ზუსტად 10 წლის წინ ახლად დაარსებულმა პროფესიული ფეხბურთის ლიგამ უხარისხო მოედნებზე უმაღლესი ლიგის მატჩების ჩატარება აკრძალა და ყანად ქცეული არენების მოწესრიგება მოითხოვა. ავლაბრის, ზესტაფონისა და ეროვნულ სტადიონებზე საფარის შეცვლა სწორედ მაშინ დაიწყო და უხარისხო მოედნებზე თამაშს შეჩვეული ფეხბურთელები თავს ისე გრძნობდნენ, როგორც ბედუინები - ოაზისში.თანამოაზრეებთან ერთად, ეს პროექტები ლევან ცხოვრებაშვილის კომპანიამ განახორციელა და სეზონის შემაჯამებელ გალა-საღამო "დეაზე" პროფლიგის საგანგებო პრიზიც დაიმსახურა.
თუმცა მას შემდეგ ბევრმა წყალმა ჩაიარა და ცხოვრებაშვილის თავზე ერთი, წისქვილის ქვა არ დატრიალებულა - დააკავეს და, ფაქტობრივად,
"ადრე კომპანია "გეოგრასს" ვხელმძღვანელობდი, რომელმაც მნიშვნელოვანი პროექტები განახორციელა. ამ საქმეში პიონერები ვიყავით და საქართველოში მოედნის საფარის მეურნეობის ჩამოყალიბებას ვცდილობდი. პროფლიგიდან მხარდაჭერა მქონდა და ვგრძნობდი, რომ საჭირო საქმეს ვაკეთებდი.
მრავალი ობიექტი ავიღეთ და მოედნების მოწესრიგებაში მნიშვნელოვანი პროგრესიც გამოჩნდა.
მაგრამ მერე ყველაფერი აირია, ციხეში გამოგონილი ბრალდებით ჩამსვეს და აწყობილი საქმე გამინადგურეს. გათავისუფლების შემდეგ კომპანია "ალენი" ჩამოვაყალიბე, რომელიც იმავე მიმართულებით საქმიანობდა - მოედნების დაგება, სტადიონების დაპროექტება და მშენებლობა. უფრო სწორად, ვცდილობ, მაგრამ ვერ ვსაქმიანობ, რადგან ბარიერად გადაგვექცა გაუგებარი კანონმდებლობა. რულონური გაზონების წარმოება ამიკრძალეს და წელიწადზე მეტია, ფაქტობრივად, ხელოვნურად გამაჩერეს", - ამბობს ცხოვრებაშვილი და პრობლემის მიზეზსაც ასახელებს:
"რულონური გაზონები სოფლის მეურნეობის პროდუქტს განეკუთვება და იგივე კოდი აქვს მინიჭებული, რაც ბოსტნეულს. ჩვენი საქმიანობის შეჩერების მიზეზი ახალი კანონი გახდა, რომელიც შარშან, 1-ელ იანვარს ამოქმედდა და ჩემს 13-წლიან საქმიანობას, ფაქტობრივად, წერტილი დაუსვა.
კანონმდებლობაში წერია - ანგარების მიზნით, მიწის ნაყოფიერი ფენის მოხსნა და რეალიზაცია აკრძალულია, რადგან ბალახის მოჭრის დროს ნაყოფიერ გრუნტს ვაზიანებთ. ამის გამო შემაჩერეს, მერე ჯარიმაც დამაკისრეს და არ ვიცი, რა ვქნა".
ცხოვრებაშვილის თქმით, თუ კანონმდებლობა არ მოწესრიგდება, საქართველოში ეს სფერო ჩაკვდება:
"ნიადაგს ბოსტნეული უფრო აზიანებს, გაზონი კი, პირიქით - ერთი წლის განმავლობაში 1,5-2 ტონამდე ჰუმუსს გამოიმუშავებს. დავუშვათ, მართლები არიან - სოფელში მოსავალს რომ იღებენ, მიწა მაშინაც ზიანდება და ამ ლოგიკით ისე გამოდის, რომ გლეხებს პროდუქტების მოყვანა და გასაღება უნდა ავუკრძალოთ?
მთელ მსოფლიოში მოედნების მეურნეობა ასეა მოწყობილი და მაინტერესებს, ისინი საკუთარ ქვეყანაზე ნაკლებად ზრუნავენ? ყველაზე საინტერესო ის არის, რომ იმავე საქმიანობას საქართველოში სხვები უპრობლემოდ ეწევიან და ვიკითხე, რას მერჩით-მეთქი?! რა რაოდენობის საფარიც დაგვრჩა, იმის რეალიზაციის უფლებას მოგცემთო, მითხრეს. მაგრამ აბსურდული რეგულაციები შემდეგ მაინც შეგვეხება. ბოლოს პირდაპირ გვითხრეს - არ იმუშავებთო.
წინა მთავრობამ ციხეში გამიშვა, ახლა გამაჩერეს და ვერ ვხვდები, რას მერჩიან?! ასეთი გამოუვალი მდგომარეობის გამო ოთხი კომპანია ასოციაციაში გავერთიანდით - ჩვენი უფლებებისთვის ბრძოლას ვაპირებთ. მაგრამ დღემდე გონივრული პასუხი ვერ მივიღეთ.
ფაქტია, ამ შეზღუდვებით საქართველოში მხოლოდ უცხოეთიდან შემოტანილი პროდუქტი თუ გასაღდება, ჩვენი მოედნების მეურნეობები კი ჩაკვდება".
(იბეჭდება მცირე ცვლილებით)
ყოველდღიური სპორტული გაზეთი "ლელო"
