ჟოზე მოურინიომ ლონდონის „გროსვინორ ოტელში“ დაადასტურა ის, რასაც ინგლისური ტაბლოიდები და კერძოდ გაზეთი „სანი“ დაახლოებით ათი დღის წინ იტყობინებოდა - ის ინგლისში აპირებს დაბრუნებას. ის ბრიტანეთში საგანგებო საფეხბურთო-საქველმოქმედო საღამოში მონაწილეობისთვის გახლდათ ჩასული. კერძოდ მან თქვა:„ინგლისი ძალიან მენატრება და ჩემი შემდეგი სამსახურიც ამ ქვეყანაში იქნება. აქ საქმეები დამრჩა დასამთავრებელი - თქვა მან ისევ და ისევ „სანის“ კორესპონდენტთან შეხვედრისას - ვფიქრობ, არც ინგლისელები არიან უარზე მე რომ დავბრუნდე. ჩემი კარიერის ყველაზე სასიამოვნო წუთები სწორედ პრემიერლიგაში გავატარე“.
ეს პირველი შემთხვევა არ არის,
48 წლის მოურინიომ თქვა: „ის დრო რომელიც „ჩელსიში“ გავატარე საუცხოო იყო ჩემთვის, როგორც სპეციალისტისთვის და როგორც მეოჯახე კაცისთვის. მე და ჩემი ოჯახის წევრებმა ინგლისში ცხოვრებას გემო გავუგეთ და ჩავატანეთ. აქ უამრავი მეგობარი გვყავს, რომლებთანაც ურთიერთობას ვინარჩუნებთ და ჩამოვდივართ ხოლმე.
რაც შეეხება საფეხბურთო მხარეს, ინგლისში ყველაფერი მოგებული მაქვს და მხოლოდ რომელიმე ინგლისური ჯილდოს მოსაპოვებლად ჩამოსვლას არ ვგეგმავ. მე ჩემს აგენტებს ვუხსნი, რაც მინდა და ჩემი ცხოვრების პროექტისთვის ვემზადები. დღეს, კონტრაქტით „რეალთან“ კიდევ სამი წელიწადი მაკავშირებს. „რეალი“ მსოფლიოს უდიადესი კლუბია, მაგრამ, იმავდროულად, ურთულესი კლუბიც გახლავთ. მადრიდელებმა სხვადასხვა დროს სამჯერ მომმართეს „რეალს“ რომ ჩავდგომოდი სათავეში და მესამედ უარი ვეღარ ვუთხარი. ასევე უნდა წავსულიყავი იტალიაში. ეს ჩემთვის იყო მნიშვნელოვანი. როგორც მწვრთნელს მინდოდა სერია A-ში აუცილებლად მომესინჯა ძალა. ყველასგან მესმოდა, რომ იტალია ტაქტიკის ქვეყანა და სახლია, ასე რომ ამ ქვეყანაში აუცილებლად უნდა გამეტარებინა რაღაც დრო.
მაგრამ იტალია ინგლისი არ არის. ინგლისი სხვაა. იტალიელები, ესპანელები, პორტუგალიელები მეკითხებიან, რატომ მიყვარს ინგლისი ასე გამორჩევით და მე ვერ ვპასუხობ. მიყვარს და მორჩა. მინდა ჩემს საქმეში, ჩემს ფეხბურთში ბედნიერი ვიყო“.
ამასობაში კი „ჩელსის“ ფრენკ არნესენის წასვლის შემდეგ შეიძლება გუს ჰიდინკი დაუბრუნდეს - როგორც მიხვდით მწვრთნელად კი არა, საფეხბურთო საქმეთა დირექტორად. „ლურჯებმა“ ჰოლანდიელს ამავე წინადადებით ნოემბერშიც მიმართეს, მაგრამ მან მაშინ უარი მიიღეს. დღეს კი, როდესაც ჰიდინკის თურქეთის ნაკრებიდან წამოსვლაზე დაიწყო ლაპარაკი, ვითარება შეიცვალა. დავაზუსტოთ: 26 და 29 მარტს თურქებს ევრო 2012-ის შესარჩევში ავსტრიასა და ბელგიასთან უწევთ შეხვედრა. თუ ეს თამაშები მათთვის სასურველი ანგარიშით არ დამთავრდება და გუნდი ფინალურ ეტაპზე მოხვედრის შანსს დაკარგევს, ჰიდინკი შესაძლოა ამ ქვეყნიდან წავიდეს.
„ყველა ღონეს ვხმარობ რათა თურქეთის ნაკრები გაძლიერდეს, მაგრამ თუ ვერ შევძელი, ფეხბურთის ასოციაციის პრეზიდენტს ვთხოვ, რომ სამსახურიდან გამიშვას“ - თქვა ჰიდინკმა.
