"ბაიერნის" მენეჯერი კრისტიან ნერლინგერი დარწმუნებულია, რომ ლუის ვან გაალი მიუნხენურ კლუბთან ახალ კონტრაქტს გააფორმებს. როგორც იცით, ჰოლანდიელ სპეციალისტს რეკორდმაისტერთან ხელშეკრულების ვადა მიმდინარე სეზონის ბოლოს ეწურება. "მე მჯერა, რომ ლუისი ჩვენთან დარჩება, რადგან ყველაფრით კმაყოფილია," - უთხრა ნერლინგერმა "ბილდს".
ამას გარდა, რეკორდმაისტერის მენეჯერმა კლუბის მიზნების შესახებაც ისაუბრა. მისი თქმით, "ბაიერნი" ვალდებულია, გერმანიის ჩემპიონობა და თასი შეინარჩუნოს, ჩემპიონთა ლიგაში კი მინიმუმ მერვედფინალში გავიდეს - და ეს მიუხედავად იმისა, რომ წინა სეზონში "ბაიერნმა" ჩემპიონთა ლიგის ფინალში ითამაშა.
ლუის ვან გაალმა კი გუშინ გამართულ
პრესკონფერენციაზე ტონი კროოსი გააკრიტიკა. მისი თქმით, "ლევერკუზენიდან" "ბაიერნში" დაბრუნებული ნახევარმცველი ჯერ ვერ თამაშობს ისე, როგორც ლუისი მისგან ელის.
