"ბოლტონთან" 2:1 დამარცხებამ "ბლექბერნი" პრემიერლიგის ცხრილის ფსკერს დაახეთქა, მაგრამ გუნდის მწვრთნელი, სტივ კინი მაინც ასე ამბობს: "ახლა თანამდებობიდან რომ მომხსნან, ძალიან გამიკვირდება".აღსანიშნავია, რომ "ბოლტონმა" რივერსაიდელებს მათსავე მოედანზე, "ივუდ პარკზე" აჯობა. ამასთან, "თეთრები" სულაც არ იყვნენ ცხრილის ზედა ნახევრიდან. მე-17 ტურის შეხვედრამდე სწორედ ისინი იყვნენ ბოლოზე, ასე რომ, სამშაბათს ამ ორმა გუნდმა ადგილები გაცვალა.
ხსენებულ "ივუდ პარკზე" გულშემატკივართა ერთი ჯგუფი, რომელთა შორისაც ხუთასამდე ადამიანი გამოირჩეოდა, კინის გაგდებას ითხოვდა. ისინი მთელი მატჩის განმავლობაში ახლანდელი მწვრთნელის საწინააღმდეგო მოწოდებებს იძახდნენ, ადრინდელი თავკაცის, უელსელი
პროტესტის მიუხედავად, კინმა მატჩისშემდგომ პრესკონფერენციაზე თქვა:
"სრულიად დარწმუნებული ვარ, რომ "ბოქსინგ დღეს" კვლავ "ბლექბერნის" მწვრთნელი ვიქნები. იმედი მაქვს, ფანების კეთილგანწყობას დავიბრუნებ. ეს რასაკვირველია, ერთადერთ შემთხვევაში მოხდება, თუ თამაშებს მოვიგებთ, მაგრამ რას ვიზამ.
ასეთია ჩვენი პროფესია. როდესაც იგებ, ხალხს მეცხრე ცაზე აჰყავხარ, ხოლო, როდესაც მარცხდები, მიწასთან გასწორებენ. ახლა, ჩვენ ვალდებულები ვართ არნახული ბრძოლით დავიმკვიდროთ ადგილი პრემიერლიგაში. საბედნიეროდ, დაცვა სრული შემადგენლობით მიბრუნდება. ეს იმას ნიშნავს, რომ გოლებს აღარ გავუშვებთ, გატანა კი ჩვენ ყოველთვის შეგვიძლია.
თავს კი არ ვიმართლებ, ფაქტს ვამბობ: ჩვენ ცუდად იმიტომ ვთამაშობდით, რომ მცველები დაგვიშავდა. "ბლექბერნის" მრავლისმნახველმა ფიზიოთერაპევტმა ორი ისეთი ტრავმა აღმოაჩინა, რომლის მსგავსი 30 წლიან პრაქტიკაში ნანახიც არ ჰქონდა".
"ბოლტონელების", მარკ დევისისა და ნაიჯელ რიო-კოკერის მიერ პირველ ტაიმში გატანილმა ორმა გოლმა, "ბლექბერნი" იმთავითვე უშანსოდ დასტოვა. ერთადერთი, რაც რივერსაიდელებმა ამის შემდეგ მოახერხეს სხვაობის შემცირება იყო. ეს იაკუბუმ შეძლო. კინმა დასძინა:
"თამაში პირველ ტაიმში წავაგეთ. ორი გოლის გაშვების შემდეგ ვეღარაფერი შევძელით. მართალია, შესვენებაზე ბიჭებს ერთი-ორი მკაცრი სიტყვა ვუთხარი და მოედანზე დაბრუნებულებს შევატყვე, რომ მეორე ტაიმს უკეთ ითამაშებდნენ, მაგრამ შეხვედრის მთლიანად გადასარჩენად ეს საკმარისი არ აღმოჩნდა".
"ბოლტონის" თავკაცმა, ოუენ კოილმა კი თქვა, რომ "ივუდ პარკის" ტრიბუნებზე შექმნილმა კინის საწინააღმდეგო განწყობამ მისი გუნდის წისქვილზე დაასხა წყალი.
"შესაძლოა, რასაც ვამბობ საშინლად ჟღერს, მაგრამ ფეხბურთელებს ვუთხარი, თუკი თამაშს კარგად დავიწყებთ და ხალხი დაინახავს, რომ ჩვენ მათ გუნდს ვჯობივართ, ტრიბუნებზე კინის საწინააღმდეგოდ დიდი ამბავი ატყდება და ამით ძალიან ვიხეირებთ, მეთქი. ვიცი, ბლექბერნში დღეს ყველაფერს კინს აბრალებენ, მაგრამ, მერწმუნეთ, ის დიდებული მწვრთნელია. აქ პრემიერლიგაა. ინგლისის ჩემპიონატში შესაძლოა ოცივე კლუბმა საუკეთესო სპეციალისტი აიყვანოს სამსახურში, მაგრამ ვიღაც მაინც გავარდება. "როვერსის" ფეხბურთელებზე რაც გინდათ ის თქვით, ერთი კი ფაქტია, სტივის მხარდასაჭერად მათ თავი დასდეს".
ყოველდღიური სპორტული გაზეთი "ლელო"
