შაჰინს პირველად ყველაფერი შაყირი ეგონა

გუშინ "დიარიო ას-მა" ბუნდესლიგის სეზონის საუკეთესო ფეხბურთელთან და "რეალის" ახალწვეულ ნური შაჰინთან ინტერვიუ შემოგვთავაზა.

- თითქმის ორი თვე გავიდა, რაც "რეალში" თქვენი ტრანსფერი გადაწყდა. ჩამოხვედით მიწაზე, თუ ისევ ღრუბლებში ხართ?
- ოცნება ამიხდა და ახლა "რეალში" თამაშზე უფრო მეტს ვფიქრობ, ვიდრე მაშინ. ახლაც ზღაპარივითაა ის დრო, როცა პირველად გავიგე "რეალის" ჩემით დაინტერესების შესახებ და როცა კონტრაქტს ხელი მოვაწერე. დრო გადის და ჯერ ყველაფერი კარგად ვერ გავაანალიზე, იმდენად ბევრს ნიშნავს ჩემთვის ეს ტრანსფერი.

- როგორ განხორციელდა თქვენი ტრანსფერი?
- ძალიან საოცარი მომენტი იყო. ერთხელ სახლში ვისვენებდი, როცა ჩემი აგენტი რეზა ფეზელი დამიკავშირდა და მითხრა, რომ ჩემი კარიერის შესახებ უნდა გამსაუბრებოდნენ. მოულოდნელად მითხრეს, რომ "რეალიდან" დამიკავშირდებოდნენ. ზუსტად ხუთ წუთში ჩემი ტელეფონი ახმაურდა, "გამარჯობა, მოურინიო ვარ" - მითხრა უცნობმა, ვიფიქრე, ალბათ მაშაყირებენო, თუმცა საუბარი გაგრძელდა: "მთელი სეზონი გაკვირდები "დორტმუნდში" და მსურს, ჩემს გუნდში ითამაშო". აი, ასე დაიწყო ყველაფერი.

- ამ ზარმა მნიშვნელოვნად შეცვალა თქვენი კარიერა, თუ გითხრათ მოურინიომ, რა სურს თქვენგან?
- რა თქმა უნდა, ჩვენ ვისაუბრეთ ამაზე - მას სურს, რომ მე ნახევარდაცვის ორგანიზება ვითავო.

- ალბათ ხვდებით, რომ მსოფლიოს საუკეთესო ფეხბურთელთა გარემოცვაში სასტარტოში მოხვედრა გაგიჭირდებათ...
- საკუთარი შესაძლებლობებისა დიდად მჯერა და ვიცი, რომ შევძლებ სასტარტო შემადგენლობაში მოხვედრას. თუკი ტრავმა ხელს არ შემიშლის, ამაში დარწმუნებულიც ვარ. ამისთვის ძალიან ბევრს ვიშრომებ. ზიდანი ჩემი ერთ-ერთი კუმირია და მინდა, მის მსგავსად ვითამაშო მადრიდში.

- "რეალი" მსოფლიოში ერთ-ერთი საუკეთესოა, მაგრამ დღეისათვის არის ერთი კლუბი, რომელიც მასზე ერთი საფეხურით მაღლა იმყოფება - "ბარსა"...
- "ბარსელონა" ბრწყინვალეა, მაგრამ ეჭვიც არავის ეპარება, რომ მსოფლიოს უდიდესი კლუბი "რეალია".

- ბუნდესლიგაში ბოლო სეზონში 6 კვირა მუხლის ტრავმის გამო გაგიცდათ. მზად ხართ 11 ივლისის შეკრებისთვის?
- დიახ, მზად ვარ და შეკრების პირველივე დღეს ბაზაზე გამოვცხადდები. ისევე კარგად ვარ ფიზიკურად, როგორც - ტრავმამდელ პერიოდში. ძველი ტრავმის კვალიც არ დარჩენილა. ნამდვილად ძალიან მონდომებული ვარ ჩემი კარიერის ახალი ეტაპი დავიწყო. ერთი სული მაქვს, როდის დასრულდება შვებულება, არადა, ფეხბურთელებს, როგორც წესი, ეს არ უხარიათ.

- თქვენ ესპანურს სწავლობთ, ეს გუნდში ინტეგრირებაში ხელს შეგიწყობთ?
- ჯერ კიდევ დორტმუნდში დავიწყე ესპანურის შესწავლა, უბრალო ინტერესის გამო. მაშინ არ ვიცოდი, რომ "რეალში" თამაში მომიწევდა. ძალიან დამეხმარა ლუკას ბარიოსი. უკვე ერთი თვეა, მე და ჩემი მეუღლე ესპანური ენის ინტენსიურ კურსებს გავდივართ. მეჰმეთ თოფალმა მითხრა, რომ როცა "ვალენსიაში" მოხვდა, აღმოაჩინა, რომ ინგლისური ძალიან ცოტამ იცოდა და გუნდელებს მისი გაგება უჭირდათ. ამიტომ, მე არ მსურს იგივე პრობლემები შემექმნას.

ყოველდღიური სპორტული გაზეთი "ლელო"