და აი, კიდევ ერთი თამამი საქციელი: 30 წლის ვეტერანმა "შინ" დაბრუნება და ერთი დღით საყვარელი ფორმის მორგება
სხვათაშორის, ცნობილი გახდა, რომ ოუენი 4 სექტემბერს მხოლოდ ერთ ტაიმს ითამაშებს. ცნობილია ისიც, რომ "ენფილდზე" გამგზავრების ნება მას პირადად სერ ალექს ფერგიუსონმა დართო. ლეგენდარული შოტლანდიელი, მოგეხსენებათ, არაფერს აკეთებს თუ მის ნაბიჯს პრაქტიკული სარგებელი არ მოაქვს. ამჯერადაც, ფერგის იმედი აქვს, რომ თუნდაც ერთტაიმიანი პრაქტიკა მის თავდამსხმელს კარგ სამსახურს გაუწევს.
ინგლისური გაზეთები კი წერენ, რომ "მანჩესტერ იუნაიტედის" ბევრი გულშემატკივარი ოუენს თავისიანად ისედაც ვერ აღიქვამს. მიზეზი ზემოთ უკვე ვთქვით: "ლივერპულში" გატარებული წლები. თუმცა, ისიც გასათვალისწინებელია, რომ "ნიუკასლიდან" "მანჩესტერში" გადასვლის შემდეგ 2001 წლის "ოქროს ბურთის" ლაურეატს ხეირიანად არ უთამაშია - ვერ მოიგო ხალხის გული. გეხსომებათ, თითქმის ერთი წლის წინ, შარშან სექტემბერში მან "მანჩესტერ სიტისთან" დაუვიწყარ შეხვედრაში გადამწყვეტი გოლი გაიტანა, მაგრამ... შემდეგ, პრემიერლიგაში ამ გოლს მხოლოდ ორიღა მიამატა. დანარჩენი ექვსი გოლი მან ჩემპიონთა ლიგასა და ლიგის თასზე შეყარა. თავდამსხმელი მაინცდამაინც არც ბედმა გაანებივრა - ხსენებული ლიგის თასის ფინალში, "უემბლიზე" დაშავდა და სეზონიც იქ დაამთავრა. ეს საკმაოდ ადრე, თებერვალში მოხდა.
და რას უნდა ველოდოთ უამრავი ტრავმით დატანჯული 30 წლის კაცისგან ახალ სეზონში? გუნდში სადაც ახალი თაობის ისეთი ფორვარდები თამაშობენ, როგორებიც არიან უეინ რუნი, დიმიტარ ბერბატოვი და ხავიერ ერნანდესი? სავარაუდოდ, ბევრს არაფერს.
და კიდევ, საინტერესოა, როგორ მიიღებენ ოუენს "ლივერპულის" ფანები. ხომ არ დაგვავიწყდა, რომ მან "მანჩესტერ იუნაიტედში" გადასვლა იკადრა?
