"ბარსელონამ" სეზონის უკანასკნელი მატჩი "კამპ ნოუზე" უგოლოდ დაასრულა, მაგრამ, არა გვგონია, ეს "ბარსას" ფანებს ანაღვლებდეთ - კვირა საღამოს მატჩის შემდეგ (როცა კატალონიური გრანდი გავარდნის პირას მყოფ "დეპორტივოს" 0:0 დაუზავდა) გუნდმა ლა ლიგის ჩემპიონის თასი ჩაიბარა და სტადიონზე ნამდვილი ფიესტა მოეწყო. შეხვედრა კი საპატიო დერეფნით დაიწყო, სტუმართა გუნდმა ის ჩემპიონს ტიტულის მოპოვებისთვის მოუწყო, თუმცა ამ დერეფანში ერთი-ორმა თუ გაიარა, ვის მხრებზეც გადაიარა მომქანცველმა სეზონმა. ხოსეპ გვარდიოლამ ძალზე გადახალისებული შემადგენლობა ათამაშა გალისიურ კლუბთან. მაგალითისთვის, ჯონათან დოს სანტოსმა მარჯვენა მცველად ითამაშა, დაცვის ცენტრში
მართალია, ეს ის "ბარსა" არ იყო, მაგრამ ბურთის კონტროლი და პასები ისევ მასპინძელთა საკვანძო უპირატესობა იყო, მაგრამ საგოლე შანსები თითქმის არ იქმნებოდა - "დეპორტივოს" 5-კაციანი დაცვის ხაზი ძალზე ფრთხილობდა. გვარდიოლამ ლეო მესი სათადარიგოთა სკამზე დატოვა და ამით "პიჩიჩის" ტიტულისათვის ბრძოლაზე "კაპიტულაცია" გამოაცხადა.
* ვერაფრით გამოიცნობთ, ვინ ითამაშა ამ სეზონში ყველაზე მეტი თამაში "ბარსელონას" მაისურით - სეიდუ კეიტამ! მალელმა ნახევარმცველმა სეზონის 55 ოფიციალურ შეხვედრაში მიიღო მონაწილეობა. თანაც, კლუბის ბოლო 28 მატჩში ის აუცილებლად გადიოდა მოედანზე. სულ "ბარსამ" 60 ოფიციალური მატჩი ითამაშა. გამოდის, რომ აფრიკელმა მხოლოდ 5 გააცდინა.
* ბოიან კრკიჩმა ერთთვიანი იძულებითი შესვენების შემდეგ ითამაშა, მაქსველიც დაუბრუნდა გუნდს ტრავმის მოშუშების შემდეგ.
* 19 წლის საყრდენ ნახევარმცველ ორიოლ რომეუს ლა ლიგაში დებიუტი ჰქონდა. აქამდე მას მხოლოდ ესპანეთის სუპერთასზე აქვს "ბარსას" ძირითად გუნდში ნათამაშები. სეზონში პირველად ითამაშეს ჩემპიონატში ჯონათან დოს სანტოსმა და ბარტრამ.
* "დეპორტივოსთან" თამაშში ყველაზე მეტჯერ ბურთი მეტოქეს ტიაგო ალკანტარამ და ბარტრამ აართვეს - 9-9-ჯერ.
* ამ სეზონში "კამპ ნოუზე" 19 მატჩიდან გუნდმა 10-ში გოლი არ გაუშვა, სულ კი "ბარსას" კარში ამ სტადიონზე 10 გოლი გაიტანეს.
