ბალაკი სახლში დაბრუნდა

მიხაელ ბალაკმა სამშაბათს ლევერკუზენის „ბაიერთან“ ორწლიანი კონტრაქტი გააფორმა, გუშინ კი, კლუბის ხელმძღვანელებმა გერმანიის ნაკრების 33 წლის კაპიტანი ჟურნალსტების წინაშე ოფიციალურად წარადგინეს. „არჩევანი „ლევერკუზენის“ სასარგებლოდ პირველ რიგში იმიტომ გავაკეთე, რომ ამ გუნდთან ერთად გერმანიის ჩემპიონობისთვის ვიბრძოლებ. „ბაიერი“ უამბიციო რომ იყოს, ახლა არ ვიჯდებოდი,“ - ასეთი იყო ბალაკის პირველი სიტყვები „ლევერკუზენის“ ფეხბურთელის რანგში.

მანამდე, „ლევერკუზენის“ მენეჯერმა ვოლფგანგ ჰოლცჰოიზერმა განაცხადა, რომ ბალაკის ტრანსფერი „ბაიერისთვის“ განსაკუთრებული მოვლენაა. პირველ რიგში იმიტომ, რომ მიხაელის ტრანსფერი და მისი ორწლიანი ხელშეკრულება არა კლუბმა, არამედ მისმა მფლობელმა ფარმაცევტულმა კომპანიამ,

„ბაიერმა“ დააფინანსა. მიხაელის „ლევერკუზენში“ დაბრუნების იდეა კი პირველად სპორტულ დირექტორ რუდი ფიოლერს მოუვიდა. ამ უკანასკნელს მიხაელთან ძალიან კარგი ურთიერთობა აქვს, მაგრამ ფიოლერის თქმით, ეს ტრანსფერი მხოლოდ „ლევერკუზენისთვის“ კი არა, თვითონ ბალაკისთვისაც ძალიან კარგია, რადგან მიხაელი გადადის ფუნქციონირებად გუნდში, რომლის მიზანი მომავალ სეზონში გერმანიის ჩემპიონობა იქნება.

ზოგადად, „ლევერკუზენის“ ხელმძღვანელებს დიდი ხანია, ჩემპიონობაზე ასე ღიად არ უსაუბრიათ, მაგრამ ახლა გაცილებით გაბედულები არიან, რაც ბალაკის გადაბირების დამსახურებაა.
„ჩვენ ძალიან ახალგაზრდული გუნდი გვყავს, რომელსაც სწორედ ასეთი გამოცდილი ფიგურა სჭირდებოდა. ბალაკი იდეალური ფეხბურთელია იმისთვის, რომ გუნდში ბალანსი დამყარდეს. ყველაზე კარგი ის არის, რომ გუნდში მიხაელის ინტეგრირება ძალიან სწრაფად მოხდება. დარწმუნებული ვარ, რომ ბალაკთან ერთად ბევრს მივაღწევთ,“ - ეს „ლევერკუზენის“ მთავარი მწვრთნელის, იუპ ჰაინკესის სიტყვებია.

რაც შეეხება მიხაელის გამოჯანმრთელების პროცესს. ფეხბურთელის თქმით, ყველაფერი კარგადაა. ბალაკი იმედოვნებს, რომ ბუნდესლიგის პირველ ტურში (20 აგვისტოს) მოედანზე გასვლას შეძლებს.

ჟურნალისტებმა ბალაკს კითხვა გერმანიის ნაკრების კაპიტნობის შესახებაც დაუსვეს. როგორც იცით, მსოფლიოს ჩემპიონატის ნახევარფინალური მატჩის წინ, ბუნდესგუნდის დროებითმა კაპიტანმა ფილიპ ლამმა განაცხადა, რომ მუნდიალის შემდეგ, ბალაკს კაპიტნობას იოლად არ დაუთმობდა და ლამის ამ განცხადებამ გერმანიაში დიდი დისკუსია გამოიწვია.

„გერმანიის ნაკრების კაპიტანი მე ვარ და ის, რაც ფილიპ ლამმა თქვა, ვფიქრობ, არასწორია. არასწორად პირველ რიგში შერჩეული მომენტი მიმაჩნია, გერმანიის ნაკრებს ხომ უმნიშვნელოვანესი მატჩი ელოდა. მსოფლიოს ჩემპიონატზე ფილიპი კაპიტანი იმიტომ იყო, რომ მე ტრავმირებული ვიყავი. თუ ლამს განსხვავებული აზრი აქვს, ამის შესახებ გერმანიის ნაკრების მთავარ მწვრთნელ იოახიმ ლიოვთან უნდა მოილაპარაკოს. მე მისთვის არაფერი მაქვს სათქმელი,“ - განაცხადა მიხაელმა.