გერმანიის ნაკრების ძირითად შემადგენლობაში სწორედ ბალაკის ადგილზე თამაშობს და ძალიან კარგადაც ასპარეზობს, რის გამოც ყურადღების ცენტრშია მოქცეული. გავრცელდა ცნობები, რომ ხედირას ისეთმა გრანდებმა დაუმიზნეს, როგორებიც არიან მადრიდის "რეალი" და ლონდონის "ჩელსი". ფაქტია, რომ თუ ამ კლუბების დაინტერესება დაკონკრეტდა, "შტუტგარტის" ხელმძღვანელები ხედირას შვაბურ კლუბში ვერ გააჩერებენ. შესაბამისად, გუნდის მთავარი მწვრთნელი კრისტიან გროსი იძულებულია, იფიქროს, რა უნდა მოიმოქმედოს იმ შემთხვევაში, თუ ხედირა მის გუნდს დატოვებს.
"შტუტგარტი" ახალი სეზონისთვის დონაუეშინგენში
"არ მინდა, რომ ხედირამ დაგვტოვოს, მაგრამ ჩვენ მას ვერ შევაჩერებთ," - აცხადებს გროსი. 23 წლის ფეხბურთელს "შტუტგარტთან" კონტრაქტი ერთი წლის შემდეგ უმთავრდება, რაც იმას ნიშნავს, რომ თუ ახლა არ გაყიდეს და ვერც ახალი ხელშეკრულება გაუფორმეს, შვაბებს გაისად ხედირას უფასოდ დათმობა მოუწევთ. "შტუტგარტის" სპორტული დირექტორის, იოხენ შნაიდერის თქმით, მას "რეალიდან" ან "ჩელსიდან" ხედირას თაობაზე ფაქსიც კი არ მიუღია. მოკლედ, "შტუტგარტის" შეფები ისე ლაპარაკობენ, რომ ფაქტია, სამი ხედირა ტრანსფერზეა დაყენებული.
"შტუტგარტისთვის" ფულის მოტანა გერმანიის ნაკრების კიდევ ერთი წევრის, ცენტრალური მცველის, სერდარ ტასკის ტრანსფერსაც შეუძლია, რომელსაც შვაბებთან კონტრაქტი 2014 წლამდე აკავშირებს. მაგრამ ხედირასგან განსხვავებით, 23 წლის ტასკის მუნდიალზე არცერთი თამაში არ ჩაუტარებია, რაც იმას ნიშნავს, რომ მას თავის გამოჩენის შანსი არ მისცემია. აქვე გეტყვით, რომ ამ დღეებში შტუტგარტელები მოლაპარაკებებს "ჰანოვერის" ბოსებთან აწარმოებენ. საქმე ეხება ბრაზილიელ ელსონს, რომელსაც გროსი ითხოვს. "ჰანოვერს" ელსონში 700 000 ევროს აღება უნდა.
