რაღა თქმა უნდა, ფაქტი უსიამოვნოა, მაგრამ მსგავსი რამ ამა თუ იმ გუნდის ვარჯიშებზე მაინც არაა უცხო. აქ საინტერესო უფრო ისაა, რომ ტიმოშჩუკი საყრდენი ნახევარმცველის პოზიციაზე ვან ბომელის უშუალო კონკურენტია და ბოლო მატჩებში მარკს სწორედ ანატოლი ცვლიდა,
შეიძლება, კონკრეტულად ტიმოშჩუკის წინააღმდეგ უხეში თამაშიც უბრალო დამთხვევა იყოს, მაგრამ რაკი ვან ბომელის ზნე კარგად ვიცით, მაინც არ უნდა გამოვრიცხოთ, რომ მან კონკურენტის დამტვრევა წინასწარ განიზრახა. ასეა თუ ისე, ფაქტია, რომ ამ ორ ფეხბურთელს შორის კონკურენციას ვერაფრით ვუწოდებთ ჯანსაღს.
ჯერჯერობით, უცნობია, მიიღებს თუ არა "ბაიერნის" ხელმძღვანელობა ვან ბომელის მიმართ რაიმე ზომებს. ბუნდესლიგის უახლოეს მატჩში მისი მონაწილეობა ისედაც ნაკლებად სავარაუდო იყო, რადგან ვან ბომელს ფიზიკური კონდიციები ბოლომდე ჯერ არ აღუდგენია.
იმასაც შეგახსენებთ, რომ სულ ცოტა ხნის წინ ერთმანეთის მისამართით მკვახე გამონათქვამები არ დაუშურებიათ მიუნხენელთა მთავარ მწვრთნელ ლუის ვან გაალსა და გენერალურ მენეჯერ ული ჰიონესს. ამას დაუმატეთ გუნდის არასახარბიელო შედეგები და თამამად შეგვიძლია ვთქვათ, რომ "ბაიერნს" ცუდი დროება უდგას.
