„ჩელსის“ კაპიტანი კვლავ 30 წლის ჯონ ტერი იქნება. დასავლეთლონდონელთა ახალმა თავკაცმა, ანდრე ვილას-ბოასმა თქვა, რომ მას ძველი კაპიტნისა სწამს და მას სრულად ენდობა. ფაქტია, რომ ტერი „ლურჯების“ ისტორიაში ყველაზე წარმატებული კაპიტანია. ტაბლოიდებმა კი შეიტყვეს, რომ ვილას-ბოასი იმავდროულად სხვა ფეხბურთელებსაც დააკვირდება და შეეცდება მათში „ჩელსის“ ახალი კაპიტანი ამოიცნოს. რად უნდა ლაპარაკი, რომ 33 წლის პორტუგალიელ მწვრთნელს ახალი ლიდერები სჭირდება.
ვილას-ბოასმა თქვა: „ჯონი ჩვენი კლუბის კაპიტანია და სანამ ისე თამაშს შეძლებს, ბოლო ექვსი წლის განმავლობაში რომ თამაშობდა, სამკლავურს მას ვერავინ შეეცილება. ტერის
გუნდის დღევანდელი შემადგენლობის წევრთა უმეტესობას ვიცნობ და ვიცი, რომ მათ შორის ჯონია დაჯილდოვებული იმ თვისებებით, რომლებიც ასე სჭირდება კაპიტანს. მას შეუძლია თანაგუნდელები აიყოლიოს. ერთი სიტყვით, თუ როდესაც ჯონი შემადგენლობაში იქნება, სამკლავური, რასაკვირველია მას ეკეთება“.
ვილას-ბოასის ამ განცხადებას ჟურნალისტებმა ანალიზი გაუკეთეს და დაასკვნეს, რომ ის ტერისთვის კარგ ინფორმაციასაც შეიცავს და ცუდსაც. კარგი ის არის, რომ ტერი კაპიტნად დარჩება, ცუდი კი ის, რომ მას სამკლავური ყველა შეხვედრაში კი არ ეკეთება, არამედ... იმ შემთხვევაში თუ მოედანზე იქნება. ეს კი იმას ნიშნავს, რომ ვილას-ბოასი ჯონ ტერის ყველა შეხვედრაში თამაშს არ უპირებს. დიახ, ანდრე ვილას ბოასი, რომელსაც ინგლისურ პრესაში ავბ-საც უწოდებენ (როგორც ჩანს, ასე გრძელი, დეფისიანი გვარის წერას არიდებენ თავს) ყოველ შეხვედრაში თერთმეტ კაცს დამსახურების მიხედვით კი არ შეარჩევს, არამედ იმის მიხედვით, ვინ როგორ ფორმაში იქნება მოცემულ მომენტში.
და კიდევ, ვილას-ბოასის ნათქვამში მკაფიოდ იგრძნობოდა, რომ ის მოედანსმიღმა კონფლიქტებს და სკანდალებს ვერ შეეგუება. „ჩელსის“ ახალ მწვრთნელს უნდა, რომ მისი ფეხბურთელები მთელი ინგლისისთვის სამაგალითონი იყვნენ. ფეხბურთელმა კლუბს სახელი არ უნდა გაუტეხოს.
„ჩვენ გვინდა, რომ „ჩელსის“ ფეხბურთელები გამარჯვებულები იყვნენ არა მხოლოდ მოედანზე, არამედ ცხოვრებაშიც. თუკი ისინი საზოგადოებისთვის სამაგალითონი გახდებიან, მოედანზეც მიაღწევენ წარმატებას. თუ ჩვენ, გუნდის მწვრთნელები, დავინახავთ, რომ გამოჩნდნენ ბიჭები, რომელთაც ხალხი ბაძავს, რასაკვირველია, კაპიტნობის შანსს მათაც მივცემთ. ხომ გახსოვთ, ყოფილა შეხვედრები, როდესაც „ჩელსის“ ლემპარდმა და დროგბამაც უკაპიტნეს. ბოლოს და ბოლოს ჯონი ერთადერთი ლიდერი ხომ არ არის. „ჩელსიში“ ბევრი ლიდერია“.
ყოველდღიური სპორტული გაზეთი "ლელო"
