ინგლისის ფეხბურთის ასოციაციის თასის ფინალი „მანჩესტერ სიტისა“ და „სტოკს“ შორის 14 მაისს გაიმართება. ამ შეხვედრისთვის ორივე ბანაკში დიდი მზადებაა. გარდა ჩვეულებრივი, ფეხბურთთან დაკავშირებული საკითხებისა, როგორც სტოკელები, ასევე მანჩესტერელები, მუსიკალურ მხარესაც საგანგებო ყურადღებას აქცევენ. „სტოკის“ ფალავანი ტომ ჯონსია, მანჩესტერელების კი, რასაკვირველია, ნოელ გალაჰერი.
ნახევარფინალში „სტოკმა“ „ბოლტონს“ 5:0 მოუგო. „უემბლის“ სტადიონზე გამართულ ამ შეხვედრაში წარმატებული გუნდის გულშემატკივრები ჯონსის მსოფლიო ჰიტ „დილაილას“ მღეროდნენ და... თუ ანგარიშის მიხედვით ვიმსჯელებთ, კარგად დაცადეს. ამიტომაც მიმართეს კლუბის ხელმძღვანელებმა 71 წლის ვარსკვლავის იმპრესარიოს, რათა ჯონსმა ეს სიმღერა ცოტათი
„ჩვენ ბედნიერები ვიქნებით თუ ტომი დაგვთანხმდება და „დილაილას“ საფინალო სიმღერის სახეს მისცემს. როდესაც ნახევარფინალში, „უემბლის“ დინამიკებში, ეს სიმღერა დააგუგუნეს, „სტოკის“ ქომაგები ერთხმად აჰყვნენ და ისეთი ამბავი ატყდა, რომ შეხვედრა ჩვენს საშინაო მატჩს დაემსგავსა“.
და თუ ჯონსი საზოგადოების წინაშე გამოსვლასაც დათანხმდება, მაშინ ის ისტლენდელთა ფალავნის, „ოაზისის“ ყოფილი გიტარისტის, ნოელ გალაჰერის საპირისპიროდ გამოყვანილ სტოკელთა ფალავანს დაემსგავსება.
ამასობაში კი მანჩესტერში, ქერინგტონის საწვრთნელ ბაზას კარლოს ტევესი დაუბრუნდა და „სიტის“ ფანებს იმედი გაუჩნდათ, რომ არგენტინელი ვარსკვლავი სეზონის ორ უმნიშვნელოვანეს შეხვედრაში მონაწილეობას მიიღებს. საქმე ის გახლავთ, რომ ტევესმა ორი კვირა მილანში, არგენტინის ნაკრების ექიმთან გაატარა.
რამდენადაც ინგლისური გაზეთები წერენ თავდამსხმელი კარგი ფიზიკური ფორმისგან ჯერ შორს არის, მაგრამ ისტლენდელთა თავკაცმა რობერტო მანჩინიმ იმედი გამოთქვა, რომ ის 10 მაისს „ტოტენჰემთან“ შეხვედრაში მონაწილეობას მიიღებს. ამას, რასაკვირველია, მოჰყვება 14 მაისს დანიშნული ფინალიც. რაც შეეხება თავად ფეხბურთელს, ის ცდილობს მოვლენები დააჩქაროს და ამბობს, რომ 7 მაისს, „გუდისონ პარკზე“, „ევერტონის“ წინააღმდეგაც შეძლებს თამაშს, თუმცა „სიტის“ ექიმთა კაბინეტი ასეთი მოუთმენლობის წინააღმდეგია.
