2010 24 წლის შემტევი ნახევარმცველისთვის დიდებული წელიწადი გამოდგა - ჰოლანდიელი იბრაჰიმ აფელაი ნაკრებთან ერთად მსოფლიოს ვიცე-ჩემპიონი გახდა. მან მუნდიალზე სამ შეხვედრაში მიიღო მონაწილეობა, პსვ-ში კარგი თამაშით კი "ბარსა" დააინტერესა და 24 დეკემბერს 3 მილიონი ევროს სანაცვლოდ კატალონიური გრანდის სრულუფლებიანი წევრი გახდა. მაროკოული წარმოშობის აფელაი "ბარსელონაში" 20-ნომრიანი მაისურით ითამაშებს. გუშინ მასთან ინტერვიუ კლუბის ოფიციალურ საიტზე გამოქვეყნდა.
- რას ფიქრობთ, კლუბში გატარებული ერთი დღის შემდეგ?
- ეს იყო დიდებული დღე, რომელიც ძალიან დიდ ხანს გაგრძელდა. უამრავი ტესტი გავიარე, შემდეგ, როცა სტადიონი ვნახე,
- რას ნიშნავს თქვენთვის "ბარსას" ფეხბურთელობა?
- ალბათ, ყოველ ფეხბურთელს სურს, ერთხელ მაინც ითამაშოს "ბარსელონაში" და როცა პირველად ვითამაშებ, ვიტყვი, რომ ოცნება ამიხდა.
- "ბარსელონა"- პირველი რა ასოციაცია გაქვთ ამ სიტყვაზე?
- რომარიო, რონალდო, კუმანის გოლი "უემბლიზე" და კრუიფი, რა საკვირველია!
- როცა პირველად გაიგეთ, რომ თქვენით "ბარსა" დაინტერესდა...
- ძალიან ბედნიერი ვიყავი, მენეჯერმა მითხრა, რომ ყველაზე დიდი შანსი "ბარსაში" გადასვლის მქონდა. მოლაპარაკებებიც მალე დასრულდა, ყველაფერი კარგად იყო.
- ადრე თუ წარმოგედგინათ, რომ აქ ითამაშებდით?
- როცა ბავშვობიდან "ბარსელონას" ფანი ხარ, ამაზე მილიონჯერ მაინც გაიფიქრებ, მაგრამ იზრდები და ხვდები, რომ "ბარსელონაში" მოხვედრა მხოლოდ რჩეულთა ხვედრია.
- პსვ-ში 17 წლისას გქონდათ დებიუტი...
- ყველაფერი ახალი იყო ჩემთვის, თანაგუნდელები ჩემზე დიდები და ფიზიკურად ბევრად ძლიერები იყვნენ.
- როგორ შეაფასებდით თქვენს კარიერას ეინდჰოვენში?
- ის ხომ ერთადერთი კლუბია, სადაც მითამაშია. პსვ ჩემი ცხოვრების დიდი ნაწილია.
- წლევანდელ "ბარსელონას" თუ უყურებდით ხოლმე?
- რა თქმა უნდა, "ბარსა" მსოფლიოში საუკეთესო ფეხბურთს თამაშობს. "რეალთან" მატჩს რომ ვუყურებდი, ერთი სული მქონდა, "კამპ ნოუზე" ვყოფილიყავი.
- ბევრი ამბობს, რომ ეს კლუბის საუკეთესო თამაში იყო, ეთანხმებით?
- დიახ. ასევე დიდებული იყო 6:2 "ბერნაბეუზე", ამ ორ მატჩში კლუბმა სხვა პლანეტის ფეხბურთი შემოგვთავაზა.
- როგორ ფიქრობთ, მალე შეეგუებით ახალ გუნდს?
- მე ძალიან ბევრს ვიშრომებ, თავს გადავდებ. თავიდან, ალბათ, ძალიან გამიჭირდება, მაგრამ ჩემს ადგილს მაინც მოვიპოვებ.
- თქვენ რამდენიმე პოზიციაზე შეგიძლიათ თამაში, უფრო კი სად მოგწონთ?
- შუახაზში, სადაც მწვრთნელი მეტყვის, იქ ვითამაშებ.
- რა აზრი ჩამოგიყალიბდათ ხოსეპ გვარდიოლაზე?
- დადებითი, მან ძალიან კარგად მიმიღო კლუბში.
- რამ გაგაკვირვათ აქ ყველაზე მეტად?
- სტადიონმა - "კამპ ნოუ" დიდებულია. აქ არასოდეს ვყოფილვარ და პირველად ნანახმა დიდებული შთაბეჭდილება მოახდინა ჩემზე, პირდაღებული ვუყურებდი ტრიბუნებს.
