განა რა უნდა იყოს, რომ საზოგადოებისთვის ცნობილი არ იყოს ლიონელ მესის შესახებ? არგენტინელი ბოლო ორი წელიწადია მსოფლიოს საუკეთესო ფეხბურთელად სახელდება, მის საუკეთესოობას აღიარებენ მისივე კოლეგები, თამაშობს მსოფლიოს ერთ-ერთ საუკეთესო კლუბ "ბარსელონაში", რომელიც ახლა მწვერვალზეა, ჩემპიონთა ლიგის გამარჯვებული და ესპანეთის ჩემპიონია. თუმცა ფიფას ოფიციალურმა საიტმა მაინც გამოძებნა საინტერესო თემები არგენტინელ სუპერვარსკვლავთან ექსკლუზიურ ინტერვიუში.- სულ მალე კიდევ ერთი ტურნირი გელით, მსოფლიოს საკლუბო ჩემპიონატი...
- "ბარსელონასთვის" ძალიან მნიშვნელოვანი და საამაყო ტურნირია. ბოლო ასპარეზობიდან ძალიან სასიამოვნო მოგონებები გამოგვყვა და ახლაც მოუთმენლად ველით შეჯიბრებას.
- ვის არ უნდა? მთელი გუნდი შემართულია, რომ დაამტკიცოს - მსოფლიოში საუკეთესო საფეხბურთო გუნდია. ჩვენ ხომ მხოლოდ მოსაგებად გავდივართ.
- მაგრამ გელით შორი მგზავრობა, დიდი სხვაობა დროში, ეს თქვენზე არ იმოქმედებს?
- ვფიქრობ, ადაპტაციისთვის დრო გვრჩება. ხშირად მიწევს არგენტინასა და ესპანეთს შორის ფრენები. ასე რომ, ჩემთვის ეს პრობლემა არ იქნება.
- თქვენ ახლა უმნიშვნელოვანესი მატჩი გელით "რეალთან". არ გაგიჭირდებათ ამ შეხვედრის შემდეგ იაპონიისთვის ისევ ფორმის პიკში ყოფნა?
- მართალია, მათლა ძალიან ძნელია ამდენი შეხვედრის გამართვა და მუდამ კარგად თამაში, მაგრამ ყველაზე კარგად ჩვენი შესაძლებლობის შესახებ თავად ვუწყით.
- ბოლო მატჩებია, გვარდიოლა 3-4-3 ტაქტიკით გათამაშებთ, თქვენ რა აზრის ხართ ამ განლაგებაზე?
- მეტნი ვართ ნახევარდაცვაში, უკეთ ვაკონტროლებთ ბურთს, სწორედ ეს სურს ბოსს. როცა ბურთი ჩვენ გვაქვს, შეგვიძლია მეტოქის დამარცხება, თანაც მას ამის შესაძლებლობას ვუსპობთ. ნახევარდაცვაში ერთი კაცით მეტი, საუკეთესო გამოსავალია.
- რას იტყვით გვარდიოლას მწვრთნელობაზე?
- ის გუნდის მთავარი ფიგურაა. მისი ლიდერობა უმნიშვნელოვანესია ჩვენი მოტივირებისთვის, მზადებისთვის. მან ბევრი რამ შეცვალა და ინდვიდუალურად თუ გუნდურად უკეთესები გაგვხადა.
- ბურთით უფრო სწრაფად გადაადგილდებით, ვიდრე წინა წლებში, ეთანხმებით?
- დიახ, ეს მოიტანა გუნდურმა თამაშმა. ჩვენ უკვე ისე კარგად ვუგებთ ერთმანეთს, რომ ზეპირად ვიცით, საით გავიქცეთ, სად გადავაწოდოთ პასი.
- რას იტყვით შაბათის "კლასიკოზე"?
- ფანტასტიკური მატჩი გველის. ძალიან კარგი იქნება მოგება, რადგან ეს სეზონის ბოლომდე დადებითად დაგვმუხტავს. თუ ვერ მივაღწევთ სასურველ შედეგს, ძალიან გაგვიჭირდება.
- იანვარში ზედიზედ მესამედ გექნებათ შანსი წლის საუკეთესო ფეხბურთელი გახდეთ, რამდენად მნიშვნელოვანია ეს ტიტული თქვენთვის?
- ყოველთვის მითქვამს, დიდებულია, როცა ინდივიდუალურად საუკეთესო ხარ, მაგრამ პირველი მაინც მატჩებისა და გუნდური ტიტულების მოგებაა.
- სანაკრებო თემაზეც ვთქვათ, არგენტინის ნაკრებს საუკეთესო წელი არ ჰქონია...
- ადრე უფრო დაძაბულები ვიყავით, თუნდაც ბოლივიის კენჭისყრის დროს. საკვალიფიკაციო კამპანიაში ივნისამდე დასვენება გვაქვს და კარგად მოვემზადებით.
- ჩვენი ბოლო კითხვა, უფრო პირადი სახის, რა გავლენა აქვს თქვენს არასაფეხბურთო ცხოვრებაში ფეხბურთს?
- როცა პატარა ბიჭი ვიყავი, სადაც არ უნდა ვყოფილიყავი, თან ბურთს დავატარებდი, არა მხოლოდ მოედანზე, არამედ - ყველგან. ახლა ცოტა სხვა დროა და მეც მოედანს გარეთ გადაწყობა მჭირდება ხოლმე, რაც არც ისე იოლია.
ყოველდღიური სპორტული გაზეთი "ლელო"
