7 ოქტომბერს, "ნოუ კამპზე" ლა ლიგის მე-7 ტურის შეხვედრა გაიმართა, რომელშიც ერთმანეთს "ბარსელონა" და "რეალი" დაუპირისპირდნენ. კლასიკო, როგორც მოსალოდნელი იყო, თანამედროვე მსოფლიო ფეხბურთის ორი უდიდესი ვარსკლავის - ლიონელ მესისა და კრიშტიანო რონალდოს დუელად იქცა და მათაც სრულებით გაამართლეს მოლოდინი. არგენტინელმაც და პორტუგალიელმაც ორ-ორი გოლი გაიტანეს.
ანგარიში "სამეფო კლუბის" ფეხბურთელებმა გახსნეს. 23-ე წუთზე სტუმრებმა მარჯვენა ფრთიდან წამოწყებული შეტევა ცენტრში გადაიტანეს. ქარიმ ბენზემამ ბურთი კრიშტიანო რონალდოს გადააწოდა, რომელმაც ვიქტორ ვალდესს აუღებელი დაურტყა - 0:1 "რეალის" სასარგებლოდ.
ამ გოლით რონალდომ რეკორდი დაამყარა -
თუმცა, მადრიდელთა სიხარულმა დიდხანს არ გასტანა. 31-ე წუთზე პედროს გამჭოლი გადაცემის შემდეგ პეპე ვერ გაისარჯა კარგად და ბურთი მესის დარჩა, რომელმაც იკერ კასილიასს შანსი არ დაუტოვა - 1:1.
მეორე ტაიმის 61-ე წუთზე არგენტინელმა ვარსკლავმა კვლავ გაიბრწყინა, რომელმაც მისი წაქცევისთვის დანიშნული საჯარიმო დარტყმა იდეალურად შეასრულა - მესიმ ბურთი ცოცხალ კედელს აარიდა, იკერ კასილიასის ნახტომი კი ამაო აღმოჩნდა - 2:1.
და აი, 5 წუთში დუბლს უკვე მსოფლიოს მეორე ვარსკლავი ასრულებს - იოზილის დიდებული პასის შემდეგ რონალდო ვალდესის პირისპირ აღმოჩნდა და რა თქმა უნდა, 2:2!
მატჩის ბოლო წუთებზე კატალონიელებს გამარჯვების შანსი მიეცათ. ჯერ იყო და, 89-ე წუთზე, "ბარსელონასთვის" ჩვეული სწრაფი შეტევა, ბურთზე ერთი შეხებით, მონტოიამ საჯარიმოს მისადგომებიდან დარტყმით დაასრულა, მაგრამ ბურთი ხარიხას მოხვდა.
მსაჯის მიერ დამატებულ დროში კი პედროს შეეძლო ინიესტას ბრწყინვალე პასის შემდეგ "ბარსელონასთვის" სამი ქულის მოტანა, თუმცა რონალდო-პეპეს ჩამოშორების შემდეგ კარში ბურთი ზუსტად ვერ გადაგზავნა.
საბოლოოდ, "ბარსელონა"-"რეალის" ჭიდილი ფრედ დასრულდა და ამ გუნდებს შორის ლა ლიგის სატურნირო ცხრილში სხვაობა კვლავ უცვლელია - მე-7 ტურის შემდეგაც ტიტო ვილანოვას გუნდი "სამეფო კლუბს" 8 ქულით უსწრებს.
