ლუკას ლეივა: სიამოვნებით გავხდებოდი ფერმერი

ლუკას ლეივას შარშანდელი სეზონის დიდი ნაწილი ტრავმის გამო გაუცდა. ბუნებრივია, "ლივერპულის" ჩავარდნას მხოლოდ ბრაზილიელის არყოფნით ვერ ავხსნით, თუმცა ის ერთ-ერთი წინაპირობა რომ იყო, "წითლების" გულშემატკივრები ალბათ დაგვეთანხმებიან.

გთავაზობთ ინტერვიუს 25 წლის ფეხბურთელთან, რომელიც მას საკლუბო ვებგვერდს მისცა.

- გახსოვთ დებიუტი პროფესიულ ფეხბურთში?
- დიახ, ეს იყო მატჩი "სანტუ-ანდრეს" წინააღმდეგ. მაშინ მე "გრემიოში" ვთამაშობდი. ზუსტი თარიღი არ მახსოვს, მაგრამ ეს დაახლოებით 6 წლის წინ იყო. შესანიშნავი დღე იყო ჩემთვის. 18 წლის ვიყავი. მოედანზე თამაშის დასრულებამდე 20 წუთით ადრე შევედი. აღნიშნული მატჩი ცხოვრების ბოლომდე მემახსოვრება.

- "ლივერპულში" დებიუტს როგორ გაიხსენებდით?
- პირველად "ტულუზთან" ვითამაშე ჩემპიონთა ლიგაში. მახსოვს, რომ 4:0 მოვიგეთ და მაშინაც შეცვლაზე ვითამაშე.

ჩემთვის ეს დღე განსაკუთრებული იყო, რადგან იმ გუნდის რიგებში ვითამაშე, სადაც ბევრი მაღალი კლასის ფეხბურთელი თამაშობს. ვუყურებდი თანაგუნდელებს და ბედნიერი გახლდით, რომ მათ გვერდით თამაშის პატივი მერგო. მაშინ ოცნება ამიხდა. ვამაყობ, რომ დღემდე ამ კლუბის წევრი ვარ.

- გუნდში ტრავმათა ეპიდემია რომ დაიწყოს და მწვრთნელმა რომელიმე უჩვეულო პოზიციაზე გთხოვოთ თამაში, კარში ჩადგებით, თუ თავდასხმაში წახვალთ?
- რა თქმა უნდა, თავდამსხმელად ვითამაშებდი. არ მგონია, რომ მეკარედ ვივარგო. მეკარეობა ძალიან სპეციფიკური პოზიციაა.

- მატჩის დღეებში რამე დიეტას თუ იცავთ?
- თუკი თამაში ადრეა დანიშნული, მირჩევნია, რომ მსუბუქად ვჭამო. გვიან თუ ვთამაშობთ, მაშინ ჩემს რაციონში თევზი და პასტაც შედის. ვფიქრობ, რომ ჩემს ფორმაზე ეს დადებითად მოქმედებს.

- რამე რიტუალი თუ გაქვთ მატჩამდე?
- არანაირი ცრურწმენა არ მახასიათებს. მხოლოდ იმას ვცდილობ, რომ თამაშის წინა დღეს მაქსიმალურად დავისვენო. როგორც წესი, ამ დროს შინ ვარ და ვცდილობ, რომ მეორე დღისთვის ძალები მოვიკრიბო.

- გასახდელში ყველაზე ხმაურიანი და აქტიური ფეხბურთელი ვინ არის?
- მუსიკაზე, რასაც მატჩამდე ვუსმენთ, პეპე (რეინა. რედ) აგებს პასუხს, ასე რომ, ჩვენთან საკმაოდ დიდი ხმაურია. მე, როგორც წესი, ჩუმად ვზივარ და კონცენტრირებას ვცდილობ. რა საკვირველია, მუსიკას შეუძლია თამაშამდე დადებითი მუხტის გაღვიძება ჩვენში, მაგრამ ყველა ადამიანი თავისებურია. ზოგს მაგალითად მოედანზე გასვლამდე მასაჟი უყვარს, ზოგი, პირიქით, ვერ იტანს. ყველამ ის უნდა აკეთოს, რაც თავის გამოჩენაში ხელს მაქსიმალურად შეუწყობს.

