მას მერე, რაც მიუნხენის „ბაიერნთან“ კარიერის ერთ-ერთი საუკეთესო მატჩი ჩაატარა, არ წყდება მითქმა-მოთქმა იმის შესახებ, რომ „შალკესა“ და გერმანიის ნაკრების მეკარე მანუელ ნოიერი რეკორდმაისტერში უნდა გადავიდეს. მანუელს გელზენკირხენულ კლუბთან კონტრაქტი 2012 წლამდე აკავშირებს, მაგრამ რა იქნება ხელშეკრულების ვადის ამოწურვის შემდეგ? ფაქტი ის არის, რომ „შალკეს“ თავკაც ფელიქს მაგათს ნოიერი არ ეთმობა და თანაც, „დესპოტ ფელიქსს“ სჯერა, რომ ბუნდესმეკარე „შალკესთან“ ახალი კონტრაქტის გაფორმებას მოისურვებს.
მაგათს ნოიერთან გასაუბრება მომავალ კვირებში, ახალ წლამდე აქვს გადაწყვეტილი. მანუელის გულის მოსაგებად მაგათი დღენიადაგ იმეორებს, ნოიერი მსოფლიოში
ამას წინათ ნოიერმა თქვა, რაც არ უნდა იყოს, პირველ რიგში მხოლოდ „შალკეს“ დაველაპარაკებიო, რამაც მაგათი ძალიან გაახარა. „მე ყველაფერს გავაკეთებ იმისათვის, რომ მანუელმა ჩვენთან ახალი კონტრაქტი გააფორმოს,“ - ამბობს მაგათი.
ფელიქსი ჯეფერსონ ფარფანის მომავლის გარკვევასაც ძალიან მალე აპირებს. მას პერუელი გარემარბის შენარჩუნებაც სურს: „ფარფანმა მიმდინარე სეზონის პირველ წრეში მართლაც ძალიან კარგად ითამაშა, რის გამოც მინდა, რომ ჩვენთან მანაც ახალი ხელშეკრულება გააფორმოს.“ სხვათა შორის, „კიკერის“ შეფასებებით თუ ვიმსჯელებთ, ამ სეზონში ნოიერი (2.57) და ფარფანი (3.00) საუკეთესო შალკელები არიან.
სამაგიეროდ, მაგათი თანახმაა, საყრდენ ნახევარმცველ ჯერმეინ ჯონსს და გამთამაშებელ ალექსანდერ ბაუმიოჰანს შეელიოს. გაგახსენებთ, რომ ერთი კვირის წინ ფელიქსმა ეს ფეხბურთელები განაცხადიდან ამოაგდო და მეორე, მოყვარულთა გუნდში გადაისროლა. ფელიქსის თქმით, თუ ახალ გუნდებს იპოვნიან, გზა ორივე ფეხბურთელს ხსნილი აქვს.
„ჯონსისა და ბაუმიოჰანის გადაბირების სურვილი ჯერჯერობით არავის აქვს. ჯერმეინმა და ალექსმა თქვეს, რომ „შალკედან“ წასვლა უნდათ. მე საწინააღმდეგო არაფერი მაქვს,“ - აღნიშნავს მაგათი.
