რატომ გავიდა "მანჩესტერ სიტის" იტალიელი თავდამსხმელი მარიო ბალოტელი მოედნიდან 57-ე წუთზე? ლაპარაკია კიევში "დინამოსა" და "სიტის" შორის გამართულ ევროლიგის შეხვედრაზე, რომელიც "დინამომ" 2:0 მოიგო. ყველამ ვინც თამაშს ან თუნდაც მის რჩეულ მომენტებს უყურა, შეამჩნია, რომ ბალოტელი თავს კარგად ვერ გრძნობდა, რაც, თურმე, მისი ალერგიის ბრალი ყოფილა. აი რა თქვა მატჩის შემდეგ ისტლენდერთა მწვრთნელმა რობერტო მანჩინიმ:
"მას ალერგია სჭირს. მე არ ვიცი კერძოდ რაშია საქმე, მაგრამ მას სახე გაუსივდა. როგორც ჩანს მეორე ტაიმში მას მოედანზე შესვლა აღარ შეეძლო. გამოსვლამდე 10 წამით
როგორც "მანჩესტერ სიტის" სამედიცინო პერსონალისგან გახდა ცნობილი ბალოტელის ბალახის ზოგიერთ სახეობაზე აქვს ასეთი ალერგია და კიევში მაინცდამაინც ასეთი ბალახი ყოფილა დათესილი.
იანგი მანჩესტერისკენ მიიწევს
"ასტონ ვილას" ფორვარდი ეშლი იანგი ზაფხულში "მანჩესტერ იუნაიტედში" აპირებს გადასვლას და ცდილობს ამთავითვე ჩაშალოს ბირმინგემელთა ყოველი მცდელობა გაუხანგრძლივონ კონტრაქტი. 25 წლის ფეხბურთელის შეძენა სერ ალექს ფერგიუსონს რახანია უნდა. იანგი მას რაიან გიგზის შემცვლელად მიაჩნია. მოწადინებულია თავად ფორვარდიც. როგორც ტაბლოიდებისთვის გახდა ცნობილი, მან "ვილაში" თანაგუნდელებს უკვე უთხრა, რომ "ოლდ ტრეფორდზე" აპირებს გადასვლას. ამბობენ, რომ იანგი, რომელიც სეზონის წინ 25 მილიონი ფუნტი ღირდა ზაფხულში 10 მილიონზე ძვირი არ ეღირება. მიზეზი: მას "ასტონ ვილასთან" კონტრაქტი შემდგომი სეზონის ბოლომდე აქვს და ახალს არ აფორმებს. გამოდის, რომ თუ ბირმინგემელები იანგს ახლავე არ გაყიდიან, ერთ წელიწადში ის თავისუფალი აგენტი გახდება, ქუდს დაიხურავს და ისე წავა, რომ კლუბს პენიც არ დარჩება.
ვითომ ყვითელია
გადასარევი ამბავი მოხდა ოთხშაბათს პრემიერლიგის გამოტოვებულ შეხვედრაში, სადაც "ევერტონმა" და "ბირმინგემმა" ლივერპულში 1:1 ითამაშეს. კერძოდ, როდესაც თამაშის მსვლელობისას ბირმინგემელმა ფეხბურთელმა ჯორდან მატჩმა ლუი საას წინააღმდეგ იუხეშა და მსაჯმა პიტერ უოლტონმა მისი ყვითელი ბარათით დასჯა მოინდომა, აღმოჩნდა, რომ არბიტრს ჯიბეში არაფერი სდებია. ფანები ხედავდნენ, როგორ იქექებოდა ის ერთხანს ჯიბეში, მერე კი დარწმუნდა რომ იქ არც ყვითელი ბარათია, არც წითელი და... ფეხბურთელს წარმოსახვითი ყვითელი აუფრიალა. ერთ-ერთმა გულშემატკივარმა თქვა: "ეს ძალიან სასაცილო სანახავი იყო. თავი მოყვარულთა გუნდების თამაშზე მეგონა".
