ჩემპიონთა ლიგის მატჩში ჩეხურ "პლზენთან" ხოსეპ გვარდიოლამ ბევრისთვის უცნობი ფეხბურთელი ისააკ კუენსა გამოიყვანა. გაგაცნობთ "ბარსას" დებიუტანტს...ჟოან ისააკ კუენსა ლოპესი 20 წლის გარემარბია, ის კატალონიელია და ამ პროვინციის ქალაქ რეუსის მკვიდრია. ამ სეზონში კუენსა სეგუნდადივიზიონში "ბარსას" სარეზერვო გუნდში თამაშობს მარჯვენა ფლანგელად. 11 წლის კუენსა "ბარსას" სკოლა "ლა მასიაში" შეიყვანეს, თუმცა სამი წლის სწავლების შემდეგ ის ისევ მშობლიურ ქალაქში "რეუს დეპორტიუს" საბავშვო გუნდში ჩაირიცხა, სადაც სამი წელი იყო.
2009 წელს კუენსა "ლა მასიას" დაუბრუნდა, შარშან ის "საბადელში" გაანათხოვრეს, სადაც დადებითი კუთხით
რაც პეპი "ბარსას" თავკაცობს, მე-18 შემთხვევაა, როცა "ლა მასიას" აღზრდილს ძირითად გუნდში აქვს დებიუტი. ამათგან კი ყველაზე წარმატებულები ჯერჯერობით სერხიო ბუსკეტსი, ტიაგო ალკანტარა და ალბერტ ფონტასი არიან. პირველი სწორედ ბუსკეტსი იყო, მას 2008/09 წლების სეზონის მეორე ტურში ჰქონდა დებიუტი. ბუსკეტსა და კუენსას შორის კი 16 ფეხბურთელი იყო, ზოგი უკვე პირველ გუნდში დამკვიდრდა, ზოგი ისევ სარეზერვოა, ზოგიც სხვა კლუბში თამაშობს.
პირველი გუნდის წევრები უკვე ჩამოვთვალეთ: ბუსკეტსი, ალკანტარა და ფონტასი. მუნიესა, დოს სანტოსი, ბარტრა, სორიანო, სერხი რობერტო, მონტოია, მინიო და სერხი გომესი ჯერაც ბ გუნდის წევრებად ითვლებიან. 6 ფეხბურთელი კი აღარ არის კატალონიურ გრანდში, ესენია: ბოტია (სპორტინგი), აბრაჰამი (ალკორკონი), ხავი ტორესი (ლევანტე), გაი ასულინი (მანჩესტერ სიტი), ნოლიტო (ბენფიკა) და ორიოლ რომეუ (ჩელსი). სხვათა შორის, სიმბოლურია, რომ ორიოლ რომეუსაც სამშაბათს ჰქონდა ჩემპიონთა ლიგაში დებიუტი - "ჩელსი"-"გენკის" (5:0) მატჩში.
ისააკ კუენსა ერთი რამით გამოირჩევა სხვა დებიუტანტებისგან, ის ერთადერთია, რომლის დებიუტიც ჩემპიონთა ლიგაზე შედგა, ცხრამ "ბარსას" მაისურით პირველად ლა ლიგაში ითამაშა, 5-მა - სამეფო თასზე, სამმაც - ესპანეთის სუპერთასზე. კუენსა ძირითად გუნდში 39-ნომრიანი მაისურით თამაშობს (სარეზერვოში 22 ნომერია).
"ეს იყო ფანტასტიკური 6 წუთი. ნამდვილად არ ველოდი, რომ დებიუტი ჩემპიონთა ლიგაზე მექნებოდა. პეპმა მითხრა, რომ ჩემი ფეხბურთი მეთამაშა, შემეწუხებინა მეტოქის მცველები და გუნდურ თამაშს არ ჩამოვრჩენილიყავი. თამაშის შემდეგ ყველა მილოცავდა. ამ მაისურს ჩემს ოთახში ჩამოვკიდებ და ის იქნება ყველაზე შეუფასებელი ნივთი", - განაცხადა ისააკ კუენსამ.
ყოველდღიური სპორტული გაზეთი "ლელო"
