ლისაბონში მყოფი კრიშტიანო რონალდო "კადენა კოპეს" გაესაუბრა. ინტერვიუში პორტუგალიელმა კატეგორიულად უარყო ხმები მისი "მანჩესტერ სიტიში" ან სხვა რომელიმე კლუბში სავარაუდო გადასვლის შესახებ. 26 წლის რონალდომ გასული სეზონი გაანალიზა და ჟოზე მოურინიო შეაქო. - "რეალმა" ვერც წელს შეძლო ჩემპიონთა ლიგის მოგება, თუმცა კი მიზანთან ახლოს მივიდა...
- მსურს, "რეალთან" ერთად ჩემპიონთა ლიგა მოვიგო, რომელიც გუნდისთვის საიუბილეო, მეათე იქნება. ძალიან კარგად ვიცი, რა ხდებოდა ბოლო სეზონებში მადრიდში და, დარწმუნებული ვარ, რომ მთელი ქალაქი გარეთ გამოვა, თუკი ჩვენ ჩემპიონთა ლიგას მოვიგებთ. მაგრამ არ
- რას ელით მომავალი სეზონისგან?
- დარწმუნებული ვარ, რომ მომავალ სეზონში ბრწყინვალე მოგეგები გველის. ბიჭებს ამაში ეჭვიც არ გვეპარება, ისევე, როგორც ჩვენს მწვრთნელს, რომელიც ყოველ კლუბში, სადაც მოღვაწეობდა, მეორე წელს უფრო დიდ მიზნებს აღწევდა, ვიდრე სადებიუტო სეზონში. სხვათა შორის, ჩემთვისაც მეორე სეზონი "რეალში" გაცილებით ხვავრიელი გამოდგა. გჯეროდეთ, ტიტულები იქნება - ჩვენ იმის პოტენციალიც გვაქვს, რომ ყველა ტურნირი მოვიგოთ, სადაც კი ვითამაშებთ.
- რას იტყვით ჟოზე მოურინიოზე?
- მოურინიომ უკვე დაამტკიცა, რომ საუკეთესოა სხვადასხვა მოწინავე ლიგაში მოღვაწეობით. საუკეთესო სწორედ ისაა, ვინ ამას არაერთხელ დაამტკიცებს. ჩვენს მწვრთნელს ძლიერი ხასიათი აქვს, მისი მენტალიტეტი გამარჯვებული ადამიანისაა. მასთან მუშაობა ძალიან მომწონს და მსურს, რაც შეიძლება დიდ ხანს დარჩეს "რეალში". ეს უკვე ფაქტია, რომელიც ყველამ დაიჯერა - მოუ დიდი პროფესიონალია. მოურინიოსთან ერთად ჩვენ ყველანი კიდევ "გავიზრდებით".
- ბოლო დროს ხშირად გაიგებთ, რონალდო საოცარი ხელფასის სანაცვლოდ "რეალს" დატოვებსო...
- არა, "რეალის" დატოვებას არ ვაპირებ. ყოველ შემთხვევაში, ახლა არა. "რეალი" "ბარსელონას" მადრიდის გამო ვარჩიე, სადაც თავს ბრწყინვალედ ვგრძნობ. ჩემი ნება, რომ იყოს "სამეფო კლუბთან" 10-წლიან კონტრაქტს მოვაწერდი ხელს და კარიერასაც იქ დავასრულებდი. "რეალი" ყოველთვის მომწონდა, "ბარსელონაში" და სხვა კლუბებში გადასვლის შანსი მქონდა, მაგრამ "რეალი" სულ სხვაა. როცა გადაწყვეტილებას ვიღებ, ფული მთავარი არაა.
- "რეალში" ახალი სეზონიდან ახალწვეულები იქნებიან, რას იტყვით მათზე?
- ახალწვეულებს პირადად ძალიან კარგად დავხვდები და მათ ჩემი დახმარების იმედი უნდა ჰქონდეთ. კალეხონმა ლა ლიგა ძალიან კარგად იცის, ხოლო შაჰინი და ალთინთოფი დიდი პოტენციალის ფეხბურთელები არიან.
- ჯერ არ გადაწყვეტილა ადებაიორის საკითხი, თქვენი ნება, რომ იყოს, რას იზამდით?
- ძალიან ვაფასებ ემანუელ ადებაიორს. ის არა მარტო კარგი ფეხბურთელია, არამედ კარგი მეგობარიც. ის და მარსელო გუნდში ხალისის შემომტანნი არიან.
- ამბობენ, "რეალში" შეიძლება აგუერო, ნეიმარი და კოენტრაუ ვიხილოთო, მათზე რას გვეტყვით?
- კუნ აგუერო და ნეიმარი ძალიან კარგი ფეხბურთელები არიან. კუნი უკვე ერთ-ერთი საუკეთესოა მსოფლიოში, ხოლო ნეიმარი მომავალში გახდება მსოფლიო დონის ვარსკვლავი. კოენტრაუზე რა გითხრათ - ის ჩემი მეგობარია და ჩემი აზრით, ახლა პორტუგალიურ ლიგაში მოთამაშე საუკეთესო პორტუგალიელი ფეხბურთელია. ძალიან ამბიციური და მოურინიოს მისი ეს თვისება ყველაზე მეტად მოსწონს. ვფიქრობ, კოენტრაო "რეალის" კარგი შენაძენი იქნება.
