ვან პერსი ვენგერის მადლიერია

„არსენალის“ ჰოლანდიელი თავდამსხმელი, 28 წლის რობინ ვან პერსი წარმატებული კარიერისთვის „მეთოფეთა“ თავკაც არსენ ვენგერს უხდის მადლობას. მიმდინარე ჩემპიონატში ვან პერსიმ 11 ტურში 11 გოლი გაიტანა და ასეთი შედეგით, რასაკვირველია, პრემიერლიგის ბომბარდირთა სიას ლიდერობს. თუ დროს სეზონების მიხედვით კი არა, ასტრონომიული პრინციპით გავყვებით, ვნახავთ, რომ ჰოლანდიელის შედეგი კიდევ უფრო უნიკალურია: „ვესტ ბრომვიჩთან“ 3:0 მოგებულ შეხვედრაში მას ბოლო 28 შეხვედრაში 29-ე გოლი გაუტანია.

ვან პერსი ამბობს: „ბედის მადლიერი ვარ არსენ ვენგერი რომ გამაცნო. 20 წლის ვიყავი, როდესაც მან მნახა და მკითხა: რატომ არ ხარ მსოფლიო კლასის თავდამსხმელი? მე რაღაც მიზეზები დავუსახელე. წადი და კიდევ უფრო კარგად დაფიქრდი, მიპასუხა მან. რამდენიმე წელიწადი რომ გავიდა, კვლავ მკითხა: ახლა ხარ მსოფლიო კლასის ფეხბურთელი? არა მგონია, ვუპასუხე მე. მაშინ, კიდევ დაფიქრდი და მიხვდი რატომ არ ხარ, გაიმეორა ვენგერმა და... მას მერე რაღაც-რაღაცების მიხვედრა დავიწყე. ის კი მთელი ამ ხნის განმავლობაში პატარ-პატარა რჩევებს მაძლევდა. მკარნახობდა, როგორ უნდა გამეუმჯობესებინა თამაში. ბოლოს უკვე, ყოველ კვირაში უბრუნდებოდა ჩემი
საუკეთესოობის თემას. მაიძულებდა ყოველ ჯერზე რაღაცას მივხვედრილიყავი, ნაბიჯი გადამედგა წინ“.
სულ, 2004 წლის მაისის შემდეგ ანუ იმ დღიდან, რაც 2,75 მილიონ ფუნტად ჩრდილოლონდონელებმა ის „ფეიენოორდისგან“ იყიდეს, რობინ
ვან პერსიმ 246 შეხვედრაში 108 გოლი გაიტანა.

ჰოლანდიელი დასძენს: „ხალხს ჰგონია, რომ მე მომავალ შეხვედრაშიც გავიტან, რადგან წინა შეხვედრებში გავიტანე, არადა ასე მარტივად არ არის საქმე. ყოველ გოლს თავისებური მომზადება და ამოხსნა უნდა. მეორე მხრივ კი შეუდარებელი შეგრძნებაა, როდესაც თამაშში სულ ერთი-ორი შანსი გეძლევა, მაგრამ შენ ამით სარგებლობ“.

ყოველდღიური სპორტული გაზეთი "ლელო"