იმასაც შეგახსენებთ, რომ ევროთასების მონაწილე ოთხი ქართული კლუბი (ოლიმპი, ვიტ ჯორჯია, დინამო, ზესტაფონი) საქართველოს თასის მეთექვსმეტედფინალისგან თავისუფლები არიან და ბრძოლაში მერვედფინალიდან ჩაერთვებიან. მეთექვსმეტედფინალური ეტაპი დღეს ხუთი
იმერეთი-ბაია 0:1
გოლი: 0:1 შ. ლომია (21. პენ.)
ხონის "იმერეთის" ხელმმძღვანელობის თხოვნითა და პროფესიული ფეხბურთის ლიგისა და "ბაიას" ნებართვით, მატჩი არა ხონში, არამედ ზუგდიდში, "ბაიას" ბაზაზე ჩატარდა. ამის მიზეზი ხონის სტადიონის არასახარბიელო მდგომარეობა იყო. "იმერეთმა" უმაღლესლიგელ მეტოქეს დიდი წინააღმდეგობა გაუწია და დაძაბულ ბრძოლაში დამარცხდა. "ბაიას" თავკაცმა ელგუჯა ქომეთიანმა მოედანზე ექსპერიმენტული შემადგენლობა გაიყვანა და გუნდის თამაშის ხარისხითა და შემართებით უკმაყოფილო დარჩა - როგორც ჩანს, "ბაიას" ფეხბურთელებმა იფიქრეს, რომ იმერულ ბარიერს იოლად გადალახავდნენ. საბოლოოდ, ზუგდიდელებმა მიზანს მაინც მიაღწიეს. "ბაიას" დაუბრუნდა გამოცდილი როინ ონიანი, რომელიც ეროვნული ჩემპიონატის პირველ ტურში გაძევების გამო დისკვალიფიცია მოიხადა.
მერცხალი-ტორპედო 0:4
გოლები: 0:1 გ. დათუნაიშვილი (48), 0:2 ჩიკვილაძე (61), 0:3 ცნობილაძე (72), 0:4 თარხნიშვილი (86)
"ტორპედოს" მთავარმა მწვრთნელმა ნესტორ მუმლაძემ იმ შემადგენლობაში, რომელსაც ეროვნული ჩემპიონატის საწყის ტურებში ენდო, მხოლოდ მინიმალური ცვლილებები განახორციელა. ოზურგეთში ქუთაისელებმა თავიდანვე კი მიაღწიეს სათამაშო და ტერიტორიულ უპირატესობას, მაგრამ პირველ ტაიმში რამდენიმე ხელსაყრელი საგოლე შესაძლებლობა ვერ გამოიყენეს და გუნდები შესვენებაზე უგოლოდ გავიდნენ. მატჩის მეორე ნახევარში კი "ტორპედომ" მაინც შეძლო მოწინააღმდეგის გატეხვა და დამაჯერებლად გამარჯვება.
ზოოვეტი-სიონი 0:2
გოლები: 0:1 ლ. ნოზაძე (18), 0:2 ვ. უგრეხელიძე (40)
"სიონმა" საქმეს თავიდანვე ენერგიულად მოჰკიდა ხელი და საკუთარი უპირატესობის დამტკიცება არ გასჭირვებია. "ზოოვეტმა" ბოლნისურ გუნდს მაქსიმალური წინააღმდეგობა გაუწია და თავი ნამდვილად არ შეურცხვენია, მაგრამ კლასთა შორის სხვაობამ მაინც თავისი გაიტანა და მერვედფინალის საგზური "სიონმა" მოიპოვა. ბოლნისელებმა ოპტიმალურთან მიახლოებული შემადგენლობით ითამაშეს.
სამგურალი-მერანი (მ) 0:2
გოლები: 0:1 მაუგნინი (41), 0:2 ლ. კუჭუხიძე (78)
მარტვილის "მერანმა", რომელმაც საქართველოს თასის წინა გათამაშებაში ნახევარფინალამდე მიაღწია, წლევანდელი ტურნირის პირველი ეტაპი უპრობლემოდ დაძლია. როგორც ხედავთ, "მერანის" გამარჯვებას სათავე ლეგიონერმა დაუდო – პირველი გოლი კოტდივუარელი ტაპე მაუგნინის ანგარიშზეა.
ჭიათურა-სამტრედია 1:6
გუშინ ყველაზე სოლიდურად "სამტრედიამ" გაიმარჯვა. იმერულ დერბიში გელა სანაიას გუნდმა რამდენიმე წამყვანი ფეხბურთელის გარეშეც კი შეძლო მეტოქის განადგურება. სამტრედიელთა შემადგენლობიდან დუბლი შეასრულეს ჩომახიძემ და კაკალაძემ, თითო გოლი კი ტყემალაძემ და ბაკურაძემ გაიტანეს. აღშანიშნავია, რომ "ჭიათურა" "სამტრედიას" თავიდან დიდ წინააღმდეგობას უწევდა და ანგარიშიც გაუთანაბრა, მასპინძელთა ასეთი მარცხი კი იმანაც განაპირობა, რომ თამაშის მსვლელობისას "ჭიათურას" ორი ფეხბურთელი გაუძევეს.
ნორჩი დინამოელი-გაგრა 1:3
მეტოქეთა დონეებს შორის სხვაობა აქაც ნათელი იყო. "გაგრა" კვანტალიანისა და უკრაინელი ლეგიონერის, ოდინსკის გოლებით დაწინაურდა, თუმდა პირველი ტაიმის მიწურულს "ნორჩმა დინამოელმა" ერთი ბურთი გაქვითა და გამარჯვების შანსი შეინარჩუნა. შეხვედრის მეორე ნახევარში "გაგრამ" მოწინააღმდეგეს გასაქანი აღარ მისცა და ოვონიკოკოს გოლით საბოლოო ანგარიში დააფიქსირა.
გორი-ლოკომოტივი 0:0 (პ. 3:4)
გორში გამართული მატჩის ვერც ძირითადმა და ვერც დამატებითმა დრომ გამარჯვებული ვერ გამოავლინა, თერთმეტმეტრიანის სერიაში კი უფრო ზუსტნი უმაღლესიდან პირველ ლიგაში დაქვეითებული "ლოკომოტივის" ფეხბურთელები აღმოჩდნენ.
დღეს, 16:30
ადელი (ბ)-კოლხეთი (ფ)
სქური-გურია
მეშახტე-ჩიხურა
კოლხეთი (ხ)-ბათუმი
ივერია-სპარტაკი (ცხ)
ყოველდღიური სპორტული გაზეთი "ლელო"