- მუსიკა, რომელსაც პეპე რთავს ნამდვილად კარგია?
- დიახ, ინგლისური და ესპანური მუსიკის ლამაზი სინთეზია. ეს მიქსი თითქმის ყველას მოსწონს და მასში რაღაც თავისას პოულობს. ჩვენს ინგლისელ თანაგუნდელებს ლამაზი ესპანური მუსიკა რა ხანია, შეუყვარდათ.

- თქვენი აზრით "ლივერპულში" "ვარსკვლავებთან ცეკვის" საუკეთესო კანდიდატი ვინ იქნებოდა?
- ბრაზილიაში კარნავალის დროს ბევრი კარგი მოცეკვავის ნახვა შეიძლება. ჩვენთან კი არ მგონია, რომ ბევრი ასეთი მოიძებნოს. შესაძლოა, გლენ ჯონსონი. მე არ მინახავს, როგორ ცეკვავს ის, მაგრამ რატომღაც გავიფიქრე, რომ რიტმის კარგი შეგრძნება უნდა ჰქონდეს.

- თუკი საქმე ერთი დღით პროფესიების გაცვლაზე მიდგება, თქვენ ვის შეცვლიდით?
- ჩემი პროფესია ძალიან მიყვარს, თუმცა მომწონს ჩემი ძმის საქმიანობაც. ბრაზილიაში მას თავისი ფერმა აქვს.

ის ცხვრის ფარას, ძროხებსა და ხარებს უვლის. როცა სამშობლოში ვბრუნდები ხოლმე, ყოველთვის ვცდილობ, რომ დავეხმარო. ამ საქმეს სიამოვნებით მოვკიდებდი ხელს.

- ფეხბურთის მიღმა ჰობი გაქვთ?
- როცა თავისუფალი დრო მაქვს, ვცდილობ, რომ ის ოჯახთან ერთად გავატარო. შინ ბანქოს ვთამაშობ, მაღაზიებში დავდივარ. ერთი სიტყვით, ვაკეთებ იმას, რასაც ჩვეულებრივი ადამიანები ანიჭებენ უპირატესობას.

- კარგია მამობა?
- ამ წუთას ყველაფერი მომწონს ამ სტატუსში. ჩემი ვაჟი სწრაფად იზრდება. ჩვენ ლივერპულში ცხოვრებით კმაყოფილები ვართ. როცა წამოიზრდება, მელვუდში ბურთს ჩემთან ერთად გააგორებს.

- მართლა კარგი მზარეული ხართ?
- ნამდვილად არა. კარგ საჭმელებს კი ვამზადებ, მაგრამ ეს არ არის ის, რაც სიამოვნებას მანიჭებს.

- რომელია საუკეთესო სტადიონი, სადაც სტუმრად თამაში ჩაგიტარებიათ?
- "არსენალთან" გასვლითი მატჩები მიყვარს და შესაბამისად "ემირიტსს" დავასახელებ. სტადიონიც დიდებულია და მოედანიც.

- საუკეთესო გოლი, რაც კარიერაში გაგიტანიათ?
- იმდენი გოლი სულ არ გამიტანია, რომ საქმე ასარჩევად მქონდეს. მით უფრო დიდი ფეხბურთში მოსვლის შემდეგ. საუკეთესო, რაც გამიტანია, ალბათ, "სტიაუასთან" იყო. "ლივერპულში" ჩემს პირველ გოლსაც არა უშავდა, კიდევ "გრემიოში" თამაშისას "პონტე პრეტას" გავუტანე ლამაზი ბურთი.

- ვინ არის საუკეთესო ნახევარმცველი, ვის წინააღმდეგაც ოდესმე გითამაშიათ?
- გულწრფელი პასუხისთვის დრო დამჭირდება მოსაფიქრებლად... მართლა რთული ასარჩევია... თუკი საწვრთნელ პროცესსაც მივათვლით, მაშინ სტივ ჯერარდი. კლუბის მიღმა რონალდინიო, მაგრამ კონკრეტულად მის წინააღმდეგ არასოდეს მითამაშია.

(იბეჭდება მცირე ცვლილებით)
ყოველდღიური სპორტული გაზეთი "ლელო"