შაბათს „მანჩესტერ სიტის“ სეზონის ერთ-ერთი უმთავრესი მატჩი ელის — ფეხბურთის ასოციაციის თასის ნახევარფინალში „მანჩესტერ იუნაიტედს“ ხვდება, მაგრამ, ბედი არ გინდა, მაინც და მაინც ახლა დაუშავდა კარლოს ტევესი. მოგეხსენებათ, ორშაბათს, პრემიერლიგის 32-ე ტური „ენფილდ როუდზე“ „ლივერპულისა“ და „სიტის“ შეხვედრით დასრულდა. ეს გახლდათ მატჩი, რომელშიც ისტლენდელებს ძალიან არ გაუმართლათ. ამას ანგარიში 3:0-იც ადასტურებს. მერსისაიდელთაგან სამიდან ორი გოლი ახალშეძენილმა ენდი ქეროლმა შეაგდო, სტუმრების მწვრთნელ რობერტო მანჩინის კი წაგებაზე მეტად, ალბათ, ტევესის დაშავება ეწყინა. არგენტინელი მე-16 წუთზევე შესაცვლელი გახდა.
მატჩის შემდგომ პრესკონფერენციაზე მანჩინიმ განაცხადა,
„კარლოსს ორთავა კუნთი ეტკინა, რაც შაბათისთვის მდგომარეობას ძალიან გვირთულებს. ახლა მის გარეშე მოსამზადებლად მხოლოდ და მხოლოდ ხუთი დღე გვრჩება. ძალიან ვეცდებით ტევესი შემდგომი ორი თამაშისთვის მაინც გამოვაჯანმრთელოთ, მაგრამ ეს ძნელი იქნება. ალბათ, მოვლენებს არ დავაჩქარებთ, რადგან მაისში სხვა თამაშებიც გვაქვს და ჯობს თავდამსხმელმა იქ გამოიჩინოს თავი“.
ქეროლის გარდა „მანჩესტერ სიტის“ კარში ჰოლანდიელმა დირკ კუიტმაც შეაგდო, თუმცა სტუმართა მეკარე ჯო ჰარტი რომ არა, მერსისაიდელები, ალბათ, კიდევ უფრო მეტ გოლს გაიტანდნენ. მანჩინიმ უხარისხო თამაშის გამო პასუხისმგებლობა მთლიანად იკისრა და განაცხადა, რომ ოქტომბრის მერე ყველაზე დიდ ფიასკოში ფეხბურთელები უდანაშაულონი არიან.
„მე შევცდი — ვაჟკაცურად თქვა ისტლენდელთა თავკაცმა — თამაში ჩამს გამო წავაგეთ. მნიშვნელოვანია, რომ საკუთარ შეცდომას დროულად მივხვდი. ბოლო რამდენიმე დღის განმავლობაში არასწორად ვხელმძღვანელობდი გუნდს. ფეხბურთელები არაფერ შუაში არიან. გარდა ამისა, „ლივერპულმა“ პირველი 20 წუთის განმავლობაში დიდებულად ითამაშა. ჩვენ მათ სივრცეები დავუტოვეთ და მათაც ამ უპირატესობით ისარგებლეს. ისინი ძალიან აგრესიულები იყვნენ. ამ დღეს გუნდს სამი დასვენებული ფეხბურთელი მივაშველე, მაგრამ ყურადღების კონცენტრაცია გვაკლდა. თუმცა, არ ვნერვიულობ. ეჭვი არ მეპარება, რომ ჩემპიონთა ლიგაში გამსვლელ ადგილსაც მოვიპოვებთ და ფეხბურთის ასოციაციის თასის ფინალშიც გავალთ“.
ორი გოლის გატანისთვის დიდი ქება დაიმსახურა ენდი ქეროლმა. რა არ დაწერეს გაზეთებმა: „დენდი ენდი“ თუ „ფერნანდო... ვინ?“ — აქაოდა, მასთან შედარებით ტორესი ვინღა არისო. თავად ფეხბურთელმა თქვა:
„დიდებული დღე იყო. „ლივერპულში“ ჩემი პირველი გოლი გავიტანე და ბრწყინვალე გამარჯვებაც მოვიპოვეთ. ვიცოდი, რომ ადრე თუ გვიან ასე მოხდებოდა“.
„წითლების“ მწვრთნელმა კენი დალგლიშმა, რომელმაც ამ დღეს 18 წლის დებიუტანტი ჯონ ფლენაგანი ათამაშა თქვა, რომ ეს, იანვრის ანუ მწვრთნელის პოსტზე დაბრუნების შემდეგ მისი საუკეთესო თამაში იყო.
„ფლენაგანმა კი ინგლისის ნაკრების წევრ ჯეიმს მილნერის წინააღმდეგ ითამაშა და წარბიც არ შეუხრია“.
