მადრიდის "რეალს" თავი დაედგა - კარლო ანჩელოტი

ორშაბათს კარლო ანჩელოტიმ ნახევარი პარიზი შემოირბინა თავის იურისტებთან ერთად, დღის ბოლოს "პარი სენ-ჟერმენისგან" "განთავისუფლების ფურცელი" ჩაიგდო" ხელთ (რომელიც, ამბობენ, "რეალს" 4,5 მილიონი ევრო დაუჯდებაო) და სამშაბათს ყველაზე ტიტულოვანი ევროპული კლუბის მთავარი მწვრთნელი გახდა.

სამწლიანი კონტრაქტი
25 ივნისს მადრიდის "რეალის" ოფიციალური ვებგვერდი პირველი იყო, რომელიც გარიგების შესახებ იუწყებოდა:

"ოთხშაბათს, 26 ივნისს "რეალ მადრიდი" წარადგენს კარლო ანჩელოტის, როგორც პირველი გუნდის ახალ თავკაცს მომდევნო სამი სეზონით. ღონისძიება 13 საათზე "სანტიაგო ბერნაბეუს" "როიალ ბოქსში" გაიმართება, რომელსაც სტადიონის პრესდარბაზში კარლო ანჩელოტის პრესკონფერენცია მოჰყვება", - ვკითხულობთ "რეალის" ოფიციალურ კომუნიკეში.

კარლეტო რეჯოლოში ღარიბი ფერმერების ოჯახში დაიბადა და მისი ბედი თავიდანვე ფეხბურთს დაუკავშირდა. ფეხბურთელობისას ის "პარმაში", "რომასა" და "მილანში" თამაშობდა. 18 წელიწადია, რაც კარლეტო მწვრთნელია და ამ ხნის განმავლობაში ის პლანეტის ერთ-ერთ ყველაზე წარმატებულ მწვრთნელად ჩამოყალიბდა, რაზეც მისი ტიტულებიც მეტყველებს. ფეხბურთელობისგან განსხვავებით, ანჩელოტი-მწვრთნელმა უკვე ნახევარი დასავლეთ ევროპა შემოიარა და ყველგან წარმატებული იყო.

თავის ავტობიოგრაფიაში კარლო ანჩელოტი "რეალის" პრეზიდენტ ფლორენტინო პერესთან დიალოგს იხსენებს, სადაც პერესი მას ეუბნება: "კარლო, ერთხელაც შენ ჩემი გუნდის მწვრთნელი გახდები". და ეს დროც დადგა...

რონალდოც, სეზონის დაწყებამდე
მადრიდის "რეალის" პრეზიდენტმა ფლორენტინო პერესმა განაცხადა, რომ ახალი კონტრაქტი კრიშტიანო რონალდოსთან აუცილებლად გაფორმდება. პერესის თქმით, ამის შესახებ ოფიციალურად სეზონის დაწყებამდე გამოცხადდება:

"ეს ჩვენი მთავარი აქტივია - რონალდოს ირგვლივ გუნდის მომავალი უნდა ავაშენოთ. მალე ყველაფერი გაირკვევა. ეჭვიც კი არ მეპარება, რომ კრიშტიანო კარიერას აქ, "რეალში" დაასრულებს. ახალი კონტრაქტის შესახებ ერთად სეზონის დაწყებამდე გამოვაცხადებთ", - განაცხადა "რეალის" პრეზიდენტმა.

შეგახსენებთ, რომ 28 წლის პორტუგალიელს ხელშეკრულება 2015 წლის ზაფხულში უსრულდება.

დოსიე
კარლო ანჩელოტი
დაიბადა: 10 ივნისი, 1959
დაბ. ადგილი: რეჯოლო (რეგიონი რეჯო ემილია)

ფეხბურთელის კარიერა
პოზიცია: ნახევარმცველი
1973-75 - რეჯოლო
1975-1979 - პარმა
1979-87 - რომა
1987-92 - მილანი
ნაკრები: 26 თამაში, 1 გოლი
მიღწევები: იტალიის ჩემპიონი, იტალიის თასი (4-გზის)

მწვრთნელის კარიერა
1995-96 - რეჯანა
1996-98 - პარმა
1999-2001 - იუვენტუსი
2001-09 - მილანი
2009-11 - ჩელსი
2011-13 - პარი სენ-ჟერმენი
2013-დან - რეალი

მიღწევები: ჩემპიონთა ლიგა (2), უეფას სუპერთასი (2), ინტერტოტოს თასი, იტალიის თასი, იტალიის სუპერთასი, საკლუბო მსოფლიოს ჩემპიონატი, ქომუნითი შილდი, ინგლისის ჩემპიონი, ინგლისის თასი, საფრანგეთის ჩემპიონი.

ყოველდღიური სპორტული გაზეთი "ლელო"

ასევე იხილეთ:
ოფიციალურად: კარლო ანჩელოტი მადრიდის "რეალის" მწვრთნელია!