ესპანური საფეხბურთო სეზონი ძალზე საინტერესოდ, სკანდალურად და დიდებულად დაიწყო - ქვეყნის სუპერთასისთვის ორმატჩიან ბრძოლაში ორი სუპერგუნდი ჩაერთო და, ბუნებრივია, თამაშებიც ასეთი გამოვიდა - 4-გოლიანი შოუ "სანტიაგო ბერნაბეუზე" და საპასუხო 5-გოლიანი თრილერი "კამპ ნოუზე". იმავე დღეს, როცა გაირკვა, რომ პრიმერადივიზიონის, სულ ცოტა, I ტური ჩაიშალა გაფიცვის გამო, ლეო მესის ბრწყინვალე თამაშმა "ბარსელონას" სეზონის პირველი ტიტული მოაპოვებინა "რეალთან" ბრძოლაში - ჯამში 5:4 კატალონიელთა სასარგებლოდ, მესის ანგარიშზე კი აქედან 3 გოლი და ერთიც საგოლე პასია.
რით დაგვამახსოვრდება ეს სუპერთასი? ალბათ, იმით, რომ, რაც
"ბარსას" ახალწვეული, რომელიც თავს 4-ნომრიანი მაისურით იწონებს, უნიკალური მიღწევის პატრონი გახდა - გუნდში გადასვლიდან მესამე დღეს ტიტულს - ქვეყნის სუპერთასს დაეუფლა. ფაბრეგასი მატჩის დასრულებამდე 8 წუთით ადრე შევიდა სათამაშოდ და მუდამ ყურადღების ცენტრში იყო - ჯერ მისი შემოსვლისას ლამის ჩამოიქცა ტრიბუნები ოვაციისგან, შემდეგ გადამწყვეტი გოლი მის მიერ დაწყებულ კომბინაციას მოჰყვა და ბოლოს, სესკის წაქცევისთვის ატყდა დიდი გაწევ-გამოწევა მოედანზე თუ მის მიღმა, რომელიც ლამის 10 წუთი გაგრძელდა. სხვათა შორის, მხოლოდ 1 ოფიციალური მატჩი ითამაშა და უკვე ტიტულის მფლობელი გახდა "ბარსას" ჩილელი ფორვარდი ალექსის სანჩესი, რომელსაც საპასუხო მატჩში არ უთამაშია.
ხოსეპ გვარდიოლამ ზედიზედ მესამედ მოაგებინა სუპერთასი "ბარსელონას" და ტიტულების რიცხვით (11) კლუბის ისტორიაში ყველაზე წარმატებული მწვრთნელი (იოჰან კრუიფს გაუსწრო) გახდა. თამაშის შემდეგ პეპმა გაუზიარა შთაბეჭდილებები მედიას, თუ როგორი ამაყია თავისი გუნდით, რა ბევრს ნიშნავს სესკ ფაბრეგასის ტრანსფერი და როგორ უმსგავსოდ მოიქცა მისი ვიზავი ჟოზე მოურინიო: "თქვენ ყველამ კარგად ნახეთ, რაც მოხდა, ამაზე კომენტარიც ზედმეტია, ფეხბურთში ასეთი უმსგავსობები რატომ უნდა ხდებოდეს, ვერ გამიგია. თუკი მოურინიოს საქციელს სათანადო ყურადღებას არ მიაქცევენ, გარწმუნებთ, ეს ცუდად დასრულდება. მოურინიო აცხადებს, რომ წარმოდგენა არა აქვს, ვისთან მიიჭრა, მე კი ამ შემთხვევაში ვიტყვი, რომ ადამიანმა პირველ რიგში თავად უნდა უწყოდეს, ვინ არის. რაც შეეხება - ვერ ცნობას, ტიტო ვილანოვა ჩვენ გუნდშAი მნიშვნელოვანი პერსონაა, მე მაგალითად, კარგად ვიცი, რომ მოურინიოს ასისტენტი აიტორ კარანკაა".
ჟოზე მოურინიო: "სუპერთასი ერთი პატარა ტიტულია, მიუხედავად ამისა, ჩვენ გული დაგვწყდა, რომ ვერ მოვიგეთ ის. სამაგიეროდ, ორივე თამაში ფანტასტიკურად ვითამაშეთ და ამით ძალიან გახარებული ვართ. ბოლო კლასიკოებს თუ დააკვირდებით, დაინახავთ, რომ ბალანსი აღდგენილია, მატჩები უმთავრესად ფრით სრულდება, ერთხელ ჩვენ მოვუგეთ მეტოქეს (თასის ფინალში) და ერთხელ მათ (დღეს), აქ , რა თქმა უნდა, იმ მატჩებს არ აღვნიშნავ, რომელთაც ეს თავიანთი უსამართლო ხასიათით არ დაიმსახურეს".
თამაშის შემდეგ მწვავე გამონათქვამების უფლებას თავს ფეხბურთელებმაც მისცეს. ამ შემთხვევაში უფრო "ბარსას" მოთამაშეები აქტიურობდნენ. მაგალითისთვის, ჩავიმ მარსელოს ბრალად დასდო, რომ ბრაზილიელს განზრახ სურდა სესკ ფაბრეგასის დამტვრევა, ხოლო ჟერარდ პიკემ აღნიშნა, რომ ჟოზე მოურინიო ესპანურ ფეხბურთს ანგრევსო. სხვათა შორის, მოვლენებს ყველაზე წყნარად სესკი შეხვდა, დებიუტანტმა აღნიშნა, რომ ეს ფეხბურთია და, როცა ასეთი დონის გუნდები ტიტულისთვის იბრძვიან, ყველაფერი შეიძლება მოხდეს, ეს ფეხბურთისთვის დამახასიათებელია და საგანგაშო სულაც არაა. მაინც რას ნიშნავს, რომ ფაბრეგასმა პრემიერლიგაში ინგლისური წრთობა გამოიარა...
მატჩის შემდეგ გაირკვა ალექსის სანჩესის უთამაშებლობის მიზეზი - მას მოთელვაზე ტრავმა მიუღია და ახლა 1 კვირა დასვენება მოუწევს. მოკლედ, პირველი ტური რომ არ ჩაშლილიყო, ჩილელს "მალაგასთან" მატჩის გამოტოვება მოუწევდა.
ყოველდღიური სპორტული გაზეთი "ლელო"
