27 წლის არგენტინელმა თავდამსხმელმა კარლოს ტევესმა თქვა, რომ „მანჩესტერ სიტიდან“ მიდის, რადგან შვილების გარეშე ცხოვრება არ შეუძლია. საქმე ის გახლავთ, რომ ისტლენდელთა კაპიტანი ოჯახს დაუბრუნდა. ის შეურიგდა ცოლს, ვანესას და გოგონებთან, 6 წლის კატისა და წლინახევრის ფლორენსიასთან ერთად დაიწყო ცხოვრება.კარლოსისა და ვანესას ურთიერთობა იმიტომ გაფუჭდა, რომ ქალს მანჩესტერში ცხოვრება აღარ შეეძლო, შვილებს ხელი მოჰკიდა და არგენტინაში დაბრუნდა. ახლა, როგორც გითხარით, ოჯახი კვლავ ერთად არის, მაგრამ ფეხბურთელი ამბობს, რომ მეუღლეს ბრიტანეთის კუნძულებზე დაბრუნებას ვერ აიძულებს.
ამრიგად, რჩება ერთადერთი ვარიანტი: ტევესმა
გაზეთები წერენ, რომ ამ მდგომარეობით სარგებლობას რამდენიმე ევროპული კლუბი ცდილობს. ესენია: „რეალი“, „ინტერი“ და „იუვენტუსი“. საინტერესოა, რომ ტევესის გარშემო ნიადაგი მოსინჯა „ჩელსიმაც“. „ჩელსი“, რასაკვირველია, ინგლისური კლუბია და ლონდონიც ბრიტანეთის კუნძულებზე მდებარეობს, მაგრამ „ლურჯების“ შეფები იმედოვნებენ, რომ არგენტინელი ფორვარდის ცოლს მანჩესტერში არ შეუძლია ცხოვრება, თორემ დედაქალაქში პრობლემა არ ექნება. მეპატრონე რომან აბრამოვიჩს ტევესის სანაცვლოდ 50 მილიონი ფუნტის გადახდა არ ენანება.
ტევესმა კი თქვა: „ძალიან მტკივა გული, მაგრამ იძულებული ვარ „მანჩესტერ სიტის“ შევატყობინო, რომ კლუბის დატოვებას ვაპირებ. მინდა ყველამ იცოდეს, რომ ძალიან დიდ პატივს ვცემ „სიტის“, მის გულშემატკივრებს და პირადად შეიხ მანსურს, რომელიც ჩემს მიმართ უკიდურესად გულისხმიერი იყო. იმედი მაქვს, რომ ხალხი გამიგებს და მიხვდება, რომ ოჯახური მდგომარეობის გამო ძალიან რთული 12 თვე გადავიტანე. მანჩესტერში შვილების გარეშე ცხოვრება ჩემთვის უკიდურესად რთული იყო. ყველაფერი, რასაც ვაკეთებ ამ გოგონებისთვის მინდა და მათთან განშორება ჩემს ძალებს აღემატება. ჩემი ცხოვრება მთლიანად მათ ეძღვნება“.
ტევესის ასეთი განცხადება „სიტის“ იტალიელი თავკაცისთვის, რობერტო მანჩინისთვის დიდი დარტყმა იქნებოდა. ისტლენდელები შვებულებიდან გუშინ დაბრუნდნენ და ვარჯიშსაც შეუდგნენ, ხოლო მანჩინიმ გასულ უქმეებზე, შეკრებისწინა ინტერვიუში განაცხადა, რომ არგენტინელი გუნდში რჩება.
„დიდი კლუბის კაპიტნობა, პრემიერლიგის საუკეთესო ბომბარდირობა, ფეხბურთის ასოციაციის თასის მოგება და ჩემპიონთა ლიგის საგზურის მოპოვება ჩემთვის დიდი პატივი იყო. დარწმუნებული ვარ, „სიტის“ ფანების უდიდესი ნაწილი ხედავდა, რომ მოედანზე სულს და გულს ვდებდი. მწამს, გუნდი ჩემი წასვლის შემდეგაც დიდ წარმატებებს მიაღწევს“ - განაგრძო ტევესმა, რომელმაც დასძინა, რომ „სიტიდან“ წასვლას იანვარშივე აპირებდა, მაგრამ თავმჯდომარე ხალდუნ ალ მუბარაქმა პირადად სთხოვა და ზაფხულამდე გადაადებინა.
არგენტინელმა დასძინა, რომ ისტლენდზე კვირაში 200 ათას ფუნტს იღებდა და ამდენად, მისი გადაწყვეტილება მატერიალური მოსაზრებებით არ არის განპირობებული. მანვე თქვა, რომ ძალიან ეწყინა, როდესაც გაიგო, რომ მანჩინი „ინტერისთვის“ მის სამუელ ეტო’ოში გაცვლას აპირებდა.
იმის დასამტკიცებლად, რომ ამა თუ იმ ადგილთან შეგუების პრობლემა მარტო მის ოჯახს არ აქვს, ტევესმა „მანჩესტერ სიტის“ აღმასრულებელი შეფის, გერი კუკის მაგალითი მოიტანა. მან თქვა, რომ კუკის ოჯახმაც ვერ გაუძლო მანჩესტერში ცხოვრებას და ამერიკაში დაბრუნდა.
ამიერიდან, მანჩინი ტევესის შემცვლელის ძებნას დაიწყებს და, სავარაუდოდ, მისი თანამემამულის, 23 წლის სერხიო აგუეროს ყიდვას შეეცდება.
ყოველდღიური სპორტული გაზეთი "ლელო"
