კარი ჩაკეტილია, მაგრამ ნებისმიერი, ვისაც „ბორუსია პარკის“ კატაკომბებში ყოფნის უფლება აქვს, იოლად მოისმენს, რა ხდება მიუნხენის „ბაიერნის“ გასახდელში. ლუის ვან გაალის ხმა გარკვევით ისმის - „ბაიერნის“ ჰოლანდიელი მწვრთნელი შეგირდებს ლანძღავს: „როგორ შეიძლება ასეთი უპირატესობის დათმობა? რა მოგივდათ მეორე ტაიმში?
ფაქტი ერთია, მიუნხენურმა კლუბმა ძალიან სულელურად დაკარგა ორი ქულა და სატურნირო ცხრილში ისევ გაურკვევლობაშია - არც ზემოთ, არც ქვემოთ. ვან გაალი კი „ფრაიბურგთან“, „გლადბახთან“ და „ნიურნბერგთან“ ცხრა ქულის მოგროვებას გეგმავდა, რაც რეკორდმაისტერს მდგომარეობას მნიშვნელოვნად გამოუსწორებდა, მაგრამ მიზანი უკვე მიუღწეველია, რადგან „გლადბახთან“ მატჩი 3:3 დასრულდა. ახლა კი, „ბაიერნის“ მწვრთნელს სერიოზულად ეპარება ეჭვი იმაში, რომ მისი შეგირდები რაღაცას მიჰქარავენ - „გლადბახთან“ მატჩის მეორე ტაიმს ძალიან ცუდი სუნი ასდის და ლუისიც განრისხებულია.
ვან გაალის გაბრაზება აბსოლუტურად ლოგიკურია. მარტო ლუისი კი არა, მიონხენგლადბახში დაკარგულ ორ ქულაზე, მთელი მიუნხენი ბრაზობს. სხვა დროს განგაშის ზარებს არავინ შემოჰკრავდა, რადგან „ბაიერნს“ „ბორუსია პარკზე“ მოგება ყოველთვის უჭირს ხოლმე, მაგრამ ახლა, როცა მიუნხენელებს ქულები ჰაერივით სჭირდებათ, ვეღარავინ ეგუება ფრეს ისეთ მეტოქესთან, რომელიც ისტორიულად დიდი გუნდია, მაგრამ დღესდღეობით ცხრილის ფსკერზე „ბანაობს“. ვან გაალი კი განსაკუთრებით მაგრად ბრაზობს, რადგან მის მიუნხენურ კარიერაში ერთ-ერთი უმძიმესი კვირის გამარჯვებით დაგვირგვინება სურდა.
ზოგადად, ათი დღეა, „ბაიერნში“ ჰოლანდიელი სპეციალისტი თავს ისე კომფორტულად ვეღარ გრძნობს, როგორც მანამდე გრძნობდა. ათი დღის წინ, ბავარიული გრანდის პრეზიდენტ ული ჰიონესის სატელევიზიო გამოსვლამ ვან გაალის გარშემო შექმნილი სიტუაცია რადიკალურად შეცვალა. ყველაზე თვალსაჩინო ცვლილება ის არის, რომ ჟურნალისტები ვან გაალს ახლა უკვე ძალიან ხშირად ეკითხებიან ჰიონესთან ურთიერთობისა და მომდევნო მატჩების შესახებ და თვითონ ვან გაალმაც არ იცის, „კლუჟთან“ მატჩის წინ ჰიონესმა ხელი რომ ჩამოართვა, ეს რეალური შერიგება იყო, თუ ხალხისთვის დასანახი, ბანალური საქციელი. უნდა, თუ არ უნდა, აღიარებენ, თუ არ აღიარებენ, მიუნხენში ვან გაალის თაობაზე დისკუსია დაიწყო - დისკუსია, რომელიც ჰოლანდიელ მწვრთნელს ძალიან არ მოსწონს. მიზეზი: ამიერიდან, ყოველი ვერმოგებული მატჩის შემდეგ ლუისი კრიტიკის მთავარი ობიექტი იქნება.
