გუშინ მოგახსენეთ, რომ "მანჩესტერ იუნაიტედმ" 20 წლის პორტუგალიელი თავდამსხმელი ბებე იყიდა. ამ ბიჭს მესამე ლიგაზე უფრო მაღალი დონის ფეხბურთი არასდროს უთამაშია, ისიც პორტუგალიაში - პორტუგალია, მოგეხსენებათ, არც ინგლისია და არც ესპანეთი. წესით, "ვიტორია გიმარაეშში" ახალ აყვანილს მომდევნო სეზონში უნდა გამოეჩინა ადგილობრივი ფანების წინაშე თავი და ამხანაგურ შეხვედრებში მოსინჯა კიდეც ძალა, მაგრამ ყველასთვის მოულოდნელად საიდანღაც "გამოვარდნილმა" სერ ალექს ფერგიუსონმა დასტაცა ხელი - მანჩესტერელთა შეფმა ბებეს კონტრაქტი 7,4 მილიონ ფუნტად (8,45 მილიონი ევრო) გამოისყიდა. გუშინვე
ინგლისურმა პრესამ კი გადაწყვიტა მიმხვდარიყო, რით მოიხიბლა ფერგიუსონი და დასვა კითხვა: რატომ იყიდა "იუნაიტედმა" ბებე?
ნამდვილი სახელი
ბებეს ნამდვილი სახელი ტიაგო მანუელ დიას კორეია გახლავთ. მაშ ბებე რაღაა? ასე, ბავშვობაში უფროსი ძმა ეძახდა - როგორც ხედავთ ძმაც ყოლია. კაცმა რომ თქვას, აწ უკვე მანჩესტერელი მთლად უპატრონო ბავშვთა სახლშიც არ არის აღზრდილი. ის იზრდებოდა ლისაბონის გარეუბან ლოურესში მდებარე თავშესაფარში სადაც ძალიან ღარიბი მშობლების შვილებს უყრიან თავს. ბებეს დედა და მამა კაპო ვერდედან არიან. იქიდანაა "მანჩესტერ იუნაიტედის" კიდევ ერთი ფეხბურთელი ნანი.
როგორ გახდა ფეხბურთელი?
თავიდან ბურთი ქუჩაში გააგორა, მაგრამ, შემდეგ "ეშტრელა დე ამადორას" ხალხმა (ახლა მესამე ლიგაშია) შეამჩნია და ლოურესის საყმაწვილო გუნდში მოაწყო. მოკლედ, ბებემ ყურადღება მესამე დივიზიონში მიიპყრო.
უსახლკაროთა მსოფლიოს ჩემპიონატზე მართლა ითამაშა?
მთლად ასე არ იყო. შარშან ქრისტიანთა საერთაშორისო ასოციაციამ ბოსნიაში ქუჩის ფეხბურთის ფესტივალი მოაწყო, სადაც ბებემ ექვს შეხვედრაში 60 გოლი გაიტანა - ამდენი გუნდებმაც ვერ გაიტანეს. რაც შეეხება პორტუგალიელ უსახლკაროთა ნაკრებს, ის იმ დროისთვის უკვე დაკომპლექტებული იყო და ბებესტვის ადგილი აღარ გამოიძებნა.
რამ აიძულა ფერგიუსონი ბებე ეყიდა?
რამ კი არა ვინ: ყოფილმა ასისტენტმა კარლოს კეირუშმა. სხვათაშორის, ბებეს ყიდვა, თურმე, "რეალსაც" უნდოდა. ფერგიუსონს ბებე ამ კვირის დასაწყისამდე ნანახიც კი არ ჰყავდა.
ძლიერი თვისება
ბუნებრივად წრაფია, მარჯვენა ფეხით ძლიერად არტყამს. 190 სანტიმეტრი სიმაღლის კაცი თავითაც კარგად თამაშობს. ღონიერია და კორპუსს კარგად დგამს - შორეულად შესაძლოა რუუდ გულიტი მოგაგონოთ. ორივე ფრთაზე თამაშობს. ქუჩური ფეხბურთის აღზრდილს თანდაყოლილი ფანტაზია აქვს, ნორმებით არავის შეუზღუდავს.
ათამაშებენ მანჩესტერში?
"ქარლინგის თასზე" შესაძლოა მოუწიოს კიდეც თამაშმა.
