როცა რაულმა მაგათს მოუსმინა

წინა კვირაში „შალკეს“ საგონელებში ჩავარდნილმა მთავარმა მწვრთნელმა ფელიქს მაგათმა „რეალიდან“ დიდი ზარ-ზეიმით გადმოყვანილი ლეგენდარული თავდამსხმელი რაული პირველად და ძალიან მაგრად გააკრიტიკა, რამაც შედეგი გამოღო: 33 წლის ფორვარდმა პარასკევს, „ზანკტ პაულისთან“ სწორად და რაც მთავარია, ძალიან კარგად ითამაშა. შედეგი: გონსალეს ბლანკომ დუბლი შეასრულა, „შალკეც“ გადაარჩინა და საკუთარი თავიც. „შალკეს“ კრიზისი, რაულის პრობლემა - გელზენკირხენში კრიზისი აღარ გამძაფრდა, პირიქით, „შალკემ“ სწორი გზისკენ აიღო გეზი.

ჩემპიონთა ლიგაში, თელ „ავივის ჰაპოელთან“ იღბლიანი 0:0-ის შემდეგ მაგათმა ხმამაღლა თქვა, რაულს ნახევარდაცვაში დახევას და ბურთის თრევას სულაც არ ვთხოვ, პირიქით, მინდა, რომ სულ საჯარიმოს მისადგომებთან და საჯარიმოში იტრიალოს, მისი მოვალეობა სწორედ ეს არისო. მწვრთნელის სურვილი კი ესპანელისთვის ბრძანება უფრო იყო - ბრძანება, რომელიც რაულმა პირველივე მატჩში შეასრულა, თანაც, უნაკლოდ.

„ზანკტ პაულისთან“ რაული უმეტესად საჯარიმოში და ხშირად მეკარის საჯარმოში ტრიალებდა და ბუნდესლიგაში პირველი დუბლი შეასრულა. „მიუხედავად ყველაფრისა, მწვრთნელი მაინც სრულ თავისუფლებას მანიჭებს, ფელიქს მაგათი ყოველდღე მესაუბრება და ჩვენც ვბჭობთ ხოლმე, რა არის უკეთესი გუნდისთვის. იმედი მაქვს, რომ ახლა ზედიზედ რამდენიმე თამაშს მოვიგებთ,“ - თქვა გახარებულმა რაულმა.

მატჩის მერე რაული მაგათმაც აქო, მის შესაძლებლობებში ეჭვი არასდროს შემპარვია, უბრალოდ, ვურჩიე, რომ უმეტესად საჯარიმოში იტრიალოსო. მცველმა კრისტოფ მეტცელდერმა კი აღიარა, რომ „შალკეს“ ფეხბურთელებს უფრო მეტად დაევალათ რაულის პასებით მომარაგება. „როცა ფლანგებიდან ვაწოდებთ, მნიშვნელოვანია, რომ საჯარიმოში ერთდროულად რამდენიმე ფეხბურთელი ვიყოთ. ხომ ნახეთ, რაულმა პირველი გოლი სწორედ ასე გაიტანა,“ - ეს ესპანელის მეწყვილის, კლაას-იან ჰუნტელაარის სიტყვებია.
შაბათს „შალკე“ „ვოლფსბურგში“ ჩადის...

ყოველდღიური სპორტული გაზეთი
"ლელო"