საინტერესო ის არის, რომ თავისი კოლეგებისგან განსხვავებით, ლუის ვან გაალს სამსახურის დაკარგვის არასდროს ეშინია. მის ადგილზე ნებისმიერი სხვა მწვრთნელი ჰიონესის სიტყვების შემდეგ ანერვიულდებოდა და შეშინდებოდა, არ გამათავისუფლონო. გაგახსენოთ, რა თქვა ულიმ ათი დღის წინ? „ვან გაალთან საუბარი ძალიან ძნელია, რადგან სხვისი მოსაზრებების გაგონებაც კი არ უნდა... მე მასთან აღარაფერი მაქვს სალაპარაკო... საფეხბურთო გუნდი არ არის და ვერ იქნება მხოლოდ ერთი კაცის მისახედი...“
ვან გაალს კი არ ეშინია. ლუისმა თავის სამწვრთნელო კარიერაში თითქმის ყველაფერი მოიგო, იმუშავა ისეთ სუპერგრანდებში, როგორებიც „ბარსელონა“ და „აიაქსი“ არიან და ორი აზრი არ არსებობს, უკვე იმდენი ფული აქვს, რომ შეუძლია, ამ ქვეყანაზე „მეორედ მოვიდეს“. სხვათა შორის, ვან გაალი ახლა აღარც ისეთი იმპულსურია, როგორიც ადრე იყო. ამ ყველაფერს ისიც ემატება, რომ ცოტა ხნის წინ ლუისმა თქვა, მინდა, რომ 2012 წლის ზაფხულიდან რომელიმე ნაკრებს ჩავუდგე სათავეშიო. იქამდე კი სულ რაღაც წელიწადნახევარია დარჩენილი.
მიუხედავად ამ ყველაფრისა, ვან გაალი ჰიონესზე მაინც ძალიან გაბრაზდა. აქ არაფერ შუაშია არც „გლადბახთან“ დაკარგული ქულები და არც „ბაიერნის“ დღევანდელი მდგომარეობა, ამ შემთხვევაში მთავარი გრძნობებია - რასაც ვან გაალი ყოველთვის და ყველგან უფრთხილდებოდა. ჰიონესის საქციელმა გული დასწყვიტა ლუისს - არა, როგორც მწვრთნელს, არამედ, როგორც ადამიანს, რომელიც ძალიან ამაყია და აფასებს ისეთ ფასეულობებს, როგორებიცაა მეგობრობა, ლოიალურობა, ერთ მუშტად შეკრულობა. აქამდე ლუისი ფიქრობდა, რომ „ბაიერნში“ ეს ყველაფერი იპოვნა, მიაგნო გუნდს, რომელიც მისთვის ყველანაირად ზედგამოჭრილია.
გავიხსენოთ ვან გაალის პირველი პრესკონფერენცია „ბაიერნის“ მწვრთნელის რანგში: 2009 წლის ივნისში ლუისი ჟურნალისტების წინაშე სწორედ ჰიონესთან ერთად წარსდგა. იცინოდნენ, ხუმრობდნენ, ვან გაალმა ულის მხარზე ხელი რამდენჯერმე დაჰკრა - როგორც მეგობარს, თავისნაირს. მაშინ ული ჯერ კიდევ მენეჯერი იყო და თქვა, ლუის, ტყავის შარვალი მაგრად მოგიხდება და მე დარწმუნებული ვარ, რომ ერთმანეთს ჩვენც ძალიან ვუხდებითო.
იმ პრესკონფერენციიდან 16 თვის შემდეგ კი დაისვა კითხვა: ეს შეცდომა ხომ არ იყო? რა გასაკვირია, რომ ვან გაალი გადაირია, ლამის ჭკუიდან შეიშალა, როცა ამ ყველაფრის შემდეგ, თუნდაც მხოლოდ იმ პრესკონფერენციის შემდეგ, ული ჰიონესი მასთან კი არ მივიდა, არამედ წავიდა ტელევიზიაში და ვან გაალი ტელევიზორიდან ლანძღა.
ლუისმა თავი კიდევ კარგად აკონტროლა, თავიდან არაფერი უთქვამს, მერე, „კლუჟთან“ მატჩის წინ ულის ხელიც კი ჩამოართვა (როგორც „ბაიერნის“ ოფიციალურ განცხადებაში იყო ნათქვამი), გასულ შაბათს კი ვეღარ მოითმინა, თან ფეხბურთელებმაც ხელი შეუწყვეს და გასკდა, აყვირდა, ბოღმა გადმოანთხია. ნიძლავს ჩამოვალთ, რომ ბოღმის ფეხბურთელებზე გადანთხევა დაგეგმილი არ ჰქონია და ეს მერე ინანა კიდეც. ერთი სიტყვით, ადრესატი იმისა, რაც შაბათს „გლადბახისა“ „ბაიერნის“ მატჩის მერე, მიუნხენელთა გასახდელში მოხდა, მინიმუმ ვან გაალის ქვეცნობიერში, „ბაიერნის“ პრეზიდენტი ული ჰიონესი იყო.
ფაქტია, რომ გაგრძელება აუცილებლად იქნება...
ყოველდღიური სპორტული გაზეთი
"ლელო"
