არგენტინელი ნახევარმცველი ხავიერ მასკერანო ოფიციალურად გახდა "ბარსელონას" წევრი - მასკერანომ გუშინ სრული სამედიცინო შემოწმება გაიარა. "ლივერპულის" ექს-ფეხბურთელი ჰოსპიტალ დე ბარსელონაში იქაური დროით დილის 8 საათზე გამოცხადდა. მას რამდენიმე აუცილებელი ტესტის ჩაუტარეს, სისხლის და შარდის ანალიზები აუღეს და რენტგენი გადაუღეს. ოთხი საათის შემდეგ მასკერანომ "კამპ ნოუზე" გადაინაცვლა და კლუბის სამედიცინო დარბაზში ჩააბარა რამდენიმე ტესტი გამძლეობაზე. მასკერანოს მდგომარეობა "ბარსელონას" ექიმებმა მოკლედ შეაფასეს - ის ხარივით ჯანმრთელია. მასკერანო მართლაც იშვიათად შავდება, ბოლო ხუთი წლის განმავლობაში მხოლოდ ერთხელ მოხდა, რომ მას სერიოზული ტრავმა ჰქონდა.
შეძენასთან ერთად "ბლაუგრანა" კარგავს კიდეც - ყველასთვის ცნობილია, რომ "მილანში" შვედი ფორვარდი ზლატან იბრაჰიმოვიჩი გადავიდა. უახლოეს საათებში მისი გზა შეიძლება კიდევ ერთმა ბარსელონელმა, ბრაზილიელმა მაქსველმა გაიაროს. ყოველ შემთხვევაში იბრაჰიმოვიჩის აგენტი მინო რაიოლა ამ ოპერაციას არ გამორიცხავს.
"ბარსელონამ" პირველ ტურში ძალზე იოლად მოუგო "რასინგს". ამ შეხვედრაში ანგარიში ლეო მესიმ გახსნა, რომელმაც კლუბში 131-ე გოლი გაიტანა. ამ მაჩვენებლით მან სამუელ ეტოო და რივალდო ჩამოიტოვა. გასული სეზონიც რომ ჩავთვალოთ, არგენტინელმა ზედიზედ მეხუთე საჩემპიონატო მატჩში გაიტანა. "ელ სარდინეროზე" არგენტინელმა კარიერაში მე-5 გოლი გაიტანა.
დავიდ ვილიამ თავის პროფესიულ კარიერაში 250-ე გოლი გაიტანა, თან ეს გოლი პირველი იყო "ბარსელონას" მაისურით გატანილი. სხვათა შორის, ვიქტორ ვალდესმა 2008 წლის მარტის შემდეგ პირველად აიღო პენალტი.
ლელო
