და არის, ბევრი რამ ვერ გაკეთდა, მაგრამ, ვიმეორებ - უდიდეს ვალებში ჩავარდნილი ორგანიზაცია სრულყოფილად ვერც იმუშავებდა. ყველამ წარმოიდგინოს საკუთარი თავი ფედერაციის ამჟამინდელი პრეზიდენტის როლში - ვალებიც უნდა ისტუმრო და პარალელურ რეჟიმში ორგანიზაციის ნორმალური საქმიანობა უზრუნველყო. ეს თითქმის შეუძლებელია და ვალების გასტუმრებაზე ამხელა ყურადღებას ამიტომ ვამახვილებ.
მთავარია, რომ ახალი საპრეზიდენტო ვადისთვის ვალები გასტუმრებული იქნება და ვისაც აირჩევენ, მას შემოქმედებითი მუშაობის საშუალება მიეცემა.
- შემოქმედებით საქმიანობაში რას გულისხმობთ?
- ბავშვთა ფეხბურთში გასატარებელ რეფორმებს, რაც ჰაერივით გვჭირდება. ეს არის ფეხბურთის საფუძველი, რომელიც ახლა უნდა ჩაიყაროს, თორემ აქამდე აშენებული ქართული ფეხბურთის სახლი უკვე ძირმომპალი და უვარგისია. ვნახოთ, რა პოლიტიკას გაატარებს ახალარჩეული პრეზიდენტი.
- საპრეზიდენტო არჩევნებში სიჭინავას შანსს როგორ აფასებთ - უკვე გამარჯვებულია?
- ეჭვი არ მეპარება, რომ აირჩევენ და ფედერაციას სრული ოთხი წლით უთავკაცებს. მერე გამოჩნდება, რეალურად რისი გამკეთებელია.
- საერთოდ, 2010 წელი როგორი იყო ქართული ფეხბურთისთვის?
- ადგილი არ გვიტკეპნია და მიმაჩნია, რომ ერთი ნაბიჯით წავიწიეთ. მთავარია, ვალები აღარ იყოს და დანარჩენს მოევლება. თუმცა ეს სურათი ეროვნული ნაკრების დამსახურებაა. თემურ ქეცბაიამ საქმეს მშვენივრად გაართვა თავი და მთელი წელი არ წაგვიგია. 2009 წლის და მანამდელი სამარცხვინო შედეგების შემდეგ, საქართველოს ნაკრებისთვის ჯგუფში მესამე ადგილი მშვენიერი შედეგია. თუმცა ილუზიებს ნუ მივეცემით, წლების განმავლობაში ბევრი მოუგვარებელი პრობლემა დაგვიგროვდა, ნაკრების წაუგებლობა კი მათ მოგვარებას არ ნიშნავს.
- თბილისის საკრებულოს წევრი ხართ და გეცოდინებათ - რეალურია, თითქოს თბილისში სპორტულ ობიექტებს გადასახადები უმცირდებათ?
- არა მგონია, ასე მოხდეს. ჯერ ერთი, ეს პარლამენტის გადასაწყვეტია და მეორეც, მხოლოდ ერთი ქალაქისთვის საგადასახადო შეღავათს არ დააწესებენ.
- თქვენი აზრით, ფეხბურთს რა სახის საკანონმდებლო ცვლილება წაადგება?
- უამრავი საკითხია მოსაგვარებელი და სიმართლე გითხრათ, ძნელია მათი პირველ და მეორეხარისხოვნად დაყოფა. ფეხბურთში წვრილმანი არ არსებობს. თუმცა მე აბსოლუტურად ვეთანხმები სპორტისა და ახალგაზრდობის საქმეთა მინისტრ ლადო ვარძელაშვილს, რომ სახელმწიფოს გადასახედიდან წყლის, ქონებისა და მიწის გადასახადების შემცირება მხოლოდ ერთ სფეროში მიუღებელია. ამას შემდეგ სხვა სფეროების წარმომადგენლები მოითხოვენ. მეორე მხრივ, შესაძლოა, სახელმწიფომ რომელიმე სფერო პრიორიტეტულად დასახოს და ეს ხარჯი საკუთარ თავზე აიღოს, მაგრამ გადასახადიდან ვერავის გაათავისუფლებს.
ბავშვთა ფეხბურთი ვახსენე - ჩემი აზრით, ლიცენზირებული სკოლები ინვენტარით მაინც უნდა მომარაგდეს, რაც არალიცენზირებულებისთვის სტიმული გახდება და ლიცენზიის მოპოვებას შეეცდებიან. საფეხბურთო სკოლები ელემენტარულ დახმარებას საჭიროებს, თორემ ბავშვებს ბევრგან ნორმალურ სავარჯიშო პირობებსაც ვერ უქმნიან. ბევრს ჰგონია, რომ თბილისში ნორმალური ვითარებაა, მაგრამ ასე არ არის, სკოლებს დედაქალაქშიც ძალიან უჭირს. წარმოიგდგინეთ, რა იქნება რეგიონებში, სადაც ბევრად მწირი პირობებია.
სკოლებს დახმარება უცხოურ ტურნირებზე მივლინებაშიც სჭირდება. ბავშვები იზრდებიან ტურნირებში, მხოლოდ ვარჯიში საკმარისი არ არის. თანატოლ უცხოელებთან გაჯიბრებით ხედავ საკუთარ დადებით და უარყოფით მხარეებს და ნაკლის გამოსწორებას ცდილობ. მოკლედ, ბევრი პრობლემაა მოსაგვარებელი და ერთ ინტერვიუში თემას ვერ ამოვწურავთ.
