ლიონელ მესი, ფეხბურთის მაიკ ჯორდანი - 234 გოლის ანატომია

ერთი რიგითი კლუბის ყველა დროის საუკეთესო ბომბარდირობაც კი უდიდესი მიღწევა იქნებოდა ნებისმიერი 24 წლის ფეხბურთელისთვის, მაგრამ "ბარსელონასი"?

თუმცა საკვირველი რაა - ეს ფეხბურთელი ხომ ლეო მესია. სესარ როდრიგესი შორეულ 40-იან და 50-იან წლებში თამაშობდა, ამიტომაც ლეგენდა ხშირად არ ემთხვევა რეალობას - სტატისტიკოსებმა დაითვალეს და აღმოჩნდა, რომ "ბარსას" ლეგენდარულ ფეხბურთელს 235 კი არა, 232 გოლი გაუტანია.

მესიმ ეს ამბავი "გრანადასთან" თამაშის წინა დღეს შეიტყო. მას 231 გოლი ჰქონდა... არგენტინელმა სეგუნდა დივიზიონიდან აღზევებულ მამაც ანდალუსიურ კლუბთან 1 გოლი არ იკმარა - ჰეთ თრიკი შეასრულა და ახლა "ბლაუგრანას" ყველა დროის საუკეთესო ფორვარდია და ის მხოლოდ 24 წლისაა!

მართალი იყო ვიქტორ ვალდესი, რომელიც თამაშის შემდეგ ამბობდა: "ლეო თავად აწესებს ახალ ნიშნულებს, რომლებიც მომავალმა თაობებმა უნდა დაძლიონ".

8-გოლიანმა თრილერმა "ბარსას" სიხარულთან ერთად ტკივილიც მიაყენა - დაიმტვრა ერთადერთი ჯანმრთელი მარცხენა მცველი გუნდში - ბრაზილიელი ადრიანო. ადრიანო 10 დღეს დაისვენებს. ერიკ აბიდალის ავადმყოფობის შემდეგ "ბარსას" დაცვის მარცხენა ფლანგი მთლად მოუშიშვლდა.

პრესკონფერენციაზე ხოსეპ გვარდიოლამ დიდხანს იფიქრა, ვისთვის შეედარებინა თავისი შეგირდი და ბოლოს ასე თქვა: "მესი შეიძლება მხოლოდ ჯორდანს შეადარო. ის ისევე გამორჩეულია ფეხბურთში, როგორი გამორჩეულიც კალათბურთში მაიკ ჯორდანი იყო".

რეკორდი ცალკე აღსანიშნავია - მსოფლიოს სპორტულმა მედიამ მესის მიღწევას (თითქმის უკლებლივ) მიუძღვნა თავისი გამოცემების პირველი გვერდები და მყვირალა სათაურები.

მოდი, ვნახოთ, როგორ მოახერხა პატარა ჯადოქარმა 234 ოფიციალური გოლის გატანა "ბარსელონას" მაისურით:

ყველაზე მეტად მესი მადრიდის "ატლეტიკოს" ერჩის - "როხიბლანკოს" კარში მას 18 გოლი აქვს გატანილი. ყველაზე მეტი გოლი (ბუნებრივია) არგენტინელმა "კამპ ნოუზე" გაიტანა - 132. 94 გოლი ლეომ სტუმრად შეაგდო, 8 - ნეიტრალურ მოედანზე.

ვის კარში?
18 ატლეტიკო
14 სევილია
13 რეალი
12 რასინგი
10 ალმერია
10 ოსასუნა
10 სარაგოსა
10 ვალენსია
9 მალიორკა
8 ბილბაო

როგორ?
185 ცაცია
37 მარჯვენა
10 თავით
2 სხვა

საიდან?
207 საჯარიმოში
27 საჯარიმოს გარეთ

ვინ უპასა?
31 დანი ალვეში
24 ჩავი
17 ანდრეს ინიესტა
12 პედრო
9 ტიერი ანრი
6 ადრიანო
6 სამუელ ეტოო
6 სესკ ფაბრეგასი
5 დეკუ
5 რონალდინიო

სტანდარტულები
21 პენალტი
5 საჯარიმო

ყოველ ახალ სეზონში ლეო მესი ამტკიცებს, რომ მისთვის ზღვარი არ არსებობს - "გრანადასთან" მატჩში ჰეთ თრიკის შესრულების შემდეგ მის ანგარიშზე ამ სეზონში უკვე 54 გოლია - ეს კი ერთით მეტია, ვიდრე შარშანდელ სეზონში. არადა, კარგად გვახსოვს, შარშან 53 გოლის გატანა მესის უდიდეს მიღწევად ჩავუთვალეთ (დამსახურებულადაც).

არგენტინელის ანგარიშზე უკვე 8 ჰეთ თრიკია (აქ ითვლება "ვალენსიასთან" შესრულებული პოკერიც და "ლევერკუზენის" კარში გატანილი 5 გოლიც). ლა ლიგაში, რომლის გასრულებამდე 10 ტური რჩება, მესი 34 გოლით ბომბარდირთა დავაში ლიდერობს.

ის საუკეთესოა, ეს უკვე ეჭვგარეშეა...

ყოველდღიური სპორტული გაზეთი "ლელო"