რასინგი პირველია, ვინც სახლში გაუშვეს

"კორდობა" და მისი 29 წლის ნახევარმცველი ხორხე ლუკე ნამდვილი გმირები არიან - "სევილიას" გაზრდილმა ფეხბურთელმა, რომლის კარიერა სეგუნდა დივიზიონს (და უფრო ქვედა ლიგებს) არ გასცილებია, ესპანეთის სამეფო თასის საპასუხო მატჩის მეორე დამატებითი ტაიმის უკანასკნელ წუთზე გადამწყვეტი გოლი პენალტის ნიშნულიდან გაიტანა სანტანდერის "რასინგის" კარში. ამ გოლმა "რასინგი" პრიმერადივიზიონის პირველ უიღბლო კლუბად აქცია, რომელიც თასის გათამაშებას გამოეთიშა.

პირველი თამაში, გეხსომებათ, "კორდობამ" 2:0 მოიგო. ბევრი ფიქრობდა, რომ სეგუნდა დივიზიონის გუნდი ამ უპირატესობის შენარჩუნებას შეძლებდა, მაგრამ დაიწყო საპასუხო შეხვედრა და "რასინგი" ჯერ ივან ბოლადოს გოლით დაწინაურდა, შემდეგ კი კენედი ბაკირჩიოგლუმ იყოჩაღა. დაინიშნა დამატებითი დრო, რომლის პირველ ტაიმშიც ედუ ბედიამ მასპინძლები 3:0 დააწინაურა. ის იყო კანტაბრიელებმა ირწმუნეს, რომ თავი ქუდში ჰქონდათ, როცა ერთ-ერთმა მასპინძელმა საჯარიმოში ხელით ითამაშა, პენალტის ნიშნულთან კი ლუკე მივიდა...

აი, "ესპანიოლს" კი სულაც არ გასჭირვებია პრიმერას ყოფილი ბინადარის, "ვალიადოლიდის" გაგდება. პირველი თამაში ბარსელონელებს 2:0 ჰქონდათ მოგებული. ამის მიუხედავად, მაურისო პოჩეტინიომ თითქმის ძირითადი შემადგენლობა გამოიყვანა საპასუხო დაპირისპირებაშიც. მე-10 წუთზე "ვალიადოლიდმა" დაწინაურების ოქროს შანსი გაუშვა ხელიდან, საჯარიმოში ხელით ფორლინმა ითამაშა, მაგრამ ანტონიო კალემ პენალტი ვერ გაიტანა. ვინ იცის, როგორ განვითარდებოდა მოვლენები, რომ არა ეს პენალტი. მე-2 ტაიმში კი "ვალიადოლიდის" ბედი ხოფრეს გაძევებამ გადაწყვიტა. ფეხბურთელს დამრიგებელი ანტონიო გომესიც მიაყოლეს, რომელმაც ენერგიულად გააპროტესტა წითელი ბარათი. 68-ე წუთზე პაბლო ოსვალდო ორ მცველს გასცდა და ისე გაიტანა, თუმცა "ვალიადოლიდმა" ღირსების გოლი მაინც გაიტანა, რომელიც ანტონიო ბარაგანმა შეაგდო - 1:1.


რასინგი-კორდობა 2:0 (1:1 დ.დ.) (0:2 პირველი მატჩი)
გოლები: 1:0 ბოლადო (25), 2:0 კენედი (72), 3:0 ედუ ბედია (102), 3:1 ლუკე (120-პენ)

ესპანიოლი-ვალიადოლიდი 1:1 (2:0)
გოლები: 1:0 ოსვალდო (68), 1:1 ბარაგანი (77-პენ)
გაძევება: ხოფრე (51. ვალიადოლიდი)


ყოველდღიური სპორტული გაზეთი
"ლელო"