უილშერი, რომელიც ასაკის მიუხედავად
უილშერმა, შაბათს "ბლექბერნთან" 2:1 მოგებაში მხოლოდ ბოლო ექვსწუთიანი მონაწილეობა მიიღო. ფეხბურთელი და მისი დაკავებული მეგობრები კონგსტონის პოლიციის განყოფილებაში წაიყვანეს. ახლა, გამომძიებლების განკარგულებაში მოწმეთა ჩვენებების გარდა არის თითის ანაბეჭდები, სისხლის ანალიზი და კლუბთან დაყენებული ვიდეოკამერების კადრები. დაჭერილები ოქტომბრის შუამდე თავდებით გამოუშვეს.
კლუბთან დაყენებული კამერები ვახსენეთ... ამაზე უკეთესს ინგლისური გაზეთი ვერ ინატრებდა: ეს კამერები "დეილი მეილის" კენსინგტონის ოფისის კარზეა დაყენებული და ჩხუბიც სწორედ მის წინ მოხდა. "მეილის" ჟურნალისტები ამბობენ, რომ მათი ეჭვით დაზარალებულმა ქალმა ხელი უფრო წაქცევის გამო მოიტეხა ვიდრე დარტყმის შედეგად. პოლიციამ წაიღო ქალის ხელიდან ჩამოვარდნილი ბრილიანტებით გაწყობილი სამაჯურიც. მოჩხუბრების გაშველება ღამის კლუბის დაცვის წევრებმა სცადეს. ისინი შენობიდან გამოვარდნენ და მხარეების დაშორიშორებას ლამობდნენ. ერთმა კარისკაცმა შიგნით მომხდარი ამბავი მოყვა:
"ქაოსი ატყდა. ისინი ერთმანეთს დაუნდობლად ურტყამდნენ და ებღაუჭებოდნენ. ვიღაც ქალი დაბლა ეგდო და კიოდა. სხვა ქალებმაც იკივლეს და შენობიდან გარეთ გავარდნენ. ჩვენ მათი დაშორიშორება ვცადეთ, მაგრამ ისე იყვნენ ერთმანეთს ჩაბღაუჭებულები, რომ ვერ მოვახერხეთ. ძალიან დიდი ხმაური იდგა და ერთ ბიჭს ცხვირიდან და პირიდან სისხლი მოსდიოდა. პოლიცია დაახლოებით ხუთი წუთის შემდეგ მოვიდა. ყველაფერი გამაოგნებელი იმიტომ იყო, რომ ჩვენი კლუბი ქალაქის ერთ-ერთ ყველაზე მშვიდ რაიონშია და აქ საერთოდ, ასეთ აყალმაყალს ხალხი დაჩვეული არ არის".
ძალიან საინტერესო ისიც გახლავთ, რომ გარეთ გასულ უილშერს (სანამ ტაქსიში ჩაჯდებოდა) ერთ-ერთ ძმაკაცთანაც მოსვლია შელაპარაკება. თვითმხილველები ზუსტად ვერ ამბობენ თუ რას ეუბნებოდნენ ბიჭები ერთმანეთს, მაგრამ ეჭვია, რომ უილშერი მეორის დაწყნარებას უფრო ცდილობდა. პოლიციიდან გამოსულ ხმათა თანახმად, ჩხუბის უკლებლივ ყველა მონაწილის მტკიცებით დაზარალებული ქალი თავიდანვე მაჩხუბრების გაშველებას ცდილობდა".
