ჟოზე მოურინიომ "რეალში" მოღვაწეობის პირველსავე სეზონში შეძლო ტიტულის მოპოვება, თან ეს მან უპრინციპულესი მეტოქის, "ბარსელონას" დამარცხებით შეძლო - "კოპა დელ რეის" ფინალის პირველი დამატებითი ტაიმის მუწურულს ანხელ დი მარიას ჩამოწოდებულს პორტუგალიელი კრიშტიანო რონალდო თავით გამოეხმაურა და ხოსე პინტოს გაუტანა - ეს გოლი ერთადერთი აღმოჩნდა ამ შეხვედრაში, რომელიც "ელ კლასიკოების" საგაზაფხულო კვარტეტის მეორე სერია იყო. პირველი სისხლიც ამ თამაშში დაიღვარა - მართალია, მოურინიომ თითქმის წააგო ერთი ტიტული (პრიმერადივიზიონის ჩემპიონობა) ხოსეპ გვარდიოლასთან, მაგრამ მეორე (სამეფო თასი) კი მოუგო, ჯერი მესამე ტიტულისთვის ბრძოლაზეა
გადაჭედილი "მესტალია" ორ ბანაკად იყო გაყოფილი, ჩრდილოეთის ტრიბუნაზე "ბარსას" ფანები ისხდნენ სამხრეთში კი - "რეალის". შემადგენლობებში სიურპრიზები არ ყოფილა, როგორც დავწერეთ ზუსტად ისე გამოვიდნენ გუნდები სათამაშოდ, არ იყო მხოლოდ კარლეს პუიოლი, რომელმაც, როგორც ჩანს, მაინც ვერ მოასწრო გამოჯანმრთელება, მის ნაცვლად დაცვაში ხავიერ მასკერანომ ითამაშა.
თუკი პირველი ტაიმი თანაბარი იყო და "სამეფო კლუბი" უფრო მწვავედ "იკბინებოდა" ("ლოს ბლანკოსმა" ერთხელ ძელსაც გაარტყა ბურთი), მეორეში "ბარსელონას" სათამაშო უპირატესობა აშკარა იყო. იმ დღეს ბრწყინვალედ მოთამაშე პედრომ გოლიც კი გაიტანა, მაგრამ მსაჯმა საკმაოდ საკამათო გადაწყვეტილება მიიღო და თამაშგარე მდგომარეობა დააფიქსირა.
"რეალს" კიდევ ერთხელ პირველი დამატებითი ტაიმის ბოლოს გაუჭირდა, როცა ანგარიში წაიყვანა, "ბარსელონამ" ნამდვილი შტურმი მოაწყო, რასაც ვერ ვიტყვით მეორე დამეტებით ტაიმზე, რომელშიც რონალდოს კიდევ ერთი გოლის გატანა მართებდა.
რონალდო (რეალი): "ჩვენთვის ეს ძალზე მნიშვნელოვანი ტიტულია. მიხარია, რომ გოლი, რომელსაც ასე შევნატროდით, მე გავიტანე, თანაც "ბარსას" კარში, რომელმაც ასე მაგრად ითამაშა მეორე ტაიმში. ამ მოგებამ დიდი სამსახური გაგვიწია, ჩვენ ახლა ის გუნდი ვართ, რომელსაც გამარჯვებულის ხასიათი აქვს."
ესპანეთი. კოპა დელ რეი. ფინალი
ბარსელონა-რეალი 0:0 (0:1 დ.დ.)
ბარსელონა (4-3-3): პინტო - დანი ალვეში, მასკერანო, პიკე, ადრიანო (120. მაქსველი) - ჩავი, ბუსკეტსი (108. კეიტა), ინიესტა - პედრო, მესი, ვილია (106. აფელაი).
რეალი (4-3-3): კასილიასი - არბელოა, სერხიო რამოსი, რიკარდო კარვალიო (120. გარაი), მარსელო - ხედირა (104. გრანერო), პეპე, ჩაბი ალონსო - იოზილი (70. ადებაიორი), რონალდო, დი მარია.
გოლი: 0:1 რონალდო (103)
გაფრთხილება: ადრიანო, მესი, პედრო - ალონსო, დი მარია, პეპე, ადებაიორი
გაძევება: დი მარია (120)
კუთხური: 12-3; ჯარიმა: 24-26; თამაშგარე: 5-7; კარში დარტყმა: 10-12 (4-6); ბურთის ფლობა: 64%-36%.
მაყურებელი: 55 000.
.